NDAK WIRIDNAK WENE 47 - Nanduk Ngget Tul Pidnak Wene

Yakup Pirayon eram wok yidnak wene 47:1-12

¹ Nde, Yusup-nen owerak ereba na ennggendumu-nen ap enpe lima inmin lug-e, nagawan eram wok yiga-o. Wok yigarik-nen Pirayon yak tosolar-e: ”An neid min nowerak min Kanaan wi-nen lobok yogolar-e, kambing wam min lomba wam min sapi wam min enaringgi enarengge oboksa waruk lobok yigarik, yawo o Nggosen worali-o” luk yak tosolar-e,

² owerak inmin mbirid ereya na-ge nagawan imbiri bem-e: ”Lobok yiga ereb-e it yar-o” luk nuk eneyagaij-o.

³ Nuk eneyasoloma-ge, nagawan na-nen it kin wok onposolar-e: ”Kir-e no yabu wanugwi-o?” yosoloma-ge, it-nen yogolar-e: ”Nir-e nanduk nonmborak ereba-nen mamarak mondok wam nak ndugurugwi-o.

⁴ Nde, o Kanaan iri me-ge nogoro mbud yarik me, wam norak tusuangge abu umbuk yidnak ala karuk, nir-e o yu me wolmomtak abu lobok yige-o. Iri ala-ge, nab-o. ’O Nggosen irit wolmer-o’ yak nindi-o” luk yak tiga-o.

⁵ Yak togolikma, nagawan-nen Yusup yak tosolar-e: ”Yawo-ge keid min kowerak min o yu me nde worali-o.

⁶ O Mesira wi yu oboksa-ge kit kondomok kunuwi nggal-et yik kagolat, ir-e o Nggosen iri me-t wolmag-o. Nde, o Mesira yu-nen-e o konag-e Nggosen nak worasu-o. Nde, ir-e iri me-t woragola, kat-nen it ennggendumu ap mondok wam yik karok woragwi enaru nap lembena yugundik, an nowam parugu wolmakluk enpem purag-o” luk Yusup yak tij-o.

⁷ Yusup-nen na: ”An neij-e yu-o” luk Yakup na imbiri bem nuk eyasola-ge, Yakup-nen-e nagawan iri na imbiringgat tak obosola-ge,

⁸ Pirayon-nen Yakup kin wok obosolar-e: ”Kat ndesa mbigen kuri olengen-e nunggwirik worasu-o?” yosoloma,

⁹ Yakup-nen yosolar-e: ”An-e we waring tenak nak woralar-e, olengen-e seratus tiga pulu (130) nak worasu-o. Nde, an-nen nde nomborak-nen waring tenak woraiga olengen min nde ndak worosolar-e, it woraiga olengen-e ombol nggwe-t nde, an-e andi bandi nak woralat, olengen-e poro-t worasu-o” luk yak tij-o.

¹⁰ Iri yak turug-e, Yakup-nen Pirayon imbiringgat tak puruk, mbirij-o.

¹¹ Nde, Yusup-nen eid min owerak min pem Mesira wolmakluk yongga indij-o. O iri me-nen nggweyak mondok konag-e o Aramses koroga, nagawan-nen yidnak ndak ndag-e it-nen mondok pem it onnggweyak wolmakluk wok indij-o.

¹² Nde, Yusup-nen-e eid min owerak min owe owot oboksa min li marik min-et oboksa nunggwi mende wok ondosolat woragij-o.

Nogoro bem-nen kwaridnak wene 47:13-26

¹³ Nde, nogoro mondok kwiye worak mbud yosolar-e, nunggwi mende oboksa lak yij-o. Iri yosolar-e, Kanaan woragwi nap min Mesira woragwi nap min-e nere-nen ndowaga ndeyak irit woraiga-o.

¹⁴ Iri yogolar-e, ap-nen nggandum mbato ereba na onggo bogola-ge, Yusup-nen mbato onggo pidnak tol-e nagawan woraso sa ndok wosa posolat woragij-o.

¹⁵ Iri kwasa onggo perenak mbot, Kanaan min Mesira min tol-e mondok ondoro yamu-ge, Mesira nap Yusup eram lobok yogolar-e: ”Nir-e nere-nen mondok wat yul-o. Nunggwi mende yongga nindi-o. Nir-e tol-e mondok lak yamu-o” yak tiga-o.

¹⁶ Yogola, Yusup-nen yak ondosolar-e: ”Kit nde kontol lak nde ala-ge, nunggwi mende wok kendeyek-nen konowam wok nerer-o” yak indij-o.

¹⁷ Yosola-ge, it-nen-e onowam wok togola-ge, Yusup-nen-e kura wam min lomba wam min kambing wam min sapi wam min kelerai wam min ondolmasa-ge nunggwi mende wok indij-o. Olengen iri arem-e Yusup-nen nunggwi mende wok ondosola-ge, onggo-ge onowam pidsa wok togolat woraiga-o.

¹⁸ Nde, olengen imbirik iri na bem-e ir-e Yusup eram lobok yogolat-nen yak togolar-e: ”Yawo-ge nam-et yak kuruwog-o. Nit nontol-e mondok lak yamu-o. Nonowam na kat wok kiridnak me, oboksa kat karengge kwat yamu-o. Nde, yawo nit nenarengge kat wok kururag-e nendam-e abu lak yamu me, nit nenpe min nonnggweyak min nak perak nde worasu-o.

¹⁹ Nir-e nere-nen wat makluk keya nunpurak pug-o. Nonnggweyak na amburu lak makluk keya burak pug-o. Nonnggweyak min nenpe min onggo posolar-e, nunggwi mende wok nindi-o. Nde, nenpe min nonnggweyak min-et Pirayon arengge nak kwat makluk, wat mul naru nunggwi mende wok nindi-o. Nde, nit neneyapmu pil kudtak mbato uwi na wog-et nundurag-o” luk emengen mbariga-o.

²⁰ Iri yogola-ge, Yusup-nen-e Mesira nggweyak oboksa Pirayon amanggim nak onggo bij-o. Nde, nere mondok kwarat iri na-nen ndowaga-ge ap oboksa-nen onnggweyag-et nde onggo waniga-o. Iri kwasa onggo wanidnak me, nggweyak oboksa Pirayon arengge nak kwat yij-o.

²¹ Nde, Mesira nap oboksa Yusup-nen-e ndegel ubugwi nap kwarak inpij-o.

²² Alat nde, kwal ombo onnggweyak nak perak nde, marig-et mbi-ret onggo pigit lag-o. It perak nde nunggwi mende-ge Pirayon-nen yongga ondosola me, it-nen-e onnggweyag-e onggo wanigit lag-o.

²³ Nde, Yusup-nen it ereba na yak ondosolar-e: ”Kit kenpe min konnggweyak min-e Pirayon amanggim onggo pigi me, kit keneyapmu pil kudtak mbato uwi-ge yeba yagabok-nen wok kundusu-o.

²⁴ Nde, yakupndig-e, ogore nde ala-ge, siyag-e (seperlima) Pirayon wok togolat, nde, ereb-e keneyapmu pil kudtak uwi wanogolat, nde, ereb-e kit konkwela inmin nonggolat yurag-o” luk yak indij-o.

²⁵ Yak ondosola, it-nen yogolar-e: ”Nir-e nere-nen wat yurag-et nde, kat-nen yongga nundusu me, nap wiwa-o. Nir-e Pirayon ndegel obogolat wulmul-o” yiga-o.

²⁶ ”Iri ala-ge, yagidnak mende ogore yosola-ge, siyag-e (seperlima) Pirayon arengge kwat mag-o” luk Yusup-nen iri kwarugwi iri-ge o Mesira wi iri me-n kwarogolat wolmakluk imiri mbara wat tak pid iri-ge yawo-nen na iri nggal-et kwat tenag-et worali-o. Nde, kwal ombo onnggweyak perak Pirayon arengge rak pigit lag-o.

Yakup wat eyekluk-nen nggi yidnak wene 47:27-31

²⁷ Nde, Isarael nab-e Mesira nggweyak pem o Nggosen iri me-t woragolar-e, yi mende ndi mende ombo irit woragolat, inlirak na kwarat ndakolat irit woraiga-o.

²⁸ Nde, Yakub-e o Mesira mbarik woralar-e, olengen tuju belas irit woragij-o. Nde, lambuksa-ge olengen-e seratus empat pulu tuju (147) irit woragij-o.

²⁹ Nde, Yakup na wat yurak panggo yosola-ge, Yakup-nen-e ambara Yusup yonggo buruk-nen yak tosolar-e: ”Kat kinggi-ge an nawak ponok ponok enggendumu puruk-nen owak mbarosolar-e: ’Mesira yu me-ge yapma kibimin pug-o’ luk owak mbari-o.

³⁰ An-e an nomborak yapma inpidnak sa-t yapma nuburag-o. Nde, an wat yumu-ge o Mesira yu me-nen wok nuburuk mburugundik, it yapma inpidnak sa-t nuburag-o” yosoloma-ge, Yusup-nen yosolar-e: ”An-e neid kat-nen yigen irit kwat kibimin-o” luk yij-o.

³¹ Yosoloma, Yakup-nen yosolar-e: ”Iri ala-ge, iri kwarimin-o luk mondok owak mbari-o” yak tij-o. Yosoloma-ge, Yusup-nen-e mondok owak mbarij-o. Mbarosoloma, Yakub-e nene yoso sa-nen: ”Wiwa-o” luk, erembel wanij-o.