NDAWI ENGGA 63 - Nanduk Ngget Tul Pidnak Wene

Mbal Pem Nagawan ebem indi mbitlidnak wene Ndaut na Yewura karu me ereba me woralat-nen ngaridnak ndawi.

¹ Mbal Pem Nagawan wa-e. Kar-e an Nembal Pem Nagawan-nen yusu-o. An nindi-ge kar-et keberagirik, kogore yusu-o. Nggweyak amburu lak sa-nen yi kilik purak ukwe worasu iri nggal an-e kat nere-nen nindi eberek yusu-o.

² Kat kama-nen kar-e keyasolat, kat kamawi min kat-nen kek tak woraso min-e kayeg-o.

³ Unluk wolmomtak iri-ge marik-nen yusu-o. Alat nde, kat-nen tugup lak enabuwa yoso elem iri perak nggok-nen yusu-o. Iri bem-e, kat kerembel wanimin-o.

⁴ An-e pem irit woralar-e, kat nak wiwa-o yak korosolat woramin-o. An tepan yosolar-e, ninggi leksa kat kambigit nggwe ndimirik puruk, tepan yimin-o.

⁵ Nunggwi mende undu konak inmbitsa ninggidnak nggal, an nindi yamuksa ndak tak pusu iri bem-nen an-e nene nggoksa nalen pem kat kerembel wanimin-o.

⁶ An-e nene yoso sa mbinggirik woralar-e, nindi-ge kat kebem mborok tenak woralat, kubu-ge nene yigit lak, nindi-ge kat kebem nak worasu-o.

⁷ Kat-nen pempa an yongga noroso bem-e an-e kat kisiyamu arem woralat, nalen pem ndawi yosolat worasu-o.

⁸ Kat kinggi-nen an yogo nuburuk worala, an ninggi-ge puk paksa tena kuburuk worasu-o.

⁹ Alat nde, an nuruwokluk yili nab-e ap yapma unpugwi sa mbuwa-o.

¹⁰ Ir-e wim pem unduwama, isilepma worak ndakngge naso mende kwat ma-o.

¹¹ Mbal Pem Nagawan-nen yongga worosola, nagawan-e alen kasolat wolma-o. Mbal Pem Nagawan unu bem owak mbatli nab-e inndi-nen-e kek yogolat wolma-t nde, ennesiget yugwi nap enemnde-ge usurup lerak puwa-o.