NDAK WIRIDNAK WENE 42 - Nanduk Ngget Tul Pidnak Wene

Yusup owerak mbato onggo bil Mesira mbiriga wene 42:1-24

¹ Nde, Yakup-nen kolel kagaidnggal: ”Mesira iri me-ge mbato worasu-o” yogola kulurug-e, at-nen ilirak yak ondosolar-e: ”Noluk kir-e kindi abu nak worali-o?

² An-e ’Mesira-ge mbato worasu-o’ yogola kuligi-o. Iri ala-ge, nir-e nere-nen wat mul-o luk, mbato onggo bil mberer-o”

³ yak ondosoloma, Yusup owerak enpe sepulu mbato onggo bil Mesira mbiriga-o.

⁴ Alat nde, Yusup ambik owot Mbenyamin iri na perak anggun worak ebem mbuwa naru it inmin totno mbururag-e indi angin-nen larok tak ibij-o.

⁵ Nde, o Kanaan iri me nogoro mbud yidnak me, Yakup ilirag-e ap erep inmin-et mbato onggo bil Mesira mbiriga-o.

⁶ Nde, yi wi ndi wi-nen lobok yidnak nap enpem mbato onggo wanoso nab-e Mesira iri me ese (Ngguberenot) Yusup iri-net onggo wanosola me, owerak na eram wok yogolar-e, yud tud mbiga-o.

⁷ Nde, Yusup-nen owerak ereba na eneyarug-e, ar-e abu yenggerak onposolar-et nde, yenggerak inpigit lak nggal irit kwarij-o. Iri kwarosolar-e: ”Kir-e no nab-o?” luk met inpij-o. Yosoloma, it-nen yogolar-e: ”Nir-e Kanaan nab-o. Nir-e mbato yu me onggo purak lobok yigerig-o” yiga-o.

⁸ Yusup-nen-e owerak na-ge yenggerag-et onposola-t nde, it-nen-e ar-e yenggerak ibigit lak yiga-o.

⁹ Iri lug-e, at-nen nanduk nabi it inmin kagaid ereba na indi yebet karuk-nen yosolar-e: ”Kir-e o yu me nunduwokluk mbenat ninpil kenlengen waruk lobok yigepndik keneyagi-o” yij-o.

¹⁰ Yosoloma, it-nen onggo yogolar-e: ”Nab-o. Mondok lag-o. Nir-e nunggwi mende-t onggo bil lobok yigerig-o.

¹¹ Nir-e nineid misiget nak-nen nderak, konak nab-er-o. Nab-o, nir-e nenlengen waruk o yen nugwi nab-e lag-o” luk yiga-o.

¹² Iri yiga-t nde, Yusup-nen yosolar-e: ”Kir-e kenesiget yili-o. Kir-e nunduwokluk o yu mbenaril lobok yigeb-o” yij-o.

¹³ Yosoloma, it-nen onggo yogolar-e: ”Nab-o. Nit nenpe-ge duabelas nderag-o. Nir-e Kanaan iri me-nen nineid misik-nen nderak nag-o. Nde, nit nennggendumu misig-e wat yamu-o. Nde, labo-ge nineid imin worasu-o” yiga-o.

¹⁴ Iri yiga-t nde, Yusup-nen wene onggo yosolar-e: ”An-e ndemeret yak kindigi-o. Kir-e kenlengen waruk o yen nugwi nab-er-o.

¹⁵ An-e mondok kinndi kamin-o. Pirayon unu bem mondok owak mbarusu-o. Kir-e konowot labo iri nde yu me lobok yigit lak ala-ge, kir-e yu me-nen-e mburugup pug-o.

¹⁶ Kit kennggendumu ap misik-nen konowot iri wil mbururag-o. Nde, kit ereb-e yu me-t tena kunpuruk worasoma, kit-nen yigep iri na ndak ndag-et kwat yosola, lerak keya kunpurag-o. Lak nde ala-ge, Pirayon unu bem yak kundusu-o. Kir-e nunduwokluk o yen nugwi nab-er-o” yij-o.

¹⁷ Iri luk it yu na-ge o kubu me inpil nggwamu, o kubu me kenan nene yiga-o.

¹⁸ Nde, mberen pem woraruk kenan tak pogolat tarem-e Yusup-nen it yak ondosolar-e: ”An-e Mbal Pem Nagawan indi aye worak, at-nen yidnak yidnak kwaroso nab-er-o. Kit-nen nde kunluk wolmomtak peragolar-e, wene misik yu nak kwarer-o.

¹⁹ Kir-e ndemeret mot mot kwarugwi nab-er-o luk, yenggerak puwok-nen kit kennggendumu ap misig-e o kubu me yu me worasola, kit ereb-e konkwela nere wat yili ereba enmanggim mbato onggo pigep ereba waruk mberer-o.

²⁰ Iri yugupndik, lobok yogolat konowot labo iri-ge an neram waruk lobok yer-o. Kit nde iri yogola-ge, kit-nen yigep na-ge ndemeret yigenma-o luk yenggerak puruk, kir-e kindimin pug-o” yak indij-o. Yosoloma-ge, ir-e Ngguberenot iri-nen yid iri-net ob-o yuruk-nen

²¹ it nak yak kerak mbogolar-e: ”Naptag-o. Nit nanduk nonowot imin meya kwarige na bem-et angin worak nenpem mbusu-o. Ar-e andi bandi kasolat-nen: ’Yongga nerer-o’ yij-et nde, nir-e karuk nak eneyak nggal tak pige na bem-e nir-e yawo-ge angin worak mende nenpem mbusu yur-o” luk yiga-o.

²² Yogoloma, Uruben-nen yosolar-e: ” ’La iri ebem-e yi kwatlik ndi kwatlik kwarurak pug-o’ luk nanduk yak kindigi na-t nde, kir-e an nene-ge kuligit lak yigeb-o. Iri na bem emep onggo-ge nit nunduwa-o” luk yak indij-o.

²³ Yusup na-ge it enne-ge kolosolar-et nde, it-nen Yusup imin wene yogola, ap-nen nden yaga Yusup yak togola me, it-nen-e ar-e kulusu bug-o luk peraiga-o.

²⁴ Nde, Yusup na wene na yak unduruk, arikmu mberarig-e, yip tij-o. Yip turuk, wene yurak ndak yosola-ge, it endam lobok yarik, Simeon na-ge anggamirak endam-nen tena buruk, it inmbiri bem: ”Simeon iri na-ge kamarer-o” luk ap yak endamu, kamariga-o.

Yusup owerak tuguruk Kanaan mbiriga wene 42:25-38

²⁵ At owerak-nen karung sum waruk lobok yiga ereba na-ge ”Mbato yarak pogolat, ontol ereba na min-et tuguruk mbato emndam yarak onpogolat, tu ndumu norak nunggwi mende min-et wok undurag-o” yak indid iri na ndak ndag-et kwat inpiga-o.

²⁶ Iri rak inpikma, Yusup owerag-e mbato onggo piga yeba na-ge kelerai wam ombolwak pem puruk iri me-nen mbiriga-o.

²⁷ Mbirigarik, tu ndumu nene yurak sa wok yogolar-e, at misig-e kelerai wam nunggwi mende mak teyekluk karung iri na emnde wisiridnggal-e uang nde mbato emndam karuk-nen

²⁸ yosolar-e: ”An norol-e tuguruk wok nirikma-o” luk ene nggoksa anggamirak yak ondosolar-e: ”Uang an negarung arem yu ker-o!” yosola, it inndi kabak yogolat, kwiye kwarat kagolat-nen yak kerak mbogolar-e: ”Mbal Pem Nagawan-e no mende kwat ninpij-o?” yiga-o.

²⁹ Nde, it na mbirigarik, Kanaan wok yogolar-e, it kwat inpidnak ereba na ineid Yakup anggarem yogolar-e:

³⁰ ”Ngguberenot Mesira woraso iri-nen nit met nonposolar-e: ’Kir-e nunduwokluk an nuwi yu me kenlengen o yen wil lobok yigepma-o’ luk watsa nenpem pij-o.

³¹ Nenpem posoloma, nit-nen yogolar-e: ’Nir-e konak nab-er-o. Nir-e kunduwokluk nenlengen o yen wil lobok yige-ge lag-o. Nir-e mot mot kwarugwi nab-er-o.

³² Nde, nir-e nineid misik-nen nderak, nenpe-ge duabelas-et nde, misig-e wat yamu-o. Nde, labo misik perak eid imin Kanaan worasu-o’ yogola,

³³ Ngguberenot iri-nen yosolar-e: ’Kir-e ndemeret mot mot kwarugwi nab-et, lak? luk kinndi kayek-nen kit misig-e yu me woragola, kit ereb-e mbato waruk konkwela nere wat yili ereba endam mbato waruk mberer-o.

³⁴ Kir-e nunduwokluk kenlengen o yen wil nugwi nab-e lag-o. Mot mot kwarugwi nab-er-o luk yenggerak kenpeyek-nen kit tuguruk lobok yogolar-e, kit konowot labo iri-ge imin lobok yer-o. Iri yogola-ge, kennggam kamasa pigi yu-ge tuguruk kendam posolat, kit na o yu me woragolar-e, terag-et kenarengge wene worogolat woragub-o’ luk yak nindij-o” yiga-o.

³⁵ Iri luk it na enkarung lombok mbato ereba na kenanggukmu-ge, it ondomok ontol ondoro ereba na arem ontol ereba na nde tuguruk yarak karug-e, it min ineid min-e kwiye kwarat kaiga-o.

³⁶ Iri luk ineid-nen yosolar-e: ”Kit-nen an nilirak oboksa piril kali-o. Yusup na lag-et luk, Simeon na lag-et luk, nde, yawo-ge kir-e Mbenyamin imin-et waruk mbururak yili yu-ge an-e nindi puru bera yusu-ge ijar-o!” luk yij-o.

³⁷ Iri yij-et nde, Uruben-nen eid yak tosolar-e: ”Neij-o. Mbenyamin iri-ge wesera an-net wok niri-o. Tugurug-et waruk lobok yimin-o. Nde, lak nde ala-ge, kar-e na nilirak ap mberen ereya ondonog-o” luk yak tij-o.

³⁸ Alat nde, Yakup-nen yosolar-e: ”Mondok lag-o. Mbenyamin-e kit-nen waruk mbururag-e mondok lag-o. Owe na abu wat yamu, yawo-ge at yu nak worasu-o. Tu ndumu ereba-nen at lak tak uburak mende ebem mburag-e meya-o. Nde, an na abu nindi worak me, kir-e inndi puru bera woragwi elem an nebem pil lobok yugupmu, iri-nen ndowaga an-e wat yimin-o” luk yij-o.