NDAK WIRIDNAK WENE 9 - Nanduk Ngget Tul Pidnak Wene

Mbal Pem Nagawan-nen Nu imin urul yak tidnak wene 9:1-17

¹ Mbal Pem Nagawan-nen Nu elirak inmin imbiringgat tak onposolat-nen yosolar-e: ”Kit-nen wigarak yi wi ndi wi wolmakluk, kit-nen wigarak konoworak konmborak kwarat wigak mag-o.

² Nde, towe oboksa min keyane min urugup worak erep oboksa-nen na kat kaye kagolat wolma-o. Nde, ereba oboksa-ge kat kinggem nak wolma-o.

³ Nggweyak pem yak yoso mende oboksa kat norak mende kwat yid iri na nggal-et, towe mena min urugup worak oboksa ereba-ge kat-nen nanokluk, wok kurusu-o.

⁴ Alat nde, mondok misik mesag-et nak perak mondok norak pug-o. Nde, iri-ge unluk woragwi iri-ge eneyabi arem woraso me, uno eyabi parugu iri-ge mondok norak pug-o.

⁵ Nde, ap-nen na irit, ndak worak pidnak urugup worak mende-nen na irit, ap worogola-ge, an-nen at ebem wene mbarosolar-e, mondok wat ma-o.

⁶ Nde, ab-e an nebage worak, an nggal-et ndak ndag-et ndak wiridnak me, ta-nen nde ap worosola-ge, ap erep-nen-e at na wuruwar-o.

⁷ Kit-nen wigarak yi wi ndi wi wolmak-nen kit-nen wigarak konoworak konmborak kwarat mag-o” luk yak indij-o.

⁸ Mbal Pem Nagawan-nen Nu min at elirak min yak ondosolar-e:

⁹ ”Yawo-ge an-e lugud tak purak puk urul mbi yak kondosolar-e, kit min kit-nen wigarak min

¹⁰ towe mena nde, urugup worak nggweyak nggwe woraso oboksa nde kinmin e koma wi arem-nen kenangga waigep oboksa kenmanggim-et watsa urul pusu-o.

¹¹ An-nen kit kinmin urul pusu-ge yu-o: urugup worak uruk woraso mende oboksa yawo kwarid yu nggal, yi-nen lak tak kunpuwa-ge mondok lag-o. Yi-nen na o yu na mondok lak tak puwa bug-er-o luk owak mbarak pusu-o.

¹² Uruk woraso urugup worak min kit min kinmin urul pusu yu ndemerer-o luk peraboklug-e, yenggerak purak mende mbi pimin-o.

¹³ ’O yu-ge mondok lak tak pimin pug-o’ luk yid na ndemerer-o luk yenggerak poboklug-e, an-nen yelepma-ge nggan nggan pem pusu-o.

¹⁴ Pempa an-nen nggan nggan mbal muruk tak posola-ge, yelepma iri yal yosola, kagolar-e,

¹⁵ an-nen kit na irit, urugup worak mende oboksa na irit, yi-nen-e tuguruk lak tak kunpuwa bug-o luk owak mbara yak kindigi na nindi yebet yebet tak woramin-o.

¹⁶ Yelepma na nggan nggan pem yarosola-ge, an-nen yik karug-e, an-e urugup worak nggweyak ma woraso imin urul owak mbara pigi iri na-t nindi yebet kamin-o.

¹⁷ Yelepma iri-ge urugup worak nggweyak ma woraso oboksa yi-nen lak tak kunpuwa bug-o luk owak mbara urul yak kindigi iri na ndemerer-o luk yenggerak purak pidnak-nen yusu-o” luk yak indij-o.

Nu elirak inmin kwariga wene 9:18-29

¹⁸ Nu elirak e koma wi iri na arem-nen kenangga wiga-ge Sem min Am min Yapet min-o. (Nde, Am iri-ge Kanan eid.)

¹⁹ Nu elirak kenan ya-ge yi ap ndi ap yi wi ndi wi worali yeba oboksa onmbo enlemwag-o.

²⁰ Nu iri-ge yabu wanoso nap me, nanduk nandug-e at-net yabu wanuruk, anggut wi yagamu-o.

²¹ Nde, Nu na-ge anggut engen ereba nuruk yarig-e, indi nden kamu-o. Nde, indi nden kaidnak me, Nu na-ge sum yonggora keya buruk, inggiri koro ndesa ama sum-nen wiridnak o lije iri na me mbinggirik woragij-o.

²² Nde, mbinggirik worasoma, Kanan eid Am na-nen yik kagaidnggal-e at eid Nu na-ge sum we inggiri koro nderak karuk yarik, mborosolar-e, anggamtak mberen ereya na yak indij-o.

²³ Yak ondosoloma-ge, Sem min Yapet min-nen-e sum nggok wigak tak misik wigara enndakmbe bem onmbol nggwe mberak puruk, onmbol nggwe nden nden o ma na nggogolar-e, ineid na-ge sum iri na-nen tambera piga-o. Nde, iri kwarogolar-e, ineid inggiri koro nderak iri na kul naru, enlengen-e wanduk tak nak-nen yirik piga-o.

²⁴ Nde, Nu na-ge indi nden kagaid iri na tuguruk indi ondolma yosolat-nen at ambara labo iri na-nen at kwat ibid ereba na kuluruk yarik,

²⁵ at-nen yosolar-e: ”Kanan iri-ge imbiri lamut mag-o! Nde, at iri-ge mondok anggamirak mumnggup manggi mondok wolmag-o.

²⁶ Nagawan Indo Sem Ambal Pem Nagawan nak erembel wanuwag-o! Nde, Kanan iri-ge Sem mumnggup manggi indipma wolmag-o.

²⁷ Nde, Mbal Pem Nagawan-nen Yapet na imbiringgat nambena wok tosolar-e, at wolmomtak sa terak nggok tak irit puwag-o! Nde, at-nen wigarag-e Sem-nen wigarak enmberek lambuksa wolmag-o! Nde, Kanan iri-ge Yapet indipma mumnggup manggi wolmag-o” luk yij-o.

²⁸ Nde, Nu na-ge yi kobong yid ombol nggwe-ge olengen tiga ratus lima pulu (350) irit worarug-e,

²⁹ olengen sembilan ratus lima pulu (950) bem wat yij-o. 10:1-32 Pasal 10 yu arem-e Nu elirak Sem min Am min Yapet min-nen wigarak unnu worasu-o.