NDAK WIRIDNAK WENE 50 - Nanduk Ngget Tul Pidnak Wene

¹ Wat yosoloma-ge, Yusup na-ge eid imid pem mbiring yosolar-e, yip tosolat, eid erare porok nasolat woragij-o.

² Iri luk, Yusup-nen ap enmben ma naru enmben lak makluk amburu enpem ndarugwi nap ereba na yak ondosolar-e: ”Amburu Yakup ebem ndarurag-o” luk yak indij-o.

³ Nde, ap lugwinik enmben lak makluk amburu ndarugwi ndak ndak empat pulu (40) nene yiga-o. Nde, Mesira nab-e Yakup tabun puruk woragolar-e, tuju pulu (70) nene yiga-o.

⁴ Tabun puruk woragwi na woraruk ndak yosola-ge, Yusup-nen Pirayon eyabu wanugwi ap yok nggok ereba na yak ondosolar-e: ”Wene yu-ge Pirayon yak til mberer-o:

⁵ ’Ndegel koboso an neig-e wat yekluk-nen an yak norosolar-e: Kar-e mondok owak mbari-o yosola, owak mbarigirik me, an-e an neid yu-ge at-nen yapma uburak ondoro abu lid lud tak pidnak sa Kanaan wi-t yapma ibil mbereyek-nen: Ob-o. Mbiri-o yak niri-o, nab-o. Nde, an mbirimindik, neid yapma purug-e, turuguk lobok yimin-o’ ” yij-o.

⁶ Yosoloma-ge, Pirayon-nen-e: ”Ob-o. Mburugundik yapma kibimin-o luk owak mbarigen iri na ndak ndag-et kwasa yapma puruk lobok yi-o” luk yij-o.

⁷ Yosoloma-ge, Yusup na-ge eid na yapma pil mborosola-ge, Pirayon eyabu wanugwi ereba na min ap indi amburu mbarak nagawan woraso sa woragwi ereba na min Mesira iri me woragwi ap yok nggok ereba na min oboksa Yusup imin mbiriga-o.

⁸ Mborogolar-e, ogwela nde owerak nde owe owot erep min-et imin mbiriga-o. Alat nde, onowam min li marik min iri nak o Nggosen keya inpiga-o.

⁹ Ap kwarat nggweyak koma bem-nen na kura wam ombolwak pem-nen na imin mbiriga-o. Iri kwasa mborogolar-e, ab-e anggul-e nin me iyuwag-e nin me ereba yembak tak woragij-o.

¹⁰ Nde, it na-ge mbirigarik, nggandum mbato aboro mbilarugwi sa o Nggoren Atat, yi Yareren eyak ele bem mo luwaso (timur) ambigit nggwe irit wok yogolar-e, inndi puru-nen yip lenggu kamariga-o. Iri yogolar-e, Yusup-nen-e eid na tabun posolar-e, tuju nene yiga-o.

¹¹ Nde, it Kanaan woragwi nap ereba na-nen-e o Nggoren Atat iri me wok yigarik, tabun pidnak iri na karug-e, it-nen yogolar-e: ”It Mesira nap-nen inndi puru yogolat-nen tabun pugwi-ge mondok ijar-o” luk yiga-o. Nde, iri yidnak sa ala karuk, o iri me unu yarogolar-e, Abel Misiraim irit yariga-o.

¹² Nde iri-ge Yakup-nen at elirak yak indid iri na ndak ndag-et kwarogolat-nen kwariga-o.

¹³ Yakup orogak na-ge Kanaan waruk mbirigarik, Mamere ambigit mo luwaso nggwe Abarakam-nen ap yapma unpurak pem Et nap Eboron ebem onggo pid nggweyak kerep yanggo Makpela iri na me-t Yakup na-ge yapma ibiga-o.

¹⁴ Nde, Yakup na yapma purug-e, Yusup na-ge owerak min ap erep Yakup yapma pil mborosola imin mbiriga oboksa ereba na inmin-e tuguruk Mesira mbiriga-o.

Yusup-nen owerak kirimbi laksa yamuk tak inpidnak wene 50:15-21

¹⁵ Ineid Yakup iri na wat yosoloma-ge, Yusup owerak-nen yogolar-e: ”At Yusup yu-ge nit nanduk-nen lel ibige na nde mabin puruk woralar-e, onggo puwa, lak?” luk yiga-o.

¹⁶ Yogolug-e, it-nen Yusup eram wene wirik pogolar-e: ”Nit nineid wat yigit lak woralar-en

¹⁷ kat kamanggim wene posolar-e: ’Kat kowerak-nen nanduk kat lel kibidnak iri-ge mondok kamberam tak purag-o. Kindi yeberak wolmomtak pug-o yak kiridnak ala karuk, nit nineid-nen erembel wanoso Mbal Pem Nagawan ndegel ubugwi nap nit-nen yak kitli-o. Nab-o. Nit-nen kat kimin meya kwarogolat woraige na-ge kat-nen kindi yeberak wolmomtak pug-o. Mondok lak tak pi-o’ iri luk kowerak-nen yiga-o” luk ap na-nen yak tosola, kolosolar-e, Yusub-e yip kwarat yij-o.

¹⁸ Iri lug-e, owerak na Yusup eram lobok yogolar-e, entare nggwe Yusup eram tud yogolat-nen yogolar-e: ”Nir-e kat ndegel kubugwi nap-nen yili-o” luk yiga-o.

¹⁹ Iri yogola, Yusup-nen yak ondosolar-e: ”An-e Mbal Pem Nagawan nggal-e lak me, kir-e kwiye kali-ge meyog-o.

²⁰ Kir-e an meya rak nubuwakluk wene mbarigeb-et nde, ap yawo worali yeba inmiri yuwakluk, Mbal Pem Nagawan-nen-e meya kwarigep iri na-ge nden yaga konak kwarurak nde kwarak pij-o.

²¹ Iri ala-ge, kir-e kunmud kudtak pug-o. An-nen-e kit min kinlirak min-nen ukwe mende-ge wog-et kondosolat woramin-o” luk wene konag-et yak ondosolat worala-ge, owerak na-ge inndi yamuk yogolat, inndi-ge at ebem nak pogolat woraiga-o.

Yusup wat yidnak wene 50:22-26

²² Nde, Yusup na o Mesira iri me-t owe owot inmin woralar-e, olengen-e seratus sepulu (110) irit woragij-o.

²³ Nde, at woralar-e, at ambara Eperaim iri na ndagid-nen nderak na erengen-e kagaij-er-o. Iri-nen Manase ambara Maket-nen ndagid na at ambik elirak nggal nggok tak inpij-o.

²⁴ Woralar-e, at-nen owerak yak ondosolar-e: ”An yawo-ge wat yurag-e panggorak worasu-o. Alat nde, Mbal Pem Nagawan-nen-e kir-e ndegel konposolat, o yu me-nen lit kunpuruk, ’Abarakam min Isak min Yakup min wok indimin-o’ luk urul yak ondosolat owak mbarid sa iri na me-t kinpil mburuwa-o” luk yak indij-o.

²⁵ Iri yak unduruk yarig-e, owe owot yak ondosolar-e: ” ’Mondok irit mul-o’ luk owak mbarer-o. Kit nde Mbal Pem Nagawan-nen lit kunpuruk o iri me nde mborogolar-e, an norogag-e mondok waruk mbururag-o” yak indij-o.

²⁶ Wene iri yak unduruk woralar-e, Yusup na-ge Mesira-nen wat yij-o. Nde, Yusub-e olengen-e seratus sepulu (110) woraruk wat yij-o. Wat yamu-ge emben me naru, emben lak tak poso amburu ndara keya buruk ap wat yogola inpil nggurak ondoro labu mbara kona pidnak mbi arem pil nggwiga-o.