NDAWI ENGGA 103 - Nanduk Ngget Tul Pidnak Wene

Mbal Pem Nagawan-nen enabuwa kaso wene Ndaut-nen ngaridnak ndawi.

¹ Nindi wa-e. Nagawan Indo erembel wani-o. Nindi ebis-et wa-e. At unu marak iri nak erembel wani-o.

² Nindi wa-e. Nagawan Indo erembel wani-o. At-nen konak kwaroso-ge meme rak purak pug-o!

³ Kat-nen meya kwaroso oboksa at-nen lak tak pusu-o. Kat-nen kugwi kebem mboso oboksa-ge at-nen ki rak kubusu-o.

⁴ Yapma-nen kimiri yusu-o. Enabuwa kaso elem min unpud kaso elem min-e kwarat kebem pusu-o.

⁵ Kat-nen woraso-ge at-nen yamuksa ndak tak kobosola-ge, kar-e towe ud nggal ngget tak kuburuk, sujwe rak kubusu-o.

⁶ Nde, Nagawan Indo-ge ndemeret lud tak nak kwaroso me, mbenat onposolar-e, anggun panggun tak inpili nap enambigit yoso-o.

⁷ At-nen-e at-nen kwarurak wene-ge Musa imbiri bem nam tak posolat, at-nen kwaroso mende-ge Isarael nap inmbiri bem nam tak posolat kwarij-o.

⁸ Nagawan Indo-ge unpud kasolat, enabuwa kwarat kasolat yoso elem me, mondok mamak puruk worasolat, kwarat enabuwa kaso-nen yusu-o.

⁹ At iri-ge isilepma min met onposolar-e, kundugu met onposolat woraso bug-o. At isilepma pempa kundugu woraso bug-o.

¹⁰ At-nen nit nenpem angin worak posolar-e, nit-nen kwaridnak ndak ndag-et nenpem poso bug-o. Iri-nen nit-nen meya kwaridnak onggo posolat na, nit-nen kwaridnak, nit-nen lugud tak kwarugwi ndak ndag-e poso bug-o.

¹¹ At-nen ap at indi aye worak worali nap enabuwa kasolar-e, nggweyakma yu me-nen mbal teram lik kali iri nggal kek tak-nen yusu-o.

¹² Nde, nit meya kwarugwi mbo bosolar-e, erepma mo luwaso nggwe nggal-nen mo mboso nggwe nggal-et nit meya yugwi-ge erepma mbo boso-o.

¹³ Ineidtak-nen inlirak enabuwa kagwi iri nggal-et Nagawan Indo-nen-e at ebem indi angin tubu yugwi nab-e enabuwa kaso-o.

¹⁴ Nagawan Indo-ge nir-e iri mende bem-nen ndak wat inpidnag-o luk iri-ge ar-e aru-o. At-nen-e nir-e nggweyak pem ndak wat ninpid iri na indi yebet kaso-o.

¹⁵ Nggweyakma nab-e tusuangge nggal unluk poro-t woragwi-nen yusu-o. E engen isi pera sa wigak yidnag-et nde,

¹⁶ o wija-nen puk kasolar-e, pera mbosolat lak yoso-o. Ondoro na ngge me woraidnak nggal nde kwat yoso-o.

¹⁷ Alat nde, Nagawan Indo-ge at aye worak woragwi nap pem irit enabuwa kasolat, at-nen konak nak kwat onposo mende-ge ap pem lud irit pem kundugu kandugu kwat onposolat woraso iri-ge

¹⁸ Nagawan Indo-nen urul pidnak wene iri na puksa tena woragolat, at-nen enpem pidnak wene ereba na tugup lak kwat tenak woragwi nab-e irit kwat onposolat woraso-o.

¹⁹ Nagawan Indo-nen-e aid arem iri me tena unpuruk woralat, ar-e yi mende ndi mende oboksa tena woraso nagawan-nen yusu-o.

²⁰ Kit kenmawi worak aid nap at-nen yidnak wene kologolat, kwarogolat yugwi nap wa-e. Nagawan Indo nak erembel waner-o.

²¹ Kit ndak worak kinpidnak mende aid arem woragwi at ndegel obogolat, at indi-n pidnak kwarogolat yugwi oboksa wa-e. Nagawan Indo nak erembel waner-o.

²² Kit ndak worak pidnak mende, Nagawan Indo-nen tenagidnak wi oboksa woragwi wa-e. Nagawan Indo nak erembel waner-o. Nindi wa-e. Nagawan Indo nak erembel wani-o!