NDAK WIRIDNAK WENE 48 - Nanduk Ngget Tul Pidnak Wene

Yakup-nen Eperaim min Manase min imbiringgat tak inpidnak wene 48:1-22

¹ Nde, misik tarem-e Yusup-nen kolel kagidnggal, ”Eid na-ge kugwi meya sa worak worasu-o” yogola kulurug-e, ambara mberen Manase min Eperaim min inmin lug-e Yakup kil lobok yij-o.

² Yakup na worasoma kulidnggal, ”Lag-o. Kambara Yusup lobok yusu-o” yogola kuluruk yarig-e, amawi luk lembesa nene yoso sa kore yij-o.

³ Koreyak worasolat-nen Yakup-nen Yusup yak tosolar-e: ”Mbal Pem Nagawan Mondok Amawi Worak iri na-nen-e o Kanaan wi Lus iri me-nen an nimbiri bem nam luk, imbiringgat tak nobosolat-nen

⁴ yak norosolar-e: ’Kat-nen wigarak ap enlem kwarat maklug-e, kat kilirak-nen nderak koworak, komborak kwarat wok kirimin-o. Nde, o yu-ge kat-nen wigarak-nen pem irit woralik nalik wolmakluk wok indimin-o’ luk yak nirij-o” luk yij-o.

⁵ Nde, wene na erep kundig-et yosolar-e: ”An o yu me wok yigit lak ma o Mesira yu-nen nderak kat kilirak Eperaim min Manase min ya-ge an nilirak-net yili-o. An nambararak Uruben min Simeon min nggal-net yili-o.

⁶ Nde, kat-nen tuguruk kilirak ndet unpugun iri-ge an nilirag-e lag-o. Iri-ge kat kondomok kilirag-er-o. Nde, it-nen mining angge wanogolar-e, Eperaim min Manase min-nen wok unduwa-o.

⁷ Nde, an-nen iri kwarusu iri-ge kiya Arakel amanggim-et kwarusu-o. Nde, an-e Mesopotamia-nen tuguruk lobok yosoma, kwe Arakel na-ge o Kanaan nggweyak pem wat yamu, nindi puru min-et Eperata mburugwi tu mbanggoma yapma pigi-o” luk yij-o. (Nde, Eperata-nen-e iri me-ge erepma-ge lag-o. Nde, Eperata na-ge yawo-nen-e Mbetleyem yugwi-o.)

⁸ Nde, Yakup-nen Yusup ilirak ereya na eneyarug-e: ”Li ya-ge tarag-o?” luk kin wanij-o.

⁹ Iri yosola, Yusup-nen yosolar-e: ”Ya-ge an nilirak Mbal Pem Nagawan-nen an o Mesira yu worala wok nirij-e yar-o” luk yij-o. Yosoloma, Yakup-nen yosolar-e: ”An-nen imbiringgat tak enpeyek-nen neram panggosa inpil lobok yi-o” yak tij-o.

¹⁰ Nde, Yakub-e abu indi worak yosolat, erengen-e kubulu yidnak me, iniyudtak meya-nen kwarij-o. Yusup-nen ilirak ereya na-ge Yakup eram panggosa inpil lagaij-o. Lasola-ge, Yakup-nen-e paluksa wa yak ondosolat-nen

¹¹ Yusup tak tosolar-e: ”An-nen perasolar-e, kar-e mondok keyamin pug-o luk keberasolat woragi-t nde, yawo-ge Mbal Pem Nagawan-nen: ’Erare ki-o’ yamu, kat kilirak inmin-et keneyasu-o” luk yij-o.

¹² Yosoloma-ge, Yusup-nen ilirak mberen ya na-ge Yakup uruma-nen wud tak unpurug-e, ar-e eid eram erare nggwe tud yij-o.

^13-14 Iri rak purug-e, ilirak mberen ya na-ge Yakup eram panggosa onposolar-e, Eperaim labo iri na-ge Yakup inggi kware ambigit nggwe ibij-o. Nde, Manase manggiya iri na-ge inggi kigit ambigit ibij-o. Alat nde, Yakup-nen tena onposolar-e, inggi kigit Manase ambigit iri na-ge lugudsa Eperaim na anggul tena bij-et nde, inggi kware na-ge manggiya Manase na anggul tena bij-o.

¹⁵ Iri rak unpuruk, Yusup na imbiringgat tak onposolat-nen yosolar-e: ”Mbal Pem Nagawan iri-ge nomborak Abaram min Isak min-nen erembel wanugwi Nagawan Indo-nen yusu-o. At iri-net an-e pem lit niyuruk noso-net, yawo na lit niyuruk nusu-o.

¹⁶ Lak tak nuburak inggem-nen nimiri yoso aid nap iri-nen-e li ya-ge imbiringgat tak unpuwag-o. Li ya enpem-nen an nunu min Abarakam unu min Isak unu min-e ki irit wolmag-o. It ya inlirak-nen li kwarat ndakola, it-nen wigarag-e kwarat mag-o” luk yij-o.

¹⁷ Yakup inggi kigit nggwe na-ge Eperaim labo na anggul tena bidnak ala karuk, siyak isili lug-e, Yusup-nen eid inggi kigit nggwe na-ge Eperaim anggul pem-nen waga Manase anggul pem peyekluk eid inggi tena bij-o.

¹⁸ Tena bosolat-nen eid yak tosolar-e: ”Kat iri kwarusu-ge meyog-o. La manggiya nderag-e yu-o. Kinggi kigit nggwe iri-ge Manase anggul tena burag-o” luk yak tij-o.

¹⁹ Alat nde, Yakup na-ge larok yosolat-nen yosolar-e: ”An-e naru-o, nambara-o. An-e naru-o. Nde, Manase-ge at amawi-ge nggok yosolat, at-nen wigarak na ap enlem nggok irit kwat ma-o. At owot yu-nen wigarak na ap enlem nggok nak kwarat ma-o” luk yak tij-o.

²⁰ Yosoluk iri tarem-et tuguruk li ya na imbiringgat tak onposolat-nen yosolar-e: ”Isarael nap-nen ap inmbiringgat tak onpogolat-nen yogolar-e: ’Mbal Pem Nagawan-nen kar-e Eperaim nggal Manase nggal tak kubuwag-o’ luk yuwa-o” luk yij-o. Iri nggal kwasa owot Eperaim na nde Yakup-nen-e manggu nderak Manase nggal tak posolat kek tak ibij-o.

²¹ Iri luk Yakup-nen Yusup yak tosolar-e: ”An-e abu wat yurak panggo yigirik neyasu yur-o. Alat nde, Mbal Pem Nagawan-nen yongga kondosolat tuguruk konmborak woragwi sa wok kunpuruk mburuwa-o.

²² Amori nap ininggem-nen nesan pem, neyalawi bem-nen mengga wanigi o Sikem nggweyak amburu worak iri-ge kat kowerag-e wok indigit lag-o. Are, kar-et wok kurusu-o” yak tij-o.