NDAK WIRIDNAK WENE 4 - Nanduk Ngget Tul Pidnak Wene

Kain min Abel min 4:1-16

¹ Aram na ogwe Awa na imin nene yosolar-e, kwe na abila lug-e, la li ap mbi ndagij-o. Ndaguruk-nen yosolar-e: ”Nagawan Indo-nen yongga norosola, an-e li ap mbi ndaki-o” yij-o. Yuruk unu-ge Kain yarij-o.

² Iri luk imbirig-e, li ap mbi ndaguruk, unu-ge Abel yarij-o. Nde, at Abel na-ge lomba wam ombo irit kwat yij-o. Alat nde, Kain na-ge yabu wanoso nap irit kwat yij-o.

³ Iri kwarogolat woragolar-e, mbi tarem-e Kain na-ge at-nen yagoso ereba na mbara Nagawan Indo amanggim pij-o.

⁴ Iri yosola-ge, at Abel-nen-e olomba wam ereba na enggendumu ija misik-nen nanduk ndagid misik wosa yarik, mbara keya buruk, mbarak op nggal ereba na-ge yena Mbal Pem Nagawan amanggim kan pij-o. Iri yosola-ge, Nagawan Indo-nen-e at Abel na irit, at-nen at amanggim pidnak mende na irit indingen tak pij-et nde,

⁵ Kain-nen pidnak iri na-ge at ebe min-et, at-nen pidnak mende min-et Mbal Pem Nagawan-nen-e isili rak pij-o. Iri ala karug-e, Kain na-ge isilepma yosolat abisu wu yij-o.

⁶ Iri ala karuk, Nagawan Indo-nen Kain yak tosolar-e: ”Kar-e noluk-nen kisilepma yusu-o? Noluk-nen kar-e kabisu wu yusu-o?

⁷ Kat-nen nde konag-et kwarigennggal-e, kerare-ge yek tag-et woraleb-o. Alat nde, kat-nen meya kwarosola-ge, meya elem karem nggweyekluk mondok komo panggo rak worasu-o. Meya elem-nen inggiyapma rak kebeyekluk worasu-t nde, kat-nen-e iri-ge urugwe nggwe rak pi-o” luk yak tij-o.

⁸ Yak tosoloma, Kain na-nen owot Abel yak tosolar-e: ”Yapmu mburuwog-o” luk mbirigarik, yapmu wok yogolar-e, Kain-nen owot Abel na-ge wirij-o.

⁹ Wutluk worasoma-ge, Nagawan Indo-nen Kain kin wanosolar-e ”Kowot Abel-e ngge-o?” luk yosoloma, Kain-nen onggo yosolar-e: ”An-e naru bug-o. An nak nowot yik karok worayeg-o yigirig-a?” luk yij-o.

¹⁰ Yosoloma, Nagawan Indo-nen yosolar-e: ”Noluk-nen kar-e mondok meya nggok iri kwarigen-o? Kat kowot eyabi ene-ge nggweyakma-nen an yak norosolar-e: ’Nemep onggo wani-o’ luk ene nggoksa yugwi nggal yosola kuligi-o.

¹¹ Nde, yawo kar-e imbiri lamut tak kibidnak me, kat-nen kowot wirigenma, kowot eyabi waneyekluk nggweyak emnde pera yusu yu bem kar-e yabu wanosolat wolmomtag-e lag-o.

¹² Kat-nen yabu wanuruk yakun mende-ge nggweyak yu-nen-e ebe rak puwa bug-o. Kar-e nggweyak ma yu me-nen-e kondoro kwasa woragit lak, we waring nak tenak woraso kwat yugun-o” luk yak tij-o.

¹³ Yak tosoloma, Kain-nen Nagawan Indo yak tosolar-e: ”Angin worak mende nebem pigen iri-ge an-nen kud turak pug-et nebem pigen-o.

¹⁴ Yawo-ge kat keram yu me-nen sera wirik nibigenma, an-e nggweyak ma yu me-ge nondoro lak, we waring tenak nak woramin-o. Worasoma, ta-nen nde nimin lid pid yogolar-e, nuruwa-o” luk yij-o.

¹⁵ Alat nde, Nagawan Indo-nen yosolar-e: ”Lag-o. Kat nde kuruwa ala-ge, kemep onggo-ge ap tuju irit undurag-o” yak turug-e, abok ap-nen Kain imin lid pid luk wuruwa naru, Nagawan Indo-nen-e imiri mbarak pidnak mende misik Kain ebem puruk wirik ibij-o.

¹⁶ Wirik obosola-ge, Kain na-ge Nagawan Indo eram-nen mberarik, Eren nggweyak pem-nen mo luwaso ambigit o unu-ge Waring Tenak Nak Woragwi sa iri me woragij-o.

Kain-nen nderak unnu 4:17-24

¹⁷ Kain ogwe min-e la misik ndaguruk, unu-ge Enok yariga-o. Iri luk woragolar-e, o misik e pela ngguruk o siri nggok tak purug-e, o iri na unu-ge ambara iri na unu bem para yarij-o.

¹⁸ Enok ambara-ge Irat. Nde, Irat ambara-ge Meuyael. Meuyael ambara-ge Metusael, nde, Metusael ambara-ge Lamek.

¹⁹ Lamek ogwerag-e mberen kam-o. Unnu-ge Anda min Sila min.

²⁰ Nde, kwe Anda na-nen-e Yabal ndagij-o. Nde, Yabal-nen wigarak iri-ge wam ndugurugwi nap, o lije sum wosa woragwi nap kwat yiga-o.

²¹ Nde, Yabal owot unu-ge Yubal iri-nen wigarak iri na-ge poba unu-ge kecapi poba min seruling poba min ene yugwi enaru nab-o.

²² Kwe Sila-nen ndagosolar-e, Tubal-kain ndagij-o. Nde, at-nen wigarag-e posid tembaga min posid besi min iri na bem-nen ndak worogolar-e, posid nde yalawi nde erep nin tak nan tak ndak wurugwi nap kwat yiga-o. Nde, Tubal-kain irid mbi unu-ge Nama.

²³ Lamek-nen ogwerak Sila min Anda min yak ondosolar-e: ”An nene kwara koler-o. Ap sujwe misik-nen niridnak me, at wirigi-o.

²⁴ Nde, Kain worasoma, emep onggo ap tuju undurak nde yidnak ala-ge, an norosoma-ge, terak menna ab-e tuju pulu tuju undurag-o” luk yak indij-o.

Set min Enos min 4:25-26

²⁵ Aram ogwe min-e li ap mbi ndaiga-o. Ndagurug-e, Awa-nen yosolar-e: ”Kain-nen wirid Abel iri na ondolma nambara mbi wok nirij-o” yij-o. Iri ala karug-e, Awa-nen-e la na unu-ge Set yarij-o.

²⁶ Nde, Set na-ge ambara misik ndaguruk, unu-ge Enos yarij-o. Nde, ereya tarem-e ap-nen Nagawan Indo kek tak pogolat, at unu yugwi tel kwiriga tarem-o.