NDAK WIRIDNAK WENE 39 - Nanduk Ngget Tul Pidnak Wene

Potipat ogwe-nen Yusup kwat ibidnak wene 39:1-23

¹ Nde, Yusup na Ismael nap-nen nagawan woraso sa yik karok woragwi san ombo ereba na enanggul pem kek tak san ombo Mesira nap Potipat iri na ebem onggo waniga-o.

² Wanikma, Yusup na-ge iri me worala-ge, Nagawan Indo-nen-e at yongga worosola-ge, at-nen yabu wanidnag-e ebe nak yosolat irit woragij-o. Iri yosola-ge, ar-e onggo ibid Mesira nap Potipat iri na ama-t woragij-o.

³ Nde, at onggo ibid nap-nen yik kasolar-e, Nagawan Indo-nen Yusup yongga worosolat me, at-nen yabu wanidnag-e ebe nak irit kwat yosola kagaij-o.

⁴ Iri ala karug-e, Potipat-nen Yusup na indingen tak purug-e, at ndegel oboso rak pij-o. Iri rak purug-e, at aringgi arengge at-nen tena woraso mende oboksa Yusup inggem nak keya bij-o.

⁵ Ereba na oboksa Yusup inggem pamu, wanosola-ge, Yusup-nen ndowaga Nagawan Indo-nen-e Mesira nap iri na aringgi arengge ma nggwe-nen na irit, mbepme nggwe-nen na irit, mondok imbiringgat tak posolat woragij-o.

⁶ Iri yosola-ge, Potipat aringgi arengge oboksa-ge mondok abu abu Yusup inggem nak kegera keya buruk woragij-o. Iri nggal kwasa inggem posolug-e, at ama-nen kwarurak mururak na-ge Potipat na-nen-e mondok indi yebet kagit lag-o. Nunggwi mende norak iri perak aru woragij-o. Nde, Yusup iri-ge amawi worak-nen erare na konak irit woragij-o.

⁷ Worala-ge, Potipat ogwe iri na-nen-e Yusup na-ge indi-nen nasolat woragij-o. Woralar-e: ”Mondok nimin nene yi-o” luk emengen mbarij-o.

⁸ Nde, Yusup na isili-nen kwe na yak tosolar-e: ”Nde, nonggo bid nap Potipat-nen-e: ’Yabu yeba-ge oboksa at yu-ge mondok ndak tena wolma-o’ neberaruk ninggem pidnak-nen yusu-o. At-nen an neberasolar-e: ’An nama yu-ge ngge kwasa worasu-o?’ luk indi mberen worasu bug-o.

⁹ Nde, o ma yu me yi mende ndi mende oboksa-ge at-nen tena woraso ndak ndag-et tena worasu-o. An-nen tena bigit lak misik mbi worasu-ge lag-o. Alat nde, kwe kat perak nde, kun ondomok inggem worasu-o. An-nen-e noluk-nen meya yu kwarosolat Mbal Pem Nagawan imin meya kwarimin-o?” luk yak tij-o.

¹⁰ Nde, kwe na-nen-e pempa ”totno nene yuwog-o” luk emengen mbal tenak woragij-et nde, Yusup na-ge at imin nene yurag-e mondok isili irit woragij-o.

¹¹ Nde, misik tarem-e ap oboksa lak, Yusup arig-et nak yabu waneyekluk o ma nggosoma-ge,

¹² Potipat ogwe iri na-nen-e ”Totno nene yuwog-o. Sug-o” luk usum erep lit kagaij-o. Lit kasoma-ge, Yusup na-ge mengga yarik, mbepme mborosolar-e, usum na-ge kwe na inggem yonggora labuk yij-o.

¹³ Kwe na-nen piridnggal, usum na nak inggem keya buruk, Yusup na mbepme mborosola karug-e,

¹⁴ kwe na-nen ndegel ubugwi ereba na wene mbo unpuruk-nen yak ondosolar-e: ”Iberani nap an nun-nen waruk lobok yarik, nama pid iri na-nen nit nunnu meya rak peyekluk yusu-o. Nde, at iri-ge an nene yoso sa nggosolat, tena nebeyekluk yosoma, nene nggwa yigi-o.

¹⁵ Nde, nene nggoksa nggwa yosolakmu, mbepme mborosolat, usum nak yonggora keya buruk mbirid yur-o” luk yij-o.

¹⁶ Iri luk, sum iri na-ge kwe iri na-nen-e ndok worak irit worasoma, un iri na lobok yij-o.

¹⁷ Lobok yosoloma, wene iri na un yak tosolat-nen yosolar-e: ”Iberani nap kat-nen waruk ngguwaigen iri na-ge an nene yoso sa nunu mbilaro ngin tak peyekluk nggwij-o.

¹⁸ Alat nde, nene nggwa yosola karuk, usum nak yonggora keya buruk, mbepme mbirij-o” luk yak tij-o.

¹⁹ Iri yosoloma, Potipat na-ge isilepma kwarat luk

²⁰ ”Yusup yu-ge ndag-et nak tenaga o kubu me per-o” luk wene wirik pamu, Mesira nagawan na-nen ap meya yogola inpil nggoso sa iri na me ibil nggwikma, iri me woragij-et nde,

²¹ Nagawan Indo-nen Yusup na yongga worosolar-e, abuwa kagaij-o. Iri yosola-ge, o kubu me ombo iri na-nen-e Yusup na indingen tak ibij-o.

²² Indingen tak purug-e, o kubu me ombo iri na-nen-e o kubu me inpidnak nap ereb-e Yusup-nen yik eneyarok wolmakluk ebem posolat, o kubu me iri me-nen kwarugwi murugwi yabu na-ge Yusup inggem pamu, at-nen kwarosolat woragij-o.

²³ Nde, o kubu me ombo iri na-nen-e yabu iri me-nen kwarurak mururak Yusup inggem pid ereba na-ge at-nen mbi siyak erep tenakit lak, Yusup inggem nag-et keya bij-o. Nde, Nagawan Indo-nen-e Yusup kwara yongga worosola, at-nen yabu wanidnak iri-ge mondok konak nak irit wanij-o.