NDAK WIRIDNAK WENE 37 - Nanduk Ngget Tul Pidnak Wene

Yusup owerak inmin-nen kwaridnak wene 37:1-11

¹ Nde, Yakup na-ge eid woraso sa Kanaan iri na-t woragij-o.

² Nde, Yakup ilirak inmin-nen woraiga wene-ge yu-o: Nde, Yusup na-ge olengen tuju belas pem awo ap yengge manik woralar-e, ar-e eid ndegel ubugwi kweyap Mbilka min Silpa min inlirak owerak ereba na inmin lomba wam min kambing wam min tusuangge ya mak tilik nogolat woraiga-o. Iri yogolar-e, owerak-nen meya kwaridnak ereba na-ge at-nen-e eid pendega yak tij-o.

³ Nde, Yusup iri-ge Yakub-e ap indi worak pem-nen ndagidnak me, Yakup-nen mondok indi kundugu irit woralat, nde, owerak ereba enabuwa-ge marik nggal kasolat woragij-o. Nde, misik tarem-e Yakup-nen-e sum konak misik Yusup amanggim yagij-o.

⁴ Iri yosola, at owerak ereba na-nen kagolar-e, at Yakup na-ge ir-e enabuwa marik tak puruk, at ambara Yusup nag-et abuwa nggoksa kasola karug-e, it insilepma-ge Yusup ebem puruk at imin-e wene-ge ndirigit lak irit woraiga-o.

⁵ Nde, misik tarem kubu nene yosoma-ge, Yusup-nen nabi misik karuk, nabi iri na owerak ereba na inmbiri bem koronggosola-ge, owerak ereba na-ge mondok insilepma-ge ebem lud tak posola, insili rak piga-o.

⁶ Yusup-nen owerak yak ondosolar-e: ”Kwara koler-o!

⁷ An nabi-ge yu nggal kagi-o. Nir-e yapmu nggwigerik, nggandum mbato ereba na mbara ut kamasa pukmu, an nembato ut kamarak iri na-ge men yosola, nde, kit kenmbato ut kamarag-e lobok yogolat, an nembato ambigit lop lop wutluk, yud tud mbogola kagi-o” yak indij-o.

⁸ Yak ondosoloma, it-nen yogolar-e: ”Kat kindi-nen-e kar-e nit nennggendumu nenanggul pem nagawan woramin-o luk perasu-a?” luk met piga-o. Nde, at-nen nabi kaso bem-nen na, at-nen yoso bem-nen na insilepma-ge ebem lud Yusup ebem puruk woraiga-o.

⁹ Misik tarem Yusup na nabi misik karuk, owerak yak ondosolar-e: ”An nabi tuguruk misik kasolar-e, mo min waneya min wonaru sebelas min oboksa an nambigit yud tud mburuk, an kek tak nobogola kagi-o” luk yak indij-o.

¹⁰ Yak unduruk, Yusup-nen-e nabi na-ge tuguruk eid imbiri bem kiringgij-o. Koronggosoloma, Yakup-nen met obosolat-nen yosolar-e: ”Iri-ge no nabi kaigen-o? Kat kindi-nen perasolar-e, an min kiya min kowerak oboksa min kat keram lobok yulndik, kat keram tud luk, kerembel wanurak perasu-a?” luk met ibij-o.

¹¹ Yusup owerag-e enlengen ale at ebem piga-t nde, Yakup-nen perak ”Nabi iri na-ge ngge kwasa kagaij-o?” luk indi yebet kasolat woragij-o.

Yusup onggo puruk, Mesira waruk mbiridnak wene 37:12-36

¹² Nde, misik tarem-e Yusup owerak na-ge ineid arengge kambing wam nde lomba wam nde waruk tusuangge mak til o Sikem mbiriga-o.

¹³ Mbirigarik woragola-ge, Yakup-nen Yusup yak tosolar-e: ”Kar-e kowerak wam tusuangge mak togolat Sikem worali ereba iniyil mbiri-o” luk yak tosoloma-ge, Yusup-nen-e ”Ob-o” yij-o.

¹⁴ Eid-nen yosolar-e: ”Kat mburugundig-e, kowerak min wam min konak worali, lak? Are, nggesa worali? mbi mburugundik, eneyami mbatluk, an yak niril lobok yi-o” yosoloma, eid-nen wirik pamu, Eboron-nen Yusup na-ge mberarik, owerak endam Sikem wok yij-o.

¹⁵ At na mborosolat owerak onkore ponok nggwe mbitlik, ponok nggwe mbitlik, irit mborosoma-ge, ap misik imin lid pid yosolar-e: ”Kar-e no kore yusu-o?” luk yij-o.

¹⁶ Yosoloma, Yusup-nen yosolar-e: ”An-e nowerak wam ndogorogolat yeba woragola, onkore lobok yusu-o. Nde, it worali-ge kar-e karu, lak?” luk yak tij-o.

¹⁷ Yosoloma, ap iri na-nen yosolar-e: ”Ir-e yu me-nen mbiriga-o. It-nen yogolar-e: ’Nir-e o Ndotan mbitli-o’ luk yogola kuligi-o” yosoloma-ge, Yusup na-ge inmbirik muk eneyagarik, Ndotan worakmu eneyagaij-o.

¹⁸ Nde, owerak-nen-e Yusup na siyak eleya nggal lobok yosola karug-e, wururak wene mbariga-o.

¹⁹ Iri yogolat-nen it nak yak kerak mbogolar-e: ”Nabi kaso nap na lobok yusu iri ker-o!

²⁰ Mondok wosa yulndik, yi mbun emnde mbaridnak sa eberek yidnak arem mberak puruk, ’Lag-o. Singa ndakngge-nen nenggamu-o’ yuwog-o. At nabi kasu iri na mbi ebe kwat ma, lak? Kujwok-nen-o” luk yiga-o.

²¹ Nde, owerak erep-nen wene iri na mbarogola-ge, Uruben-nen kulurug-e, Yusup na nggesa-nen imiri yimin-o? luk indi konosolat-nen yosolar-e: ”Abu wururag-e bug-o.

²² Are, at wirigit na lak, mep tak na pigit lag-et yi mbun emnde mbaridnak arem nak mberak puwog-o” luk Uruben-nen yij-o. Nde, iri yid iri-ge mbik mbok imiri yaga eid eram o ma nggwe wirik purak puruk-nen yij-o.

²³ Nde, Yusup na mberarik, owerak endam wok yosoma-ge, it-nen-e usum konak na-ge ndela yunggwiriga-o.

²⁴ Yonggora keya buruk, Yusup na-ge lit karuk mbirigarik, yi emnde mbaridnak mbun eberek yidnak iri na arem mbo bil nggwiga-o.

²⁵ Mberak pil nggurug-e, it na nunggwi mende nonggolat worakmu-ge, ereya na-net Ismael-nen wigarak Nggileat nggwe-nen Mesira mborogola, eneyaiga-o. Onowam unta wam ereba na ombol pem-e emben worak undurak pugwi mende min anggut engen lerak min onowam unta wam ereba na bem puruk mborogola-ge,

²⁶ Yewura-nen anggamirak yak ondosolar-e: ”No manggim nonowot yu-ge wutluk, yubul purag-o?

²⁷ At yu-ge nit nondomok nonowor-et nde, andi bandi rak purag-e meya-o. Konag-e Ismael nap yeba enpem onggo wanuwog-o” luk anggamirak yak ondosoloma-ge, it-nen-e ”Ob-o” luk yiga-o.

²⁸ Nde, it Mirian nap insilobulo wene wiril nugwi nap ereba na it endam wok yogola-ge, Yusup owerak-nen-e Yusup na-ge yi mbun emnde mbaridnak iri na arem-nen lesa pil luwaruk, Ismael nap enpem at onggo-ge perak posid tol dua pulu irit waniga-o. It insilobulo wene wiril nugwi nap ereba na-nen-e onggo puruk, Mesira wi waruk mbiriga-o.

²⁹ Iri rak pikma nde, at Uruben na-ge lobok yarik, yi mbun emnde mbaridnak sa iri na me wok yarik, lombot pidnggal-e, Yusup lak alama karug-e, indi andi-nen usum ndela bela keya bij-o.

³⁰ Iri rak puruk, owottak endam mberarik-nen yosolar-e: ”La na-ge mberak pidnak sa-ge lak yu-ge, an-e ngge kwarimin-o?” luk yosoloma-ge,

³¹ it-nen-e kambing wam misik wutluk, Yusup usum yunggwirik na-ge wam iri na eyabi arem pil ngguruk,

³² sum eyabi ngin iri na ineid eram waruk mbirigarik-nen yogolar-e: ”Nir-e sum yu nak kaige-o. Sum yu-ge kambara na usum, lak?” yak tiga-o.

³³ Yakup-nen-e sum na-ge ndemeret ambara usum-et karuk-nen yosolar-e: ”Ndemeret an nambara usum-o. An nambara yu-ge ndemeret ndakngge isilepma worak-nen wosa nenggamu-o. O! Nambara ndakngge isilepma worak-nen lebenarik nenggamu-o” yij-o.

³⁴ Iri yosolar-e, Yakup na-ge usum ndela bela keya buruk, indi abi kalak woragolat-nen yurugwi sum karung nggal yutluk, ambara iri na ubud-nen tabun puruk, kwarat woragij-o.

³⁵ Iri kwarosola karuk, ilirak kwami-nen ap-nen lobok luk, indi yanggunidnag-et nde, at-nen yosolar-e: ”An-e iniksa-t worasoma, wat yosolat-nen nak keya bimin-o” yurug-e, ambara Yusup na ebem tabun puruk, pem irit woragij-o.

³⁶ Iri kwarosolat Yakup na worala-ge, Yusup waruk mbiriga na-ge it Mirian nap-nen-e Yusup na-ge Mesira nagawan woraso sa yik karok woragwi san ombo ereba na enanggul pem san ombo nggok Potipat iri na bem onggo waniga-o.