NDAK WIRIDNAK WENE 44 - Nanduk Ngget Tul Pidnak Wene

Yusup idmbe lak yidnak wene 44:1-17

¹ Nde, Yusup-nen at ndegel oboso nap iri na yak tosolar-e: ”Kar-e it unsum arem mbato it-nen waruk mbururak ndak ndag-et yasa wok indi-o. Nde, ontol-e ontol ndomok tuguruk enmbato emndam yarak inpil lobok yi-o.

² Nde, an yi naso yimbe perak-nen konidnak iri-ge onowot labo iri usum mu mbato emndam yarak posolar-e, orol mbato onggo bid ereba min-et yarak pi-o” yak tij-o. Yak tosoloma-ge, ndegel oboso nap iri na-nen-e Yusup-nen yak tid iri na ndak ndag-et kwarij-o.

³ Nene luk kubu kabu-ge Yusup na keya buruk, at owerak na-ge onowam kelerai wam ereba na bem mbiriga-o.

⁴ It na iri me-nen mbirigarik, tu ndumu korok ereba-t mburukmu-ge, Yusup-nen ndegel ubugwi nap-nen ene kulugwi nap iri na yak tosolar-e: ”Kar-e ndag-et nak inmbirik muk eneyagundik, tena unpuruk-nen yak ondosolar-e: ’Noluk konak kwat kinpidnak na-t nde, onggo-ge meya kwatluk mbitli-o?

⁵ Kir-e an ndegel oboso nap idmbe at yi kenangga naso perak-nen konidnak iri wanigeb-o. Nde, yimbe iri bem-net abok-nen kwarurak wene-ge aru yoso-t nde, kir-e meya nggok kwarigeb-o’ yak indi-o” luk yak tij-o.

⁶ Nde, Yusup ndegel oboso nap iri na Yusup owerak ereba na enndam wok luk-nen yak ondosolar-e, Yusup-nen ”Yak indi-o” yid wene ereya na-t yak ondosoloma,

⁷ it-nen onggo at yak togolar-e: ”Nab-o. Kat kindi ngge peraruk-nen yusu-o? Yengge wag-o! Nir-e mondok wanigit lag-o.

⁸ Nab-o. Kar-e karu nar-o. Nanduk nit nunsum mu mbato emndam-nen tol kaige-ge tuguruk keram pil lobok yige nar-o. Nit-nen emas tol ala na, perak tol ala na, Ngguberenot ama iri-nen yariya wanurag-e, ndag-e lag-o!

⁹ Nab-o. Yimbe iri nde nit misik nunsum mu nde karug-e, iri-ge mondok wutluk, nit ereb-e kat ndegel kubugwi nap kwat mog-o” luk yiga-o.

¹⁰ Yogolikma, Yusup ndegel oboso nap iri na-nen yosolar-e: ”Iri-ge ob-et yigeb-et nde, yimbe iri nde usum mu-nen kaidnak nab-e at irit ndegel noboso nap wolma-o. Nde, kit ereb-e mbururak ob-o” luk yij-o.

¹¹ Yosoloma, it na ndag-et nak unsum na nggosa keya burug-e, emnde wisiril lobok yiga-o.

¹² Iri yikma, Yusup ndegel oboso nap iri na-nen unsum mu lombok kwara mbenaril nij-o. Iri yosolar-e, nandug-er-e manggiya iri na usum mu lombot puruk, imbirig-e at imbirik iri na usum mu lombot puruk, irit tit lembena labo iri na usum pem wok yij-o. Iri yosoma-ge, yimbe iri na-ge onowot labo Mbenyamin iri na usum mu kagaij-o.

¹³ Iri ala karuk, owerak na-ge inndi puru kwarat yogolar-e, unsum yirik ereba na ndela keya burug-e, mbato yarak sum yeba na kelerai ombol pem pil laruk, tuguruk nden karuk mbiriga-o.

¹⁴ Mbirigarik, Yewura anggamirak inmin na Yusup ama wok yiganggal-e, Yusup na-ge iri na me-t worasoma, wok yiga-o. Wok yogolar-e, at eram yud tud mbogola,

¹⁵ Yusup-nen yak ondosolar-e: ”Kir-e no mende kwarigepndig-o? Kir-e kenaru bug-a? Ap an nggal-e kit-nen meya nggok kwarigep iri nggal-e kagwi buk mende kwarugwi bem aru yoso na-ge kenaru bug-a?” luk yak indij-o.

¹⁶ Yosoloma, Yewura-nen wene erep nggarosolar-e: ”Nab-o. Nit-nen-e no wene nde yul-o? Nit-nen-e wene eyak wururak na meya, ’Mot mot kwarugwi nab-o’ yurak na meya-o. Nit-nen lugud tak kwarige-ge Mbal Pem Nagawan nak-nen nam tak pij-o. Yimbe usum mu kaidnak nap iri nag-e lag-o. Are, nit oboksa kat ndegel kubugwi nap-net yili-o” luk yij-o.

¹⁷ Yosoloma, Yusup-nen yosolar-e: ”Iri-ge lag-o. Ta-nen nde usum mu yimbe iri yarak kaidnak nap iri nak an ndegel noboso kwat ma-o. Nde, kit erep iri-ge kineid eram kenma mbururag-e te-nen yusu-o” luk yak indij-o.

Yewura-nen Mbenyamin imiri yidnak wene 44:18-34

¹⁸ Iri yosoloma, Yewura a Yusup eram panggo yosolat-nen yak tosolar-e: ”Nap, wiwa-o. An wene mbi kat kimin yek-nen ondoro wok niri-o. Nab-o. Met nuburak pug-o. Nde, kar-e Pirayon nggal-net yusu-o.

¹⁹ Nde, nab-o. Kat-nen nit kin wok nonposolar-e: ’Kir-e kineij-e worasu, lak? Nde, konowot misik worasu, lak?’ luk yak nondosola,

²⁰ nit-nen onggo yak korogolar-e: ’Nit nineid iri-ge abu indi worak worasu-o. Nde, nonowor-e ap indi worak pem-nen ndagidnak worasu-o. Nde, nonowot iri iniya misik-nen nderak owe-ge wat yamu-o. It mberen nak nderak nde, at yu arig-et nak uruk worasu-o. Nde, at yu ebem-e eid indi kundik-nen yusu-o’ luk yak kirige-o.

²¹ Nde, nab-o. Kat-nen nit yak nondosolar-e: ’Konowot iri-ge an kayek-nen an neram waruk lobok yer-o’ yak nindigen iri nar-o.

²² Yosoligenma, nit-nen yogolar-e: ’La iri-ge eid arig-et penggera keya burag-e meya-o. Nde, eid penggera keya bosola-ge, eid iri-ge wat ma-o’ yige nar-o.

²³ Alat nde, nap kat-nen yosolar-e: ’Kit nde konowot iri nde imin lobok yigit lak-nen-e an neram-e lobok yurak pug-o’ yigen nar-o.

²⁴ Iri yosoligenma, nit na tuguruk nineid eram mbirigerig-e, kat-nen yak nindigen wene iri na-ge nineid yak tige-o.

²⁵ Iri luk nineid-nen: ’Tuguruk mbato onggo bil mberer-o’ luk wirik nonposola,

²⁶ nit-nen onggo yogolar-e: ’Nit nde nonowot labo iri nde nimin nde lak-nen-e, Ngguberenot iri eram-e mondok nggurag-e meya-o. Alat nde, la iri imin-nen perak mburul-o’ yige-o.

²⁷ Yogolikma, nineid-nen yosolar-e: ’An nogwe Arakel-nen-e nilirag-e mberen-et nak ndagij-e kir-e kenaru nar-o.

²⁸ Nde, manggiya-ge an keya nibid iri nar-o. Iri-ge ndemeret singa ndakngge-nen ninggidnak me, erare abu kagit lak irit yawo na woralat me,

²⁹ kit-nen nde nambara labo yu-ret an neram-nen waruk mburugupndik nde, at ebem angin worak mende nde mbuwarig-e, an-e nindi worak ebem lud indi puru bera woragwi elem nebem pugupmu, iri-nen ndowaga an-e wat yimin-o’ luk yij-o” yak tij-o.

^30-31 Nde, Yewura-nen Yusup yak tosolar-e: ”Nab-o. Iri bem-nen ndowaga an nde nowot yu keya buruk narik mborosola-ge, mondok nineid iri-ge ndemeret wat ma-o. Nde, ar-e indi worak me, la yu ebem nak-nen lud tak woraso me, nit-nen indi puru bera woragwi ebem pil mburulmu, iri-nen ndowaga wat ma-o.

³² Iri-nen an-nen neid yak tosolar-e: ’La iri-ge an nebem-o. An-nen nde an nak lobok yosolat, la iri imin lobok yigit lak nde ala-ge, an nuruk woralar-e, angin worak wanosolat woramin-o’ luk iri yigirik me,

³³ nonowot yu ondolma-ge an-et kat ndegel koboso nap kwat yek-nen ob-o luk yak niri-o. Nde, la yu-ge owerak inmin ama mburuwag-o.

³⁴ La yu keya buruk an nak neid eram mbururag-e ob-er-a? An neid lak tak uburak mende bem mbuma iri an-nen kasolat wolmomtag-e mondok an-e nimbir-o” luk yij-o.