NDAK WIRIDNAK WENE 38 - Nanduk Ngget Tul Pidnak Wene

Yewura min ambara ogwe Tamara min-nen kwaridnak wene 38:1-30

¹ Ereya tarem-e at Yewura yu-ge owe owot keya unpuruk, o siri Andulam iri me nap Ira iri na imin woragij-o.

² Iri me woralar-e, Yewura iri na-ge Kanaan nap Sua ara ndugum iri na ebem indi mbinggirik purug-e, wanij-o.

³ Wanuruk, enla manggiya ndagurug-e, ambara iri na unu-ge Yewura-nen-e Ere irit yarij-o.

⁴ Imbirik na ab-et ndaguruk, unu-ge Onan yarij-o.

⁵ Imbirik na ab-et ndaguruk, unu-ge Sela yarij-o. Nde, Sela ndesa mbij-e Yewura iri-ge o Kesip woralat-nen ndesa mbij-o.

⁶ Yewura-nen-e ambara manggiya Ere iri na-ge kwe-ge Tamara wok tij-o.

⁷ Nde, ambara Ere iri na-ge at abage-ge mondok meya ala karuk, Nagawan Indo isilepma ebem puruk, Nagawan Indo isilepma-nen wirij-o.

⁸ Worosoloma, Yewura-nen ambara Ere owot Onan iri yak tosolar-e: ”Kar-e mburugundik, kowe ogwe togwe iri imin nene yosolat, kar-e at un owor-et me, kat-nen kowe unu ki rak posolat, kowe ondolma la pi-o” luk yak tij-o.

⁹ Alat nde, Onan-nen yebet kasolar-e: ”La ndagimin-e an nondolma purak pug-et nde, an nowe ondolma purak na-t nde” perasolug-e, owe iri na ondolma lak irit wolmaklug-e, owe ogwe togwe iri na imin nene yosolar-e, amburu-ge wesi bem posolat irit woragij-o.

¹⁰ At-nen iri kwarusu iri na bem-e Nagawan Indo isilepma yuruk, at min-et Nagawan Indo-nen wirij-o.

¹¹ Worosoloma-ge, Yewura-nen ambararak onkwe togwe Tamara yak tosolar-e: ”An nambara Sela yu nggok yosola memet, kar-e keid kiya endam mburugundik, ap wanigit lak irit wolmomtag-o” luk yak tij-o. Nde, at Yewura-nen iri yid iri-ge Sela min-et ambararak mberen indid nggal-et Nagawan Indo-nen wuruwa naru-nen yij-o. Yosoloma, kwe iri na-ge eid ija endam mbirij-o.

¹² Iri na kwatluk ombol nggwe-ge Yewura ogwe iri na wat yij-o. Iri yamu tabun puruk woraruk, tu mbutlug-e, Yewura-nen-e anggam Andulam nap Ira iri na yak tosolar-e: ”Nir-e an nolomba wam usu mbaril Timna mburuwog-o” luk wene mbariga-o.

¹³ Nde, it iri na mburuwokluk yogola-ge, kwe Tamara-nen kolosolar-e: ”Kuntak ineid Yewura na-ge olomba wam ereba na usu mbaril lobok yuwa-o” yogola irit kulij-o.

¹⁴ Kulurug-e, kweyap togwe woragolat-nen yirik woragwi sum iri na keya buruk, sum-e nin irit yutluk, erare sum-nen na lumusa keya buruk, o Enaim siri iri na pak tumende bem koreyak woragij-o. Nde, o Enaim iri-ge o Timna mburugwi tulabiyem-o. Iri kwarid iri-ge Yewura ambara abok mende Sela iri na-ge abu usujwe yidnak iri-ge ar-e aru-t nde, at Yewura-nen-e at Tamara iri na Sela wanuwakluk wok tigit lak ala karuk-nen kwarij-o.

¹⁵ Nde, Tamara iri na erare lumusa keya bidnak me, at Yewura-nen perasolar-e, kwe iri na-ge terak waring kaso-o perasolug-e,

¹⁶ Yewura na-ge tula ambanggoma iri me-nen at eram panggo yosolat-nen yak tosolar-e: ”Kar-e nunggwirik nggal wok kururak perasu-o?” luk yak tij-o. Iri yak tid iri-ge kwe iri-ge at ilirak onkwe togwe iri na-o luk aru buk-nen kwarij-o. Iri yak tosola-ge, kwe Tamara-nen yosolar-e: ”Nab-o, kat-nen wok nurugun nag-o” luk yak tij-o.

¹⁷ Yosoloma, Yewura-nen yak tosolar-e: ”An-e kambing mendaso misik wok kiril lobok yimin-o” yak tij-o. Yosoloma, Tamara-nen yosolar-e: ”Ob-er-o. Mbigija-ge kat karengge mende misik kinggi liril tena worasoma, wok niril lobok yurak iri na nggog-o” yij-o.

¹⁸ Yosoloma, Yewura-nen yosolar-e: ”Kambing iri pil lobok yosola-nen wok nururak pem no mende wok kirimin-o?” luk yak tij-o. Yosoloma, Tamara-nen yosolar-e: ”Kangge lop nok tak pugwi mende iri are min-et wok norosolat, kat kinggem wangun kat tena worasu iri min-et wok niri-o” yosoloma, Yewura-nen-e at-nen nggi yid ereya na wok turug-e, kwe iri na tenagij-o. Iri kwasa imin nene yosoma-ge, kwe Tamara iri na-ge abila yij-o.

¹⁹ Nde, Tamara iri na ama mborosolar-e, sum abak-nen erare lumu rak pid iri na yonggora keya buruk, kweyap togwe woragolat-nen yurugwi sum iri na yutluk woragij-o.

²⁰ Mberen nggal ereba worarug-e, Yewura-nen-e kambing wam kwe iri na amanggim waruk mbutluk wok tosolat at arengge lop nok tak pugwi mende min are min owangun min kambing wok tosola-nen wok turak tena worasu iri na waruk lobok yuwakluk, anggam Ira iri na kambing waruk wirik pamu mberarik, ogore yij-et nde, mondok kwe iri na-ge kagit lak irit yij-o.

²¹ Iri ala karuk, Ira-nen Enaim kweyap ereba na kin wok onposolar-e: ”Kwe terak waring kaso kwe tulabiyem towarak woraso iri na-ge ngge me worasu-o?” luk kin wok onposola, it-nen yogolar-e: ”O yu me-ge terak nugwi kweyab-e woragwi bug-o” luk yak tiga-o.

²² Iri yogoloma, mberarik Yewura yak tosolar-e: ”An-e kwe iri na ogore yigi-t nde, mondok kagit lag-o. Nde, it iri me-nen yogolar-e: ’O yu me-ge terak nugwi kweyab-e yu me-ge woragwi bug-o’ luk yiga-o” luk yak tij-o.

²³ Yosoloma, Yewura-nen yosolar-e: ”An-e onggo wok turag-et tula kore yosola-t nde, kagit lak nde yigen ala-ge, ninnggiri mbara nggal mbigija-ge at-nen tena worasu mende ereya-t wanuwag-o” luk yij-o.

²⁴ Nde, waneya kenan woraruk ombol nggwe Yewura-nen wene kolel kagaidnggal-e, at ambararak onkwe togwe iri na-ge tup tup yogolar-e: ”Terak waring kasolat abila yarik worasu-o” yidnak wene irit kulij-o. Kuluruk, Yewura-nen wene wirik posolar-e: ”At iri-ge kan-nen nuruk lak tak puwakluk, kudsa kan purag-o” luk yak indij-o.

²⁵ Iri yamu, Tamara iri na waruk mborogola, at untak ineid Yewura iri na eram wene pil mborosolar-e: ”An nabila yigi yu-ge silobulo an tena worasu yeba ombo-net nabila rak pamu-o. Iri ala-ge, lop nok tak pugwi mende min are min wangun min ya-ge ta arengge-o? Kwara lombot purag-o” luk wene wosa pil mbirij-o.

²⁶ Yamu, Yewura-nen-e kwe iri na inggem worasu silobulo ereya na yenggerak kasoluk yarig-e, at-nen yosolar-e: ”Kwe iri meya-ge lag-o. An-et meya kagi-o. Iri-ge, an nambara Sela iri kwe iri wok teyeg-et nde, an-nen iri kwarurak larok yigi irit meya-o” yosolug-e, Yewura-ge kwe iri na imin mondok nene yigit lak, abu keya bij-o.

²⁷ Iri luk, kwe Tamara iri na-ge la ndagurak irit panggo yosola, la iri na-ge kambera ndagurak irit yenggerak kaiga-o.

²⁸ Nde, la iri na ndagosolar-e, la misik inggi-ge nanduk kenangga wagij-o. Wasola-ge, li ndakola yongga ondoso kwe misik-nen yosolar-e: ”La yu-ge nanduk ndesa mbuwa-o” luk la iri na inggi na-ge kere mimi parik pij-o.

²⁹ Alat nde, la iri na inggi tuguruk luruksa pil nggosola-ge, misik iri na nde nanduk ndesa mbij-o. Iri yosola karuk, li ndakola yongga ondoso kwe iri na-nen yosolar-e: ”Pelek yaga pil wasolat kat-nen kwaroso-ge irir-o” luk yij-o. Iri yidnak ala, la nandug-et ndesa mbid iri na unu-ge Peres yariga-o.

³⁰ Nde, imbirig-e inggi bem kere mimi parik iri na-ge owot irit ndesa mbij-o. At iri na unu-ge Jera irit yariga-o.