NDAK WIRIDNAK WENE 43 - Nanduk Ngget Tul Pidnak Wene

Yusup owerak-nen Mbenyamin imin Mesira mbiriga wene 43:1-34

^1-2 Mesira-nen mbato waruk lobok yiga ereba na oboksa-ge Yakup elirak onkwela inmin-nen nuruk, o Kanaan wi nere mondok kwarat alama-ge, Yakup-nen elirak yak ondosolar-e: ”Kir-e tuguruk Mesira mburugupndik, mbato siyak nenmanggim onggo bil mberer-o” luk yij-o.

³ Yosoloma-ge, Yewura-nen Yakup yak tosolar-e: ”Ngguberenot Mesira woraso iri-nen watsa yak nondosolar-e: ’Kit-nen nde konowot imin lobok yigit lak-nen-e an neram-e wok yurak pug-o’ yid nar-o.

⁴ Kat-nen nde: ’Konowot imin mberer-o’ yosola-ge, nir-e mbato onggo bil mburul-o.

⁵ Ngguberenot iri-nen yosolar-e: ’Kit nde konowot imin lobok yigit lak-nen-e an neram-e lobok yurak pug-o’ luk yidnak me, nineid kat-nen nde Mbenyamin nde ninmin wirik pigit lak-nen-e nir-e mburul pug-o” luk yij-o.

⁶ Yosoloma, Yakup-nen yosolar-e: ”Kir-e noluk-nen anggun panggun tak nobogolat, ’Nit nonowot misik worasu-o’ luk ap iri yak tigeb-o?” yij-o.

⁷ Yosoloma, it-nen yogolar-e: ”Ap iri-nen-e nit min nit nenpe worali min kwara kiri keresa kin wok nonposolar-e: ’Kineij-e uruk worasu, lak? Nde, kit konowot li ap misig-e worasu, lak?’ yosoloma, nir-e lembesa-t onggo yogolat woraige-o. ’Konowot iri waruk lobok yurag-o’ yid iri-ge iri yuwa-o luk nggesa-nen nenaru yeleb-o?” yiga-o.

⁸ Iri luk Yewura-nen eid yak tosolar-e: ”La yu-ge mondok an nebem-o. Nit nere-nen wat yul naru, ndag-et nak mburuwok-nen la yu-ge an nimin ndimirik pi-o.

⁹ La yu-ge an nebem-o. An nde la yu nde tuguruk keram waruk lobok yigit lak yumu-ge, kat-nen an nebem-et erem kwaronog-o. An nuruk worasolat ya oboksa angin worak mende nak wok tenak woramin-o.

¹⁰ Nit nde ndag-et nak mbetlep nggal-nen-e mberen pem lobok lik mbitlik kwatleb-o” luk yij-o.

¹¹ Yosoloma-ge, ineid-nen yosolar-e: ”Iri nde ala-ge, kir-e yu nggal kwarer-o. O yu me woraso silobulo mondok konak, kolpo min tamuk amburu min undu worak tak poso mende erep min kimiri engen min mbandam engen min-e kunsum yasa waruk mburugupndik, Ngguberenot iri we wok til mberer-o.

¹² Kit kontol nanduk kunsum mu mbato emndam kaigep ereba na-ge tuguruk wok togolar-e, uang-e ereya nggal-et nambena wok turag-o. Indi kabaksa-n kwaridnak nde kwat ma-o.

¹³ Konowot imin mburugupndik, ndag-et nak tuguruk lobok yer-o.

¹⁴ Nagawan Indo Amawi Ambik iri na-nen Ngguberenot iri arem yabu wanosola, kit kenabuwa kasolat, Simeon min Mbenyamin min kendam tuguruk puwag-o. Nde, an-e nilirak lag-et yuwama-ge, no kwarimin-o? Meya-o” luk yij-o.

¹⁵ Iri luk Yusup owerak na mborogolar-e, silobulo we Yusup wok turak ereba na min uang mberen pem nambena nggutluruk, Mbenyamin imin Mesira mbiriga-o. Mbirigarik, Mesira wok yogolar-e, Yusup eram-et wok yiga-o.

¹⁶ Wok yogola Yusup-nen Mbenyamin min owerak ereba na min eneyaruk, at-nen ama yabu wanurak pem yabu inggem pid nap iri na yak tosolar-e: ”Ap yeba-ge an nama inmin mbiri-o. Nde, yawo lengge-ge an nama nunggwi mende-ge totno lambuksa an min norak me, wam misik wosa saga lid lud tak pi-o” yak tamu,

¹⁷ ndegel oboso nap iri na-ge Yusup-nen yak tid iri na ndak ndag-et kwarosolat, Yusup owerak yeba na inmin Yusup ama inmin mbirij-o.

¹⁸ Nde, it yeba na wok unpuruk Yusup ama inmin nggosola-ge, kwiye kagolat-nen yebet kagolar-e: ”Nit yu me ninmin nggwili yu-ge nanduk lobok yigerik, mborogolat uang nunsum arem yarak kaige ereba na bem tena nonpogolat, nonowam kelerai wam min wanogolat, nit nenpe-ge it ndegel unpugwi nap kwarak nunpuwokluk-nen yili-o” luk peragolar-e,

¹⁹ Yusup uwi tumende eralu iri na me-nen Yusup ama yabu wanoso nap iri na yak togolar-e:

²⁰ ”Nir-e meya-o, nab-o. Nit nanduk nunggwi mende onggo pil lobok yigerik,

^21-22 tuguruk mborogolar-e, tu ndumu nene yurak sa wok yogolar-e, mbato yarak sum ereba na emnde wisirigenggal-e, nit-nen mbato onggo pige tol yeba na oboksa mbato emndam yarak kaige-o. Nde, ereba-ge ta-nen tuguruk yarak pij-o? Nir-e nenaru bug-o. Iri ala karuk, yawo tuguruk tol-e waruk lobok yige-o, nab-o. Iri nag-e lag-o. Nit nondomok tuguruk mbato erep onggo purak min-et waruk lobok yige-o” luk yiga-o.

²³ Yak togolikma, Yusup ndegel oboso nap iri na-nen yosolar-e: ”Kir-e kunmud kagolat kwiye yili-ge meyog-o. Kit Kenmbal Pem Nagawan iri-ge kineid-nen erembel wanoso Kenmbal Pem Nagawan iri na-nen uang ereba-ge kunsum mu yarak pij-o. Nde, kit-nen mbato onggo pigep tol-e an-e abu wanukmu-o” yak indij-o. Iri lug-e Simeon na-ge it endam pil lobok yij-o.

²⁴ Iri luk ap iri na-nen oma inmin nggwarik, it unuwok marurak yi wok ondosolat, it enkelerai wam nunggwi mende mak tij-o.

²⁵ Iri lug-e it na-ge Yusup lengge nggwe lobok yosola, silobulo wok turak ereba na lud tak piga iri-ge lengge-ge nunggwi mende-ge Yusup imin lambuksa norak yak indidnak pem-nen kwariga-o.

²⁶ Nde, Yusup na oma lobok yosoma-ge, it-nen-e at eram yud tud mbogolat, silobulo waruk lobok yiga ereba na-ge we wok tiga-o.

²⁷ Nde, Yusup-nen it woragwi wene ereba na kin wanosolat-nen yosolar-e: ”Kit kineid ap indi worak obok yak nirigep iri na-ge ngge kwasa worasu-o? Konak worasu, lak? Kona an nenggarem kerengger-o” luk yak indij-o.

²⁸ Yosoloma, it-nen yogolar-e: ”Nab-o. Nit nineid ndegel koboso iri-ge ob-et worasu-o” luk at eralu yud tud mbiga-o.

²⁹ Nde, Yusup-nen owot Mbenyamin iri na karuk-nen it yak ondosolar-e: ”Konowot labo obok yak nirigep na-ge yu-t, lak?” yurug-e, imbiringgat tak obosolat-nen yosolar-e: ”Mbal Pem Nagawan-nen imbiringgat tak kubuwag-o, nambara-o” luk yak tij-o.

³⁰ Nde, Yusup na-ge owot iri na karuk, abuwa-nen indi puru yosolat ondomok mamak purak meya ala karuk, it enndam ereya na-net at nene yoso sa nggosolar-e, yip tij-o.

³¹ Iri luk yip lengen iri na yi bem masa keya buruk wasolar-e, mamak puruk lembesa woralar-e: ”Nunggwi mende saga pil lobok yer-o” luk ap yak indij-o.

³² Nde, nunggwi mende na nonggolar-e, Yusub-e mburu nunggwi ondoro misik me-nen nasola, nde, at owerak ereba na-ge ondoro min me-nen ningga-o. Nde, it Mesira nap erep ereba na-ge kek nggal yogolat me, Iberani nap inmin norag-e meya ala karuk, enarig-et ningga-o.

³³ Nde, Yusup owerak ereba na-ge at Yusup nasu ondoro iri na panggosa koreyak inpij-o. It kore yogolar-e, it ndesa mbidnak ndak ndak irit kore yiga-o. Nanduk nderag-e nandug-et kore yosola, nde, imbirik nderag-e eralu-t kore yosola, iri kwasa kore yil yil labo bem lud tak piga-o. Iri nggal kwasa koreyak enpamu, it-nen koreyak inpidnak iri na kagolar-e, wi yiga-o.

³⁴ Nde, it na-ge Yusup nasu ondoro iri na bem-nen nunggwi mende waga mak ondosolar-e, owerak ereba na lima bem mak indij-et nde, Mbenyamin perak dua pulu lima bem mak tij-o. Iri kwasa Yusup imin lambuksa yi min nunggwi mende min inmbitsa ningga-o.