NDAK WIRIDNAK WENE 40 - Nanduk Ngget Tul Pidnak Wene

Yusup-nen o kubu me inpidnak nap-nen nabi kaidnak ebe para yak indidnak wene 40:1-23

¹ Nde, at na iri me worasoma, misik tarem-e Mesira nagawan iri na ndegel ubugwi nap mberen, misig-e nagawan yi kenang toso nap, nde, misig-e oroti woraga wok toso nap ereya na-ge nagawan iri na imin siyak lugud tak kwaridnak pem-e

² nagawan iri na-nen it ndegel ubugwi mberen ereya na enpem isilepma purug-e,

³ it ya na-ge o kubu me, nagawan woraso sa yik karok woragwi nap enanggul pem ap san ombo nggok iri na ama Yusup worasu sa iri na me inpil nggwij-o.

⁴ Nde, it ereya-ge o kubu me inpikma, kwarat woraiga-o. It iri na ndegel unpuwakluk, o kubu me ombo-nen-e Yusup ebem-et pij-o.

⁵ Nde, misik tarem kubu nene yukmu-ge, it mberen nagawan yi kenang toso min oroti worak toso min ereya na-ge nabi mbi kaiga-o. Alat nde, nabi ebe-ge enarik tag-et kaiga-o.

⁶ Karuk worakmu, kub-e Yusub-e ap mberen ereya na endam mbiridnggal-e, entare-ge inndi puru rak entare irit eneyagaij-o.

⁷ Eneyaruk, Yusup-nen kin wok onposolar-e: ”Kir-e noluk yawo kinndi puru rak worali-o?” luk yak ondosoloma,

⁸ it-nen yogolar-e: ”Lag-o, nab-o. Yawo kubu nabi kaige-t nde, ap-nen nabi iri ebe-ge iri nggal-o luk yak nindigit lak woragola-nen yili-o” luk yiga-o. Yogola karuk, Yusup-nen yosolar-e: ”Mbal Pem Nagawan nak-nen perak nde yak ondosola, nabi iri ebe-ge iri nggal-o luk yurag-e ndag-o. Iri ala-ge, kit nabi kaigep kerengga yer-o” luk yak tij-o.

⁹ Yosoloma, nagawan yi kenang toso nap iri na-nen yosolar-e: ”An nabi-ge anggut erem misig-e an nerarem ya kagi-o.

¹⁰ Nde, anggut ari iri-ge inggi ondogwal kenan kagi-o. Nde, ondogwal ereya angga-ge nggeret polosola, kagi-o. Ereya na-net isi puruk, engen purug-e, nugu yosola kagi-o.

¹¹ An-e nagawan-nen kenangga naso yimbe na-ge ninggem tena worasoma, engen iri na-ge amburu mbela yimbe iri na arem yarak puruk, nagawan wok tosola kagi-o” luk yij-o.

¹² Yosoloma, Yusup-nen yosolar-e: ”Nabi kaigen iri-ge ebe-ge yu nggal-o: ondogwal kenan iri-ge o kenan nene yurak kaigen-o.

¹³ Kenan nene lug-e, nagawan iri-nen o kubu me yu-nen wirik kubuwa-o. Nde, kat-nen kwarigen iri-ge amberam tak puruk, tuguruk wok kubuwama, kondolma nggugundik, nanduk-nen wanoso nggal nagawan yi kenang tosolat woragun-o.

¹⁴ Alat nde, kat nde konag-et worasolar-e, kar-e an meme rak nuburak pug-o. An o kubu me yu-nen wirik nubuwakluk an nobog-e nagawan yak turag-o.

¹⁵ Nde, an-e Iberani nap enma-nen kurak nuburuk, lobok yigarik, o Mesira yu me worasu-o. Nde, an-e meya mbi kwarigit lag-et nde, o kubu me nibikma worasu-o” luk yij-o.

¹⁶ Nde, oroti nagawan worak toso iri na-nen kulidnggal-e, nagawan yi kenang toso iri-nen nabi kagaid na-ge wene-ge konak irit kulurug-e, at-nen Yusup yak tosolar-e: ”An na nabi misik kagi-o. Nde, iri-ge an-e mul sum kenan oroti nak ebem lud lud pago nanggul pem waruk lobok yigi-o.

¹⁷ Nde, mul sum nanggul pem abam iri na emnde bem iri na arem-e nagawan amanggim oroti worag-e nin tak nan tak yarag-et nde, yi towe ndi towe lobok yosolat, oroti wora yeba na-ge ninggij-o”

¹⁸ yosoloma, Yusup-nen yosolar-e: ”Nabi iri-ge yu nggal-o: Mul sum kenan kaigen iri-ge ebe-ge kenan nene yurak kaigen-o.

¹⁹ Nde, kenan nene lug-e nagawan-nen ap wirik unpuwama, lobok yogolat, kat kurusu mbatluk, kebe-ge e bem tiong tak kubuwama, kebe-ge towe-nen nok kubuwa-o” yak tij-o.

²⁰ Nde, kenan nene luk, nagawan ndesa mbidnak tarem wok yosola, at eyabu wanugwi nap ap yok nggok ereba na enmanggim yi mende ndi mende sagosolar-e, yi kenang toso nap iri na min oroti worak toso nap iri na min o kubu me-nen wesera at eyabu wanugwi nap ap yok nggok ereba na inmbiri bem waruk endam mburuwakluk, wene wirik pamu,

²¹ yi kenang toso nap iri na-ge ibil lobok yamu, nanduk wanoso na nggal tuguruk yi kenang tosolat woragij-o.

²² Alat nde, oroti worak toso nap iri na-ge wiriga-o. Nde, iri-ge Yusup-nen yak indid iri na ndak ndag-et kwat yij-o.

²³ Alat nde, nagawan yi kenang toso nap na-ge Yusup na indi yebet kagit lak, abu meme rak puruk irit woragij-o.