NDAWI ENGGA 27 - Nanduk Ngget Tul Pidnak Wene

Nagawan Indo kek tak pogolat tepan yidnak wene Ndaut-nen yidnak ndawi.

¹ Nagawan Indo iri-ge an neyaya min an nimiri yoso min-nen yusu-o. An-e ap kwiye kamin pug-o. Nagawan Indo iri-ge an kurak yoso nondoro pak-nen yusu-o. An-e mondok kwiye kamin pug-o.

² Meya kwarugwi nap-nen an nuruwokluk an nebem kore yukmu-ge, it nde unuwok pijaksa mbud yugwi-o.

³ San ombo kwarat-nen an lop lop nuruwa-t nde, an-e kwiye kamin pug-o. Wim nab-e an nuruwokluk nimin wim ngaruwa-t nde, an nindi-ge kebem-et wat tak puruk woramin-o.

⁴ An-nen nindi perasu-ge misiget yu nak Nagawan Indo ebem nggi yusu-o. Misiget ukwe yusu-ge yu nag-o: Nagawan Indo-nen konak nak kwat noboso elem iri na-ge an nerengen-nen kasolat, ndemel nuburuk noso elem nggi yosolat yurak pem an woralar-e, kat kama nak wolmomtak irit ukwe-o.

⁵ An nindi kabak yoso tarem-e Nagawan Indo-nen kura nubusu-o. At-nen-e at ama kura nubusu-o. At-nen-e kerep ndobo tup mberengtak pem nibil lasu-o.

⁶ Nde, yawo-ge an nuwim nap neralu ponok ponok worali urugwe nggwe rak unpuruk, ombol nggwe-t yusu-o. An-e nalin nalen min-et kat kama iri me wa yak korosolat kat kamanggim wam wosa kan pusu-o. An-e Nagawan Indo erembel wanosolat ndawi yimin-o.

⁷ Nagawan Indo wa-e. An-nen kat keram wene mbo bil luwasola-ge, an nene kuli-o! Nabuwa karug-e, nene erep nggari-o!

⁸ Kat-nen yosolar-e: ”An nogore yi-o” yigen na-ge an-nen yosolar-e: ”Nagawan Indo wa-e. An-e kogore yimin-o” luk yigi-o.

⁹ An-nen kiyujwa naru, kurak yurak pug-o. Ndegel koboso nap an-e kisilepma nuburuk, keya nuburak pug-o. An Nimiri Yoso Mbal Pem Nagawan wa-e. Kar-e an yongga noroso-nen yusu-o. Mbo nibilik, keya nibilik yurak pug-o.

¹⁰ An neid min niya min-nen-e keya nubuwa-t nde, Nagawan Indo-nen-e kwara ndegel-et nubuwa-o.

¹¹ Nagawan Indo wa-e. Kat kindi-n pidnak irit mirik nibi-o. An nuwim nab-e kwarat me, nimiri yurak tula nggwe-t ndemel nuburuk mbiri-o.

¹² It-nen an nebem mbud yogolat enesiget wene bem insilepma bem nebem mbud yili nimin sirid nap ereba indi-n ukwe peragwi ambigit nuburak pug-o.

¹³ An nindi-nen-e an nuruk nggweyakma yu me woralar-e, Nagawan Indo-nen konak nak kwat onposo elem iri na-ge kamin-er-o luk naru worasu-o.

¹⁴ Kindi-ge Nagawan Indo ebem nak mbung mbung tak puruk wolmin-o. Kindi-ge tugup lak, uwi ya irit wolmin-o. Ye! Nagawan Indo ebem-et kindi mbung mbung tak puruk wolmin-o.