NDAK WIRIDNAK WENE 8 - Nanduk Ngget Tul Pidnak Wene

Yi leyok yid wene 8:1-19

¹ Nde, Mbal Pem Nagawan-nen-e Nu min towe mena oboksa Nu imin e koma wi wirid iri na arem worasu ereba na-ge meme rak inpigit lag-o. Are, indi-ge enpem-et woralar-e, Mbal Pem Nagawan-nen-e obube puk kujwakluk obube rak pamu-ge, obube-nen puk kasolar-e, yi na-ge eberek yil mboso kwat yij-o.

² Yi lusu nggweyak arem-nen na teram nggwe-nen na pilanil lobok yid na-ge ndombon yosolat, eberek yosolar-e, talme mbusu iri na min pok yosolar-e,

³ seratus lima pulu (150) tarem worarug-e, yi kobong yid na-ge siyak eberek eberek mboso tel kwat yij-o.

⁴ Eberek eberek mbosolar-e, waneya-ge tuju, nde, tanggal tuju belas iri bem-e e koma wi iri na-ge o ndobo worak Ararat ereba me ndobo misik pem lud yil mbij-o.

⁵ Yi na eberek eberek mbosolar-e, tanggal satu, waneya sepulu iri bem-e ndobo pidsa anggul nam yil lobok yij-o.

⁶ Nde, empat pulu (40) nene lug-e, Nu-nen-e o iri na papalo tu kuwarak purug-e,

⁷ towe misik sugom nggal iri na wirik pij-et nde, tuguruk lobok yigit lak, we ereba nak pubu waring tenak worasoma, yi na mondok eberek yij-o.

⁸ Towe nanduk wirik pid iri na lobok yigit lag-et worala-ge, Nu-nen-e yi na-ge eberek yid, lak? Are, kobong tag-et worasu-a? luk aru yurak pem-e towe merepati nggwende nggal misik wirik pij-et nde,

⁹ yi na-ge nggweyak oboksa yemndak worasola me, pak yurak meya ala karuk, tuguruk lobok yosola, Nu-nen-e inggi mbepme nggwe wirik parik, towe na-ge waga ma bij-o.

¹⁰ Iri luk, yi na eberek yuwak memet tuju nene lug-e, towe na-ge tuguruk wirik pij-o.

¹¹ Wirik parikmu, towe na-ge keyama nggwe-ge e saitun angga ki mbi mbara emndam nggoksa waruk lobok yij-o. Iri kwasa waruk lobok yosoloma-n perak nde, Nu-nen perasolar-e: ”Yawo perak nde, yi-ge eberek yamu kagi” luk yebet kagaij-o.

¹² Yi na eberek yosola memet tuju nene lug-e, tuguruk towe merepati nggwende nggal na wirik pij-o. Nde, towe iri na wirik pamu-ge, tuguruk lobok yigit lag-o.

¹³ Nu na ndet luk olengen enam ratus satu (601) pem, nde, tanggal na satu, waneya na satu iri bem-e yi kobong tak woragid iri na-ge abu abu eberek luk, larok yij-o. Iri alama-ge, Nu-nen-e o ngguwa menggesa keya buruk, lombonosoma-ge, nggweyak oboksa lerak lok tak irit kagaij-o.

¹⁴ Nde, tanggal dua pulu tuju (27), waneya misik worak puruk, misik iri bem-e yi eberek yosolat, nggweyak oboksa amburu lorok luk keya bij-o.

¹⁵ Iri yosoloma, Mbal Pem Nagawan-nen Nu yak tosolar-e:

¹⁶ ”Yawo-ge kat min kogwe min kat kelirak onkwela inmin, kit oboksa kenangga mber-o.

¹⁷ Nde, towe mena nggok-nen marik-nen nin tak nan tak oboksa kwarat yosolat yi wi ndi wi wigak makluk, waga mbepme wirik per-o” luk yak tij-o.

¹⁸ Yak tosoloma-ge, Nu ogwe min at elirak onkwela inmin-e e koma wi iri na arem-nen kenangga mbiga-o.

¹⁹ Kenangga mbogola-ge, towe mena sil waro oboksa, erem lombok pid puk kenangga mbepme mbirij-o.

Nu-nen wam wosa emben Mbal Pem Nagawan wok tid wene 8:20-22

²⁰ Nu-nen-e Nagawan Indo amanggim wam mbara kan purak ondoro konurug-e, yi towe ndi towe oboksa enggep lombok min wam nin tak nan tak nalma mende oboksa enggep lombok wosa mbara emben Nagawan Indo wok tosolat, mbara kan pij-o.

²¹ Kan pamu-ge emben konak iri na-nen Nagawan Indo indi alen tak posola karuk, Nagawan Indo indi-nen perasolar-e: ”An-e abog-e it-nen kwatli iri-nen ndowaga-ge nggweyak ma yu-ge mondok imbiri lamut tak pimin pug-er-o. Nde, it nggweyak ma nap yu-ge marikmu-net inndi-ge meya nak yebet kagwi iri-ge an-e naru-t me, yawo urugup worak oboksa lak tak pigi yu nggal-e abog-e mondok kwarimin pug-o.

²² Nde, o nggweyak yu worasola-ge, uwi yakolat, ebe mbarogolat kwat tenak wolmar-o. Iri-nen toro na wolma-t, kibi na wolma-t, o kibi na mbud yik tenak woralat, o sumbat na mberenak woralat, kubu-nen lengge-nen irit kwat tenak wolma-o” luk peragij-o.