NDAK WIRIDNAK WENE 35 - Nanduk Ngget Tul Pidnak Wene

Yakup-nen lit karuk Mbetel mbiridnak wene 35:1-8

¹ Misik tarem-e Mbal Pem Nagawan-nen Yakup yak tosolar-e: ”An-e kar-e kowe Esau aye-nen lobok yosoma, keram nam yigi Mbal Pem Nagawan iri na-nen yusu-o. Iri ala-ge, kar-e ndag-et nak Mbetel mbiri-o. Mburugundik, iri me woralar-e, an namanggim wam wosa burak ondoro koni-o” yak tij-o.

^2-3 Yosoloma, Yakup-nen at ogwela min at imin worali nap ereba na min oboksa yak ondosolar-e: ”Nir-e yu me-nen Mbetel mburul-o. Mburulndik, Mbetel iri me-nen-e an nebem angin worak mende mbosola yongga norosolat, an yeba waring kasola nggetlel nobosolat kwaroso Mbal Pem Nagawan iri na amanggim wam wosa kan purak ondoro konimin-o. Iri bem-e, kit-nen erembel wanugwi nin ereba-ge mondok mbo burag-o. Kondomoktak-nen kit meya yidnak keya bogolat-nen kwarugwi mende irit kwarer-o. Iri luk, mondok sum marak konak nak yerer-o” luk yak indij-o.

⁴ Yosoloma-ge, it-nen-e erembel wanugwi mende nin ut memera ndak wosa bidnak ereba na oboksa Yakup eram piga-o. Iri-nen it eneyanggo sumbanok min-et yonggora eram pogola-ge, Yakup-nen-e ereba na oboksa-ge o Sikem siri iri na koroga ereba me e nggok misik indipma yapma bij-o.

⁵ Iri rak puruk, Yakup na ilirak inmin nduguluk mborogola-ge, Mbal Pem Nagawan-nen-e o siri ereba me eralu eralu woragwi nap ereba na-ge mondok kwiye elem-nen nak nggetla keya enpamu, it-nen-e Yakup-nen lit karuk mbitli ereba na-ge muk eneyaruk mbirigit lag-o.

⁶ Yakup-nen lit karuk iri na-ge terak irit mbirigarik, Kanaan nggweyak pem Mbetel siri iri na me-t wok yiga-o. Nde, o iri unu nanduk woraso-ge Lus.

⁷ Iri na me wok yogolar-e, Yakup-nen-e wam wosa kan purak ondoro irit kona keya buruk, iri na me unu yarosolar-e: ”El Mbetel” irit yarij-o. Iri yarid iri-ge nanduk at owe Esau aye-nen lobok yosoma, Mbal Pem Nagawan at imbiri bem nam yidnak sa ala karuk, irit yarij-o.

⁸ Iri me worakmu-ge, Iripka nggok tak pid kwe Ndebora iri na-ge wat yamu, o siri iri me abare ena (selatan) ambigit e nggok indipma yapma ibiga-o. Iri kwaridnak sa ala karuk, e iri na unu yarogolar-e: ”Yip tugwi e” irit yariga-o.

Mbetel iri me-nen Mbal Pem Nagawan-nen Yakup imbiringgat tak pidnak wene 35:9-15

⁹ Nde, Yakup iri na tuguruk Mesopotamia-nen lobok yosola-ge, Mbal Pem Nagawan iri na-ge tuguruk Yakup imbiri bem nam yosolar-e, imbiringgat tak ibij-o.

¹⁰ Iri yosolat, Mbal Pem Nagawan-nen Yakup yak tosolar-e: ”Yawo-nen kat kunu-ge Yakup iri na-ge lag-o. Alat nde, kunu-ge Isarael yurag-o” luk yak tij-o. Iri nggal kwasa Mbal Pem Nagawan-nen at unu Isarael yarij-o.

¹¹ Nde, Mbal Pem Nagawan-net tuguruk yak tosolar-e: ”An-e Mbal Pem Nagawan Mondok Namawi Worak-nen yusu-o. Kat-nen wigarag-e kwarat mag-o. Kat karem-nen ap enlem kwarat mborosolat, nagawan nagawan onmbo kek tak irit kwat yugun-o.

¹² O nggweyak Abarakam min Isak min wok indigi nggweyak yu-ge kat min kat-nen wigarak min irit wok kindimin-o” luk yak tij-o.

¹³ Iri yak turug-e, Mbal Pem Nagawan iri na-ge mbirij-o.

¹⁴ Nde, Mbal Pem Nagawan-nen Yakup wene yak tid sa iri na me-ge Yakup-nen-e: ”Iri kwaridnak sa-o” luk yogolat wolmomtak kerep misik sindik pij-o. Nde, kerep iri na Mbal Pem Nagawan amanggim posolar-e, Yakup-nen-e anggut amburu min e saitun amburu min kerep iri na bem kilik pij-o.

¹⁵ Nde, o iri na me unu-ge Mbetel irit yarij-o.

Kwe Arakel iri na wat yidnak wene 35:16-22

¹⁶ Iri na kwatluk ombol nggwe-ge Yakup iri na-ge at-nen lit unpuruk ap erep ereba na inmin-e Mbetel-nen mborogolat o Eperata wok yigit lak awo ma irit mburukmu-ge, kwe Arakel iri na-ge la ndagurak yane wirij-et nde, ndakit lak yane nak wat tenak woragij-o.

¹⁷ Nde, kwe iri na la yane wat tenak siri mbosoma-t nde, li ndakola yongga ondoso kwe misik-nen yak tosolar-e: ”Tugurug-et liap misik ndakun-o. Iri ala-ge, kar-e kalen ki-o” yak tij-o.

¹⁸ Alat nde, kwe Arakel iri na komo wat yekluk abu indisep worok yekluk yosolar-e, la iri na unu-ge Mbenoni yarij-et nde, eid-nen-e unu-ge Mbenyamin yarij-o.

¹⁹ Iri luk, Arakel iri na wat yosola-ge, o Eperata mburugwi tula ambanggoma irit yapma biga-o. Nde, iri na me unu yawo-nen yogolar-e, Mbetleyem yili irir-o.

²⁰ Nde, Arakel yapma bidnak sa iri na me-ge Yakup-nen yenggerak purak kerep misik pamu, yawo-nen na kerep iri-nen Arakel yapma bidnag-e yenggerak pili-o.

²¹ Tundumu iri kwatlug-e, Yakup-nen nduguluk iri na-ge mbirigarik, o mot wiril laidnak unu-ge Endet iri na keya buruk mbirigarik, o lije sum wi wiril lobok yiga-o.

²² Nde, it iri na o lije sum wi wutluk iri me woragolar-e, Uruben iri na-ge kwe Mbilka, eid-nen imin nene yoso iri na imin nene yij-o. Iri wene Yakup-nen kulurug-e, mondok isilepma kwarat yij-o. Nde, Yakup iri na-ge ilirag-e ap nak duabelas irit woragij-o.

Yakup ilirak onowene 35:23-26

²³ Nde, kwe Lea-nen nderag-e: Uruben (Yakup ambara manggiya) min Simeon min Lewi min Yewura min Isakat min Sebulon min

²⁴ nde, Arakel-nen nderag-e: Yusup min Mbenyamin min

²⁵ nde, Arakel ndegel oboso kwe Mbilka-nen nderag-e: Ndan min Naptali min

²⁶ nde, Lea ndegel oboso kwe Silpa-nen nderag-e: Nggat min Aset min irir-o. Nde, li yeba-ge oboksa Mesopotamia-nen nderak nag-o.

Isak wat yidnak wene 35:27-29

²⁷ Nde, Yakup na-ge nanduk ombo Abarakam woragid sa iri na me-t at eid Isak na-ge o Mamere Eboron koroga iri na me-t worasoma, eram wok yij-o.

^28-29 Nde, Isak iri na-ge olengen seratus delapan pulu (180) irit worasolat, indi worak luk irit wat yamu, ambararak Esau min Yakup min-nen yapma ibiga-o.