NDAWI ENGGA 124 - Nanduk Ngget Tul Pidnak Wene

Mbal Pem Nagawan-e ilirak nggetlel unpuruk woraso ndawi Lagolat-nen yugwi Ndaut-nen ngaridnak ndawi.

¹ Isarael nap wa-e. Kit-nen wene onggo-ge yu nggal yer-o: Nagawan Indo nde nit nenambigit yigit lak ala-ge, ngge nde kwatleb-o? Isarael wa-e. Onggo-ge yu nggal yer-o:

² ”Wim nap-nen nde nit nondogola, Nagawan Indo nde nit nenambigit yigit lak yelepnggal-e,

³ it insilepma kwiye worak iri-nen mondok nunsu kundugu nok nenpeleb-o.

⁴ Nir-e korosolat nggal nir-e mbereksa wok nunpuruk mbetlepma, yi-nen yemen ninpidnak woraleb-o.

⁵ Nir-e mondok yi iminep kwatluk nggoso sa mondok yubuktak ma worak nenpeleb-o” luk yurag-o.

⁶ Nit nunuwim nap-nen lak tak nunpuwakluk keya ninpigit lak me, nir-e Nagawan Indo nak wiwa-o luk yak tuwog-o.

⁷ Nir-e sabu logo bugwi nap-nen pidnak arem-nen nggogora mboroso nggal, nenare pidnak iri na-ge ndela keya buruk, nir-e wesera keya ninpij-o!

⁸ Nit yongga nondoso iri-ge mbal min nggweyak min ndak worak pid Nagawan Indo iri nak-nen yongga nondoso-o.