NDAK WIRIDNAK WENE 6 - Nanduk Ngget Tul Pidnak Wene

Nggweyak ma nap-nen meya kwariga wene 6:1-8

¹ Ap kwarat luk, yi wi ndi wi nggweyak urugwe ombol wigak luk woragolar-e, li kwami ndet onpogolat worakmu-ge,

² Mbal Pem Nagawan elirak-nen yik eneyagolar-e, mondok ndugum kigirik nak yik eneyagoluk, it Mbal Pem Nagawan elirak ereba na-nen-e it inndi-nen nak nggweyak ma nap-nen ndiridnak ndugum ereba na yena wanogolat woraiga-o.

³ Iri kwarogola, Nagawan Indo-nen yosolar-e: ”Nggweyak ma nap yu-ge unluk nak woralik nalik wolmomtak iri-ge an-e mondok nisili-o. It yu-ge urugup worak mende mondok wat momtak mende-net nde yili-o. It yu-ge yawo kuri-nen it unluk woragolat olengen seratus dua pulu ombol nggwe nggal wolmomtag-e mondok lag-o” yij-o.

⁴ Nde, ereya tarem min ombol nggwe min-et ab-e, ap-net nde, ap nggal-e lak. Are, yok nggok mondok nggok pare terak minik woraiga ereba-ge, Mbal Pem Nagawan elirak-nen wanidnak nggweyak ma kweyap ereba-nen nderag-o. Nde, ap yok nggok ereba na-ge wim wari enanggu onpok worak irit nanduk-nen woraiga-o.

⁵ Woragola-ge, Nagawan Indo-nen-e ap ereba-ge it inndi-ge meya kwarurak nak kobong tak, it-nen na yi meya ndi meya nak kwat tenak woragola, eneyasolat woragij-o.

⁶ Iri kwarogola karug-e, Mbal Pem Nagawan-nen perasolar-e: ”Niri nera-nen it yu-ge ndak worak unpuruk nggweyak ma yu me inpigi-a?” perasoluk, isilepma kwarat yosolat-nen

⁷ yosolar-e: ”An-nen ndak worak pigi mende ap min yi towe ndi towe oboksa min urugup worak mende oboksa min an-e niri nera-nen ndak wirigi-o luk perasu me, mondok lak tak pimin-o” luk yij-o.

⁸ Alat nde, Nu arig-et nak Nagawan Indo alen tak posolat woragij-o.

Nu wene 6:9-22

^9-10 Nu woraidnak wene-ge yu-o. Nde, Nu elirak ap nak kenan unnu-ge Sem min Am min Yapet min woraiga-o. Nde, Nu na woralar-e, meya mbi kwarigit lak irit woralar-e, at woragid tarem ereya-ge at arig-et nak konak nap irit woragij-o. Woralar-e, Mbal Pem Nagawan imin panggarak irit woragij-et nde,

¹¹ ap erep ereba-ge Mbal Pem Nagawan erengen pem-e meya nak kwat tenak woragolar-e, ap enabuwa kagit lak, nin me nan me we enlengen nak lambu yil nogolat woraiga-o.

¹² Iri kwarogola-ge, Mbal Pem Nagawan-nen nggweyak ma yu me mbel kasolar-e, ap oboksa meya nak kwarugwi me, nggweyak ma yu me-ge meya kwarugwi mende nak kobong tak kagaij-o.

¹³ Iri ala karuk, Mbal Pem Nagawan-nen Nu yak tosolar-e: ”An-e nggweyak ma yu me worasu urugup worak oboksa mondok lak tak purak wene abu abu wat tak puruk worasu-o. O yu-ge it-nen meya kwarugwi nak-nen kobong tak me, o yu lak tak posolar-e, imin-et it na lak tak inpimin-o.

¹⁴ Nde, iri kwarimin me, kar-e e koma wi misik kondomok kamanggim-et wiri-o. Worosolar-e, arem-e kuri werep mberep konosolat, e-ge amawi worak pem nak wururag-o. Nde, wutlug-e, amburu-ge ombol nggwe min arem nggwe min ndarurag-o.

¹⁵ E koma wi iri worosolar-e, mot nggwe-ge seratus tiga pulu tiga (133) meter, nde, abak nggwe-ge dua pulu dua (22) meter, nde, mot mendak nggwe-ge tiga belas meter pem ndak wururag-o.

¹⁶ Nde, iri rak puruk, o wosarosolar-e, o ngguwa wok kebet wok ereya-ge empat pulu empat (44) sentimeter terak keya burag-o. Nde, tab-e kenan kwiri wosa wutluk, tumende-ge abare nggwe pulurag-o.

¹⁷ Nde, an-nen nggweyak ma yu me urugup worak worasu oboksa lak tak puwakluk, yi kobong tak pimin-o. Iri rak pumu, nggweyak ma yu me yi mende ndi mende oboksa wat ma-o.

¹⁸ Alat nde, an-e kat kimin-e mondok mborok tak purak puk urul pimin-o. Nde, kat kogwe min kat kilirak onkwela min-e e koma wi iri arem nggwer-o.

^19-20 Nde, kit nggogolar-e, towe nin tak nan tak ereba enggep lombok kusi min kowak min, nde, urugup worak (towe mena sil waro) ereba oboksa enggep lombok kusi min kowak min iri-ge lak tak puwa naru, waruk nggwer-o.

²¹ Kit min towe mena ereba min nonggolat wolmomtak nunggwi mende-ge oboksa waruk nggwer-o” luk yak tij-o.

²² Yak tosoloma-ge, Nu na-ge Mbal Pem Nagawan-nen yak tid iri na ndak ndag-et kwarij-o.