NDAK WIRIDNAK WENE 7 - Nanduk Ngget Tul Pidnak Wene

Yi kobong yil laidnak wene 7:1-24

¹ Nagawan Indo-nen Nu yak tosolar-e: ”An-nen kasolar-e, kat karik karag-et nak an nindi-n pidnak kwarosola keyasu-o. Iri bem-e kat kogwe min kelirak onkwela inmin-e kit nak ndigi ndegesa e koma wi wirigen iri arem nggwer-o.

^2-3 Waruk nggosolar-e, towe mena yengge wam norak mende-ge enggep lombok wanosolar-e, misik enggeb-e kusi-ge tuju, kowak na tuju iri nggal kwasa enggep lombok oboksa iri kwat kwat nak wanurag-o. Alat nde, norak puk mende ala-ge, enggep lombok wanosolar-e, misik enggep-nen kusi min kowak min, misik enggep-nen na iri nggal-et kwasa wanurag-o. Iri kwarugun iri-ge towe mena yengge wam oboksa yi-nen lak tak pigit lak, are, nggweyak ma yu tuguruk wigak makluk kwarugun-o.

⁴ Nde, an-nen ndak worak pigi mende urugup worak iri na oboksa lak tak puwakluk talme mberak pumu, pok yigit lak, nok tenak kubu-nen lengge-nen empat pulu (40) tarem wolmomtak na mberak purag-e yawo-ge tuju nak nene luk mberak pimin-o” luk yak tij-o.

⁵ Yak tosoloma-ge, at Nu na-ge Nagawan Indo-nen yak tid iri na ndak ndag-et kwarij-o.

⁶ Yi-nen yi wi ndi wi yimndid tarem iri-ge Nu-ge olengen enam ratus (600) worala tarem-o.

⁷ Nu min ogwe min at elirak onkwela inmin-e e koma wi wirid iri na arem enkap ndaguwakluk nggwiga-o.

⁸ Nggogola-ge, towe mena yengge wam oboksa-ge nunggwi na irit, nunggwi buk na irit, enggep lombok, kusi min kowak min lombog-e

⁹ abalombok-nen e koma wi iri na arem Nu imin nggwij-o. Nde, iri kwarid iri-ge Mbal Pem Nagawan-nen yak tid iri na ndak ndag-et kwarij-o.

¹⁰ Iri luk, tuju nene lug-e, yi-nen o nggweyak oboksa yimndij-o.

¹¹ Nde, iri tarem iri-ge Nu urug-e olengen enam ratus (600) worasoma-o. Waneya misik worak puruk, misik arem tanggal tuju belas iri bem-e yi lusu nggweyak arem-nen pilak yil lobok yosolat, teram nggwe-nen na yi tu kuwak yosolar-e,

¹² talme nak kundugu kubu-nen lengge-nen woralar-e, empat pulu (40) nene yij-o.

¹³ Nde, iri tarem-e Nu ogwe min elirak kenan, Sem min Am min Yapet min it onkwela inmin-e e koma wi iri na arem ndegera nggwiga-o.

¹⁴ Nggogola-ge, towe mena sil waro oboksa erengen kege lak na irit, erengen kege worak na irit, nggok min marik min oboksa it inmin-et nggwij-o.

¹⁵ Nggosola, urugup worak mende nin tak nan tak enggep lombok kusi kowak nak e koma wi iri na arem-et Nu imin-et nggwid iri-ge

¹⁶ Mbal Pem Nagawan-nen yak tid iri na ndak ndag-et kwarij-o. Ndegera nggogola-ge, Nagawan Indo-nen tu na watsa lerak pij-o.

¹⁷ Ngguruk woragola, talme na kundugu mbosola 40 nene lug-e, yi na kobong yil teram-et lasolar-e, e koma wi iri na-ge yi ombol pem laring yij-o.

¹⁸ Nde, yi na kobong kobong teram nggal-et lasolar-e, o iri na-ge yi ombol pem laring laring mbirij-o.

¹⁹ Nde, yi na mondok kobong yi teram mberam abu-t lasolar-e, ndobo yot mot nggok mendak ereba na yimndij-o.

²⁰ Nde, yi na abu mondok kobong yosolar-e, ndobo pidsa yumnduruk, ndobo kuri-nen watsa terak menna abam nggwe lagaij-e tuju meter irit lagaij-o.

^21-23 Lasolar-e, nggweyak ma yu me woraso urugup worak mende oboksa, ap min towe mena sil waro oboksa, nggok-nen marik-nen oboksa-ge Mbal Pem Nagawan-nen yi bem-nen lak tak inpij-o. Alat nde, Nu min at imin e koma wi iri na arem woraiga ereya na nak lak tak inpigit lag-o.

²⁴ Yi na kobong luk, kobong tak nak woralar-e, seratus lima pulu (150) tarem irit woragij-o.