NDAK WIRIDNAK WENE 46 - Nanduk Ngget Tul Pidnak Wene

Yakup ilirak inmin Mesira mbiriga wene 46:1-7

¹ Nde, Yakup na aringgi arengge ereba na nduguluk mberarig-e, o Mbereseba wok yosolar-e, eid Isak-nen kek tak poso Mbal Pem Nagawan iri na amanggim wam wosa emben wok tij-o.

² Iri rak puruk, nene yosoma-ge, kubu nggwe-ge Mbal Pem Nagawan-nen nabi bem Yakup yak tosolar-e: ”Yakup wa-e!” yosoloma-ge, at-nen yosolar-e: ”Nagawan Indo wa-e. An-e worasu-o” luk yij-o.

³ Mbal Pem Nagawan-nen yosolar-e: ”An-e Mbal Pem Nagawan, kat keid-nen kek tak noboso Mbal Pem Nagawan-nen yusu-o. Kar-e Mesira mbururak kwiye yurak pug-o. An-nen-e kat-nen wigarag-e o iri me-nen-e ap elem nggok misik kwarak pimin-o.

⁴ Nde, an-e ndegel kuburuk Mesira-t mbirimin-o. O iri me-nen kat-nen wigarak na tuguruk ndegel unpuruk yu me-t lobok yimin-o. Nde, Yusup inggi-net kat kerengen sabe lambirik puwa-o” yak tij-o.

⁵ Iri yosoloma-ge, Yakup na Mbereseba-nen mborosola-ge, ilirak-nen-e ineid Yakup min onkwela min oboksa nggweyak koma Pirayon-nen Yakup amanggim pil lobok yid iri na arem inpil nggurug-e,

⁶ it onowam nde enarengge nde o Kanaan woragolat-nen ndok wiriga ereba na waruk Mesira mbiriga-o. Nde, iri mborosolar-e, Yakup-nen-e at-nen wigarak oboksa inmin mbirij-e:

⁷ at elirak inlirak, ap min kwami min inmin mbirij-o. 46:8-25 Ayat ya arem-e Yakup-nen nderak unnu min at elirak-nen ndaiga unnu min mbarak worasu-o.

Yakup elirak inmin Mesira woraiga wene 46:26-34

²⁶ Nde, Yakup-nen wigarak na Mesira mbiriga lambuksa-ge enpe wonarag-e enam pulu enam (66) irit mbiriga-o. Nde, at elirak onkwerak perak wonarigit lag-o.

²⁷ Nde, Yusup elirak Mesira-nen nderak iri-ge mberen-o. Iri ala-ge, Yakup-nen nderak lambuksa Mesira nggwiga enpe-ge tuju pulu (70) irir-o.

²⁸ Nde, Yakup-nen-e Yewura na-ge Yusup na eid imin o Nggosen iri me lambuk yuwakluk, Yusup eram nanduk wirik ibij-o. Wirik uburuk, it na o Nggosen iri me wok yukmu-ge,

²⁹ Yusup na-ge nggweyak koma bem o Nggosen lobok yarik, eid imin lambuk yosolar-e, eid na urusu nggonok tarik, kwarat yip mak tosolat woragij-o.

³⁰ Yip mak tosola-nen Yakup-nen Yusup yak tosolar-e: ”Kat na-ge wat yigen lamorok kurug-et keyasu me, yawo-n perak an-e wat yurak nak mot tak pigi-o” yij-o.

³¹ Iri luk, Yusup-nen owerak min owe owot erep min yak ondosolar-e: ”An-e nagawan eram mondok mbirimindik, nagawan yak tosolar-e: ’An nowerak min an nowe nowot o Kanaan wi woragwi oboksa lobok yigarig-o.

³² Nde, it iri-ge sapi wam min lomba wam min ombo me, onowam min-et lobok yigarig-o’ yak tosoma nde,

³³ nagawan-nen wene mbo kunpuruk, nde, ’Kir-e no yabu wanugwi-o?’ yosola-ge,

³⁴ ’Nir-e mondok marik pem ereba-net wam nak ndogorogolat woragwi-o. Nde, iri-ge, nanduk nonmborak-nen mamarag-er-o’ luk yurag-o. Kit-nen iri nggal yugup pem-e, kir-e o Nggosen-et winde rak kunpuwa-o” yak indij-o. Nde, Yusup-nen iri nggal yurag-o yid iri-ge it Mesira nap-nen-e wam ndugurugwi nab-e teberak nggal yik eneyaruk, inmin are kundugwi buk ala-n yij-o.