NDAK WIRIDNAK WENE 49 - Nanduk Ngget Tul Pidnak Wene

Yakup-nen wene nanu at elirak yak indidnak wene 49:1-28

¹ Iri luk, Yakup-nen at elirak yeba na wene mbo unpuruk-nen yak ondosolar-e: ”An neram panggosa yu me ndok werer-o. Nde, yawo an-e abok kit kenpem mburak mende mbi yak kindimin-o.

² Yakup elirak yu-ge wa-e. Ndok wurugupndik, kineid Isarael nene koler-o.

³ Uruben kar-e an nambara manggiya mondog-et namawi min-nen nderak-nen An nilirak yeba ennggendumu mondok kek tak, mondok kamawi worag-e kat-net yusu-o.

⁴ Kar-e yi nggal pilak nak yosolar-e, kar-e an-nen imin nene yoso ndegel noboso kwe iri na imin nene yigendik, keid nene yoso ondoro na-ge emben to rak pigen me, kar-e ebe lak mende kwat yigen-o.

⁵ Simeon min Lewi min-e owe owot-nen yili-o. It ensan-e ap undugwi mende-n yusu-o.

⁶ Ir-e insilepma yili iri bem-net ap ondogolat ondomok inndi alen yurak pem nak lembu wam emengen mbara tu mbururak meya rak pogolat yugwi me, an-e it ndok wutluk wene mbarogola na enne erep wanimin pug-o. It ndok worogola na ennggendumu nggwimin pug-o.

⁷ Insilepma mondok kwarat me, insilepma-ge imbiri lamut mag-o. Enlengen lamburak nak undugwi me, it-nen insilepma mondok kwarat yugwi iri-ge imbiri lamut mag-o. An-nen-e ir-e yi ap ndi ap ennggendumu nggilara wirik inpimin-o.

⁸ Yewura kar-e kat kuwim nap undugun nggola yemndak onposola-ge, kat kowe kowot-nen-e kerembel wanogolat, kat keram tebe yuwa-o.

⁹ Yewura kar-e singa ndakngge sujwe-nen emnde nuruk, at nene yoso sa mbutluk, kwaning yosoma-ge, ap-nen-e sil kagwi buk iri nggal-nen yusu-o.

¹⁰ Yewura-ge nagawan-nen tena woragwi wangun tena wolma-o. At-nen wigarak-nen o tena woralar-e, pem-et woralik nalik irit wolma-o. Worala-ge, yi ap ndi ap oboksa-nen-e ar-e ombol nggwe yidnak pem tol eram pogolat, at indipma nak tebe rak wolma-o.

¹¹ At egelerai wam marig-e anggut eremwak konak pem yilik puwa-o. At-nen-e usum-e anggut amburu bem maruwa-o. Nde, abare sum-e anggut amburu eneyabi nggal iri na bem maruwa-o.

¹² Anggut amburu nok tenak mbot erengen-e mep tam yosolat, nde, eyag-e sapi wam agamo amburu nok tenak mbot mbek yusu-o.

¹³ Nde, Sebulon-e yi koma eyak pem wolma-o. Worala-ge, yi koma kwarar-e at woraso sa ngguwasolat wolma-o. Nde, at uwi nggweyag-e kuri-ge Siron pem irit wat tak wolma-o.

¹⁴ Nde, Isakat iri-ge kelerai wam amawi worak nggal kud turuk noso angin worak mende enggendumu nggal mbinggirik irit woraso-o.

¹⁵ Nde, at wolma sa iri yik kagolar-e, konak lombok yik kagolat, nde, o siri iri na konik konak irit yik kagola-ge, ndegel unpugwi nap nggal tak puruk, insilepma min yabu watsa ebem pogola, lembesa wanosolat, angin worak mende kud tosolat endak mbe turuk ma-o.

¹⁶ Nde, Ndan kar-e Isarael nap ennggendumu-nen ap enlem erep nggal kwat luk, kat kelem nap enpem wene mbarosolat woragun-o.

¹⁷ Kar-e waro tulabiyem pak tak nggal woralat, waro lese nggal kura wam urulabiyem pak tak worasoma, kura orop mengen yilik posoma, mbilarosolat, ebem kore yidnak nab-e peleksa esaligik nggwe mboso-o.

¹⁸ Nagawan Indo wa-e. An-e kat-nen nimiri yurak irit towarak worasu-o.

¹⁹ Nde, Nggat kar-e yariya wanugwi nap-nen kebem kore yogolat wolma-t nde, kat-nen na it enpem-et nden onposolat woragun-o.

²⁰ Aset kar-e ndilagi nak woralar-e, nunggwi mende-ge Nagawan wok ondosolat woragun-o.

²¹ Naptali kar-e urusa wam ndag-et nak puburak mboroso nggal-nen yusu-o. Amarik ereba na-ge mondok konak lombok-nen yusu-o.

²² Yusup iri-ge engen yoso e yi lusum-nen miri usul irit lasolar-e, inggi angga ndogaluk kerep leget na lal nggora keya boso iri nggal-nen yusu-o.

²³ At uwim nap-nen-e at imin-e yi sa kan sa woragolat at muk kagolar-e, mare bem san pem muk kujwa-t nde,

²⁴ it yik eneyarok woraso Mondok Amawi Ambik Yakup Embal Pem Nagawan Isarael kura buruk Noso, iri na-nen yongga worosola, Yusup iri-ge pem inggi abis lembe irit woralat, esan-e pem irit mendak wolma-o.

²⁵ Keid Embal Pem Nagawan-nen yongga-t kurusu-o. Mondok Amawi Worak Mbal Pem Nagawan-nen imbiringgat wok korosolar-e, mbal nggwe-nen talme pem-nen na imbiringgat wok korosolat, nggweyak arem nggwe-nen na konggweyak amburu rak posolat, keli marik min sapi wam min,

²⁶ nggandum mbato min engen kerengen isi poso rak kobosolat ma-o. Ndobo amburu nanduk-nen konggweyak amburu rak poso iri-ge worasu-t nde, iri-ge marik-nen yusu-o. Alat nde, Mbal Pem Nagawan-nen imbiringgat tak kubuwa-ge mondok terak minik-net yusu-o. Nde, imbiringgat iri oboksa-ge Yusup anggul pem mbuwasolat, owe owot ennggendumu-nen-e at nak nggok ija woraso Yusup imbiriwak pem mbuwasolat mag-o.

²⁷ Nde, Mbenyamin iri-ge serigala ndakngge isilepma worak nggal, kuplila-ge at naso mende wosa nuruk, kubu-ge tembesa nin me nan me rak poso iri nggal-nen yusu-o” luk yij-o.

²⁸ Nde, iri-ge it Isarael nap enlem duabelas iri-net yili-o. Nde, wene yeba-ge ineid Yakup-nen mbereyekluk wene nanu bem elirak wiwa-o yak ondosolat, at elirak enarik tak lombok yak endamu-o.

Yakup wat yamu yapma pidnak wene 49:29–50:14

^29-30 Iri lug-e, Yakup-nen at wat yosoma-n kwat uburak wene elirak yak ondosolar-e: ”An-e yanem nomborak wat yiga nggal-et wat yimin-o. Nde, wat yumu-ge, nomborak yapma inpidnak sa kerep yanggo Makpela iri-ge Mamere ambigit mo luwaso (timur) nggwe Kanaan nggweyak pem iri na me-t yapma nuburag-o. Nde, nggweyak iri-ge ap yapma unpurak pem Abarakam-nen Et nap Eboron iri ebem nggweyag-e kerep yanggo iri min onggo pamu-o.

³¹ Nde, iri na-ge Abarakam min ogwe Sara min Isak min ogwe Iripka min yapma inpikma-o. Nde, iri me-t an-nen na Lea yapma pukmu-o.

³² Nde, nggweyak min kerep yanggo iri min-e Et nap enpem onggo pidnak-nen yusu-o. An na iri me-t yapma nuburag-o” luk yij-o.

³³ Nde, Yakup na wene at kwat uburak wene iri na ndegera yak undurug-e, mbiring yosolar-e, irit wat yij-o.