NDAK WIRIDNAK WENE 34 - Nanduk Ngget Tul Pidnak Wene

Ap Sikem amawi bem nak Ndina tenagidnak wene 34:1-31

¹ Misik tarem-e Yakup ogwe Lea min enara Ndina iri na-ge Kanaan ligwami ereba na endam mbirij-o.

² Mberamu-ge, o iri me nagawan Ewi nap Emot ambara Sikem-nen Ndina iri na karug-e, amawi bem nak mbaluk mberarik, tenagij-o.

³ Iri lug-et nde, at indi-ge Ndina ebem wat tak purug-e, at Ndina-nen indi at ebem purak pem tula kore yosolat woragij-o.

⁴ Iri kwarosolat Sikem-nen eid Emot iri na yak tosolar-e: ”An-e lagwe ndugum yu-t wanurak nindi ebem pigirik me, kar-e lagwe irit wok nururak wene mbarurag-o” luk yak tij-o.

⁵ Nde, Yakup-nen kolosolar-e, at ara iri na amawi bem nak tenabosolat it unnu marak woraso iri na-ge mbilaro ngin tak pidnak wene irit kulij-o. Kulurug-e, at-nen wene mbarurak iri na-ge at ilirag-e karu me ereba onlomba wam tusuangge mak togolat woragola, enpalma ala karuk, lobok yuwakluk larok nak yij-o.

⁶ Iri kwasa worasoma-ge, Sikem eid Emot iri na-ge Yakup min wene mbarurak irit lobok yarik worasoma-ge,

⁷ iri na tarem-et Yakup ilirak lomba wam tusuangge mak togolat woraiga ereba na-ge lobok yiga-o. Lobok yogolar-e, wene iri na kulurug-e, wendet luk-nen yogolar-e: ”Noluk-nen Yakup ara na-t nde, Sikem iri-ge amawi bem nak Ndina iri na tenabosolat Isarael nap unnu marak iri na kopkap tobok tak pij-o?” luk mondok insilepma kwarat yiga-o.

⁸ Alat nde, Emot-nen Yakup yak tosolar-e: ”Nab-o. An nambara Sikem iri-ge kat kara iri ebem indi mbinggirik pidnak me, kat kara iri-ge an nambara wanurag-e nunggwirig-o?

⁹ Nab-o. Yawo-ge nit nenmbereg-e wene mbarak puruk, nit nennggendumu kwe-ge wok kerak mbuwag-o.

¹⁰ Iri kwasa wok kerak mbogolar-e, kir-e o yeba me lambuksa woragolat, kit-nen o kinndi-nen wolmomtak peragup sa woragolat, yi mende ndi mende ombo yogolat, ereb-e onggo wanogolat worabog-o” luk yak tij-o.

¹¹ Yak tosola, Sikem-nen Ndina eid Yakup min owerak ereba na inmin yak ondosolar-e: ”Kit-nen nde an-nen yak kindigi ndak ndak kwarogola-ge, kit-nen nggi yugup mende-ge wog-et kindimin-o.

¹² Yak nerer-o. Kit-nen-e no mende we wok kundurak perali-o? Kwe onggo na ’Iri nggal purag-o’ luk unu yarak per-o. Iri yogola-ge, kit-nen nggi yugup mende-ge ndak ndag-et wok kindimin-o. Mbigija-ge lagwe iri wok nurugup iri nag-o” luk yak indij-o.

¹³ Nde, Sikem-nen it onowot Ndina unu marak woraso iri na mbilaro ngin tak pidnak pem-e Ndina owerak-nen-e Sikem min eid Emot min enesiget wene yak indiga-o.

¹⁴ Enesiget wene yak ondogolar-e; ”Nit-nen: ’Iniye ambasap mbarugwi buk nap iri wani-o’ luk nit-nen nonowot yak turak iri-ge nir-e ninnggiri-o.

¹⁵ Kit-nen yigep iri ’Ob-o’ yurak iri-ge wene yu kwarogola-nen perak ’Ob-o’ yak kundul-o. Nit-nen kwarugwi nggal kit kennggendumu ab-e oboksa kiniye ambasap mbarurag-o.

¹⁶ Kit-nen iri kwarogola-nen perak kwe-ge wok kerak mburag-o yigep iri-ge wok kerak mbogolat, nit na kit kennggendumu pem irit woragolat, kit kinmin nenlem misiget kwat mul-o.

¹⁷ Alat nde, kit-nen nde nit-nen kwarugwi kwarigit lak yogolat, kiniye ambasap mbarigit lak yogola-ge, nonowot iri-ge tuguruk lit yaga wanuruk, mburul-o” luk yak indiga-o.

¹⁸ Yogolikma, Sikem min Emot min-nen peragolar-e: ”It-nen yiga wene iri na-ge ndag-er-o” luk yebet kaiga-o.

¹⁹ Iri yogola-ge, Sikem-nen-e indi-ge kwe Ndina iri na ebem mbinggirik pidnak pem-e at-nen-e it-nen yiga iri na kwarurag-e ober-o luk peragij-o. Nde, at owe owot ennggendumu-nen-e mondok ene kulugwi-ge Sikem irit woragij-o.

²⁰ Iri yogolug-e, Sikem min Emot min ereya na-ge ap wene mbarugwi sa o siri pak tumende bem mbirigarik, iri me woragwi nap ereba na-ge yu nggal yak indiga-o:

²¹ ”Nde, it Isarael nap iri-ge nit nennggamtak-net yili-o. It iri-ge o yeba me wolmag-o. Woragola-ge, kinggi ya bugun kuwok ya bugun iri keya buruk, it inndi-nen pidnak irit kwarogolat wolmakluk keya unpurag-o. It wolmomtak na o yu-ge nggweyag-e terak-nen yusu-o. Iri nggal kwasa woragola-ge, nit-nen it intid ndugum wanogolat, it-nen na nit nintid ndugum wanogolat kwarurag-o.

²² Alat nde, it iri-nen nit ninmin woragolat, nit ninmin enlem misiget kwat yogolat yurak iri-ge mbigija-ge nit nennggendumu ab-e oboksa it-nen kwarugwi nggal iniye ambasap mbaruruk iri nag-o.

²³ Iri-nen it-nen idnak onowam oro ereba na nit nenarengge yosolat, it enarengge mende na nit nenarengge kwat yosolat irit ma-o. Iri bem-e it-nen nit nennggendumu wolmakluk, it-nen yidnak wene irit kwarogolat wolmog-o” luk yiga-o.

²⁴ Iri yogola karuk, iri me woragwi nap oboksa ndok wiriga ereba-nen-e Sikem min Emot min-nen yiga iri na-ge ’Konag-er-o’ luk, iri me woragwi ap indi worak ereba na-ge oboksa iniye ambasap mbaril lobok yiga-o.

²⁵ Mbatluk, kenan nene yogolar-e, iniye ambasap mbariga ereba na-ge mondok andi-nen yane wat tenak worakmu, Ndina iridtak mberen Yakup ambararak Simeon min Lewi min ereya na o silmu yalawi lit kuruk, mbik mbok o siri iri na me nggogolar-e, iri me woraiga nap oboksa indiga-o.

²⁶ Ondogolar-e, Sikem min Emot min ereya na indigar-o. Unduruk, onowot Ndina iri na-ge Sikem ama-nen waruk mbiriga-o.

²⁷ Ap ereba na unlusu mbatlug-e, Yakup ilirak erep ereba na-nen-e it onowot Ndina iri unu marak woraso mbilaro ngin tak piga ereba na kemnggo it enarengge mende obok mengga waniga-o.

²⁸ Mengga wanogolar-e, kambing min lomba min oro ereba na min sapi min kelerai wam min o siri iri me woraso min nggweyak iri me woraso min oboksa waniga-o.

²⁹ Yi mende ndi mende onggo nggok pugwi ereba na min kweyap min li marik min oboksa ininggiyapma rak puruk larok yiga-o. Iri yogolar-e, o siri iri me woraso mende oboksa mengga wanuruk, mbiriga-o.

³⁰ Iri yogola, Yakup-nen Simeon min Lewi min yak ondosolar-e: ”Kir-e an nebem nak angin pigeb-o. Nde, yawo-ge Kanaan nap min Peris nap min o yu me woragwi nap oboksa min-e an-e insili rak nubuwa-o. Nde, nit nab-e mariget nak me, iri me woragwi nap nde lambuk yogolat nit nondogolar-e, nit nonkwela inmin-e mondok lak tak nunpuwa-o” luk yak indij-o.

³¹ Alat nde, it-nen onggo yogolar-e: ”Nit nonowot iri-ge terak waring kagwi kweyap nggal kwat obogolat wolmakluk keya unpurag-e lag-o” luk yak tiga-o.