NDAK WIRIDNAK WENE 45 - Nanduk Ngget Tul Pidnak Wene

Yusup-nen ”An-e Yusup-nen yusu-o” luk at owerak inmbiri bem para yak indid wene 45:1-28

¹ Yusup na-ge ”An-e Yusup-nen yusu-o” luk owerak ennggarem para yak undurak na-ge indi teberak purak meya ala karuk, enarikmu-nen owerak para yak undurak puruk, at eyabu wanugwi nap ereba na-ge ndegera wirik inpij-o.

² Nde, at-nen at eyabu wanugwi nap ereba na ndegera mbepme wirik enpamu mborogola, enarikmu-ge Yusup na ene nggoksa yip tosola-ge, it Mesira nap mbepme woraiga ereba na-nen-e kuliga-o. Kulurug-e, iri wene na-ge Pirayon woraso sa wigak yil mbirij-o.

³ Nde, Yusup-nen owerak yeba na yak ondosolar-e: ”An-e Yusup iri nar-o. Nde, neid iri na-ge uruk worasu, lak?” yij-et nde, owerak na-ge kwiye kwarat yogola, wene onggo yurag-e mondok meya agaij-o.

⁴ Iri yogola, Yusup-nen yosolar-e: ”Naptag-o. Yu me panggosa lobok yer-o” yosoloma, it na-ge eram panggosa mborogolikma-ge, at-nen tuguruk yak ondosolar-e: ”An-e kit-nen nonggo wanigepma, Mesira nggwe wok nuburuk mbiriga Yusup iri nar-o.

⁵ Kir-e an nonggo wanigep iri na bem niri nera kwarige-o luk kwiye yurak pug-o. Nde, iri kwarigep iri-ge ndemerer-e Mbal Pem Nagawan-net ap kwarat yu inmiri yuwakluk kenabuwok nanduk Mesira yu me nibil lobok yamu-o.

⁶ Nde, yawo nogoro arem olengen mberen worali ya min abok olengen lima wulmul ereya min woragolar-e, ap-nen-e yabu wanogolat, yaidnak mende mbarogolat mondok wolma bug-o.

⁷ Nde an-e kwiye worak yu nggal kwasa kit kinmiri yosolat, kit-nen wigarak oboksa inmiri yurak amanggim-et Mbal Pem Nagawan-nen-e an-e kenabuwok yu me nibil lobok yamu-o.

⁸ Iri ala, kit-nen kwarigep iri-nen ndowaga an-e yu me worasu-ge lag-o. Alat nde, Mbal Pem Nagawan-net nibil lobok luk, at-net Pirayon ndegel oboso nap kek tak nibij-o. Nde, an-e Pirayon ama woragwi nap oboksa min Mesira wi oboksa min tena unpuruk wolmakluk mendak nibij-o.

⁹ ”Nde, yawo kir-e ndag-et nak mburugupndik, nineid yak togolar-e: ’Kambara Yusup-nen yosolar-e: Mbal Pem Nagawan-nen-e an-e o Mesira wi oboksa tena buwakluk mendak nebamu-o. Iri ala-ge, ndag-et nak yu me lobok yurag-o.

¹⁰ Neid kat kilirak komborak inmin nde, konlomba wam nde kenkambing wam nde kensapi wam nde kenaringgi kenarengge oboksa min-et lobok yugupndik an neram panggosa o Nggosen yu me worabok-nen.

¹¹ Nde, neid kat nde o Nggosen worala-ge, nogoro nak woragolat olengen lima wulmul ya arem-e neid kilirak inmin nde kowam nde mondok nere wat yugup naru yongga korosolat woramin-o luk yamu-o’ yak ter-o” luk yak indij-o.

¹² Yak unduruk, Yusup-nen tuguruk yak ondosolar-e: ”Yawo kit kondomok kenlengen-nen na, kat Mbenyamin-nen na, ’Ar-e Yusup nar-o’ luk neyali irir-o.

¹³ Nde, kit-nen-e nineid iri yak togolar-e, Mesira yu me-nen kek tak worasu yu wene yak togolat, kit-nen kali oboksa ndindera yak turuk ndag-et nak imin lobok yer-o” luk yak indij-o.

¹⁴ Iri yak undurug-e, Yusup-nen-e owot Mbenyamin iri na paluk tosolat, at-nen na Yusup paluk tosolat yogolar-e, yip mak kerak mbiga-o.

¹⁵ Iri luk owerak yeba na ngonok unduruk, yip mak unduruk kwaril nij-o. Iri lug-e, at imin wene ndok ndok yiga-o.

¹⁶ Nde, Pirayon woraso sa-nen kuliganggal-e, Yusup owerak lobok yidnak wene kulurug-e, Pirayon iri na nde at eyabu wanugwi nap ereba na nde enalen kwarat yiga-o.

¹⁷ Iri lug-e, Pirayon iri na-nen Yusup yak tosolar-e: ”Kowerak enmbato ereba-ge kelerai wam pem pil laruk, Kanaan wi mburuwarik,

¹⁸ it ineid min onkwela min ininggi waruk yu me lobok yuwag-o. Logok yogola-ge, an-nen-e o Mesira yu me-nen nggweyak konak misik wok indimin-o. Iri yumu-ge ir-e nunggwi mende bem-e anggun lak, konak irit wolma-o.

¹⁹ Nde, it yu me lobok yogolat, onkwerak nde inlirak marik marik nde it ineid nde yarak unpuruk yu me lobok yurak pem-e nggweyak koma-ge Mesira yu me-nen waruk mburuwag-o.

²⁰ Nde, Mesira yu me-nen idnak silobulo mondok konak lombog-e it winde ma me, it enarengge iri me keya buwa iri na bem unmud kudtak pug-o” yak tij-o.

²¹ Nde, Yakup ilirak-nen Pirayon-nen yak indid iri na ndak ndag-et kwarogolar-e, Yusup-nen-e nagawan iri na-nen yidnak yidnag-et nggweyak koma-ge it wok ondosolat, nunggwi mende tu laro na wog-et ondosolat yij-o.

²² Iri-nen sum ngget nak ininggiri sum min enpe sum min enambik tak wok indil lobok yij-o. Alat nde, owot Mbenyamin iri na perak inggiri sum lima, ebe sum lima min perak tol-e tiga ratus (300) min wok tij-o.

²³ Nde, eid amanggim-e o Mesira iri-nen parugu woragwi silobulo mondok konak ereba na-ge kelerai wam sepulu iri bem-e mbato min oroti min Mesira lobok yosolat-nen norak tu laro nunggwi mende erep min-et kelerai wam ombolwak pem puruk eid amanggim wirik pij-o.

²⁴ Owerak ereba na wirik onposolat-nen yak ondosolar-e: ”Kir-e tu ndumu-ge yuk puk mburak pug-o” yak indij-o.

²⁵ Yak endamu it na-ge Mesira-nen ineid Yakup eram Kanaan wi mbiriga-o.

²⁶ It na mbirigarik, ineid eram wok yogolar-e: ”Yusup na-ge uruk worasu-o. Nde, at iri-ge o Mesira wi oboksa enanggul pem kek tak-nen yusu-o” yogola, kolosolar-e, Yakub-e indi pok yij-et nde, arem nggwigit lag-o.

²⁷ Alat nde, it-nen Yusup-nen yidnak wene ereba na oboksa ndindorogolat, nggweyak koma at-nen ebem koreluk Mesira mbururak amanggim pid ereba na karuk-nen perak nde, indi kondok yosolat-nen yosolar-e:

²⁸ ”Nambara Yusub-e urug-et worasu-o! An-nen peraso-ge irir-o! An-e wat yigit lak ma-net mbirimindik, nambara kayeg-o” luk yij-o.