NDAK WIRIDNAK WENE 33 - Nanduk Ngget Tul Pidnak Wene

Yakup-nen Esau imin lambuk yidnak wene 33:1-20

¹ Yakup-nen yik kagaidnggal Esau na-ge ab-e empat ratus (400) inmin lobok yosola karug-e, Yakup-nen-e ilirak ereba na-ge weyara Lea min Arakel min ndegel ubugwi kweyap mberen ereya na min endam lombok tak inpil lobok yij-o.

² Iri rak purug-e, ndegel ubugwi kweyap mberen ya na inlirak inmin ndegera-ge nanduk tak inpij-o. Iri nggal-et Lea ilirak inmin na enggendumu rak unpuruk, nde, Arakel ambara Yusup min-e abok tak inpij-o.

³ Iri rak unpuruk, Yakub-e nandug-et owe na eram panggo panggo-t mborosolar-e, owe ambigit erare nggwe tuju bem tud yil yal mbirij-o.

⁴ Alat nde, Esau na-ge ndag-et lilumbu lobok yosolar-e, Yakup wa yak tosolat, paluk tij-o. Iri yogolar-e, yip mak kerak mbiga-o.

⁵ Iri luk Esau-nen kwami ereya na min li marik min eneyarug-e: ”Kat kimin yeba-ge tarag-o?” yosoloma, Yakup-nen onggo yosolar-e: ”Yeba-ge an nilirak, Mbal Pem Nagawan-nen wok niridnag-er-o” yak tij-o.

⁶ Yak turug-e, ndegel ubugwi kweyap mberen ereya na inlirak inmin lagolat na, Esau eram tud luk,

⁷ Lea ilirak inmin lagolat na iri nggal-et kwatluk, abok woroksa-ge Arakel ambara Yusup min lagolar-e, eram tud yiga-o.

⁸ Iri lug-e Esau-nen kin wanosolar-e: ”Nde, no peraruk-nen wam ereba-ge arik tak lena mbo nduguluk neram wok yogola kagi-o?” yosoloma, Yakup-nen onggo yosolar-e: ”Nowe kindi alen makluk-nen kwaridnag-o” luk yak tij-et nde,

⁹ Esau-nen yosolar-e: ”Nowor-o, an narengge-ge abu ndak worasu-o. Mondok wok nururag-e lag-o. Kabalombog-o” yak tij-o.

¹⁰ Yak tosoloma, Yakup-nen yosolar-e: ”Nowe kar-e kindi alen tak posolat wok korosola-t nde, kar-e noluk-nen ninggem keya busu-o? Mondok wani-o. Kar-e an nimin konag-et kwarosola keyasolar-e, kerare-ge Mbal Pem Nagawan erare yik kaidnak nggal-et yik keyasu-o.

¹¹ Nab-o. An waruk lobok yigirik, wok kirigi mende ereba-ge mondok wani-o. Mbal Pem Nagawan-nen an nimin konak yosolar-e, an-nen ukwe kaso mende obok wok neramu me, kar-e ninggem keya busu-ge meyog-o” luk owe indi yanggunid yanggunid abok nggwe-nen-e Esau na-ge wok tid ereba na-ge wanij-o.

¹² Wanuruk, Esau-nen yosolar-e: ”Nab-o. Yawo-ge mburuwog-o. Nde, nimbirik mboroboluk an-e nandug-et mburusu-o” yak tij-o.

¹³ Yak tosoloma, Yakup-nen yosolar-e: ”Nab-o. Li marik ereba na enmawi lak kasu irir-o. Nde, an-e nowam amarik ngget nderak yeba oboksa nari wari neyasu yur-o. Nde, an-nen nde ndag-et ndag-et suluk mborosolar-e, misik tarem mbiridnak pem-et nowam oboksa wat ma-o.

¹⁴ Iri ala karuk, nab-o. Kat nandug-et mbiri-o. An-e erog-et kimbirik kat o Erom worasoma, lomba wam min kambing wam min li marik yeba min nduguluk kimbirig-et wok mul-o” yij-o.

¹⁵ Yosoloma, Esau-nen yosolar-e: ”Iri ala-ge, an nilirak ereb-e kat ndegel kuburuk mbururak keram keya inpimin-o” yosoloma, Yakup-nen yosolar-e: ”Nab-o. No manggim-o? An-e kat kindi alen tak purak iri nak perasu-o” yak tij-o.

¹⁶ Iri yak tosoloma-ge, Esau na-ge iri na tarem-et o Erom tuguruk mbirij-o.

¹⁷ Alat nde, Yakup na-ge o Sukot mberarik, iri me o wutluk woralar-e, lomba wam min kambing wam min uwi wirij-o. Iri kwaridnak sa ala karuk, o iri na unu-ge Sukot yili-o.

¹⁸ Yakup na-ge Mesopotamia-nen konag-et lobok yarik, o Kanaan nggweyak pem o Sikem woklug-e o iri koroga tusuangge worak sa ereba-t o lije sum wi wirij-o.

¹⁹ Nde, nggweyak o lije wirid sa iri-ge onggo-ge perak tol seratus pem ap Sikem eid Emot-nen wigarak enpem onggo pij-o.

²⁰ Nde, iri na me Yakup na woralar-e, Mbal Pem Nagawan amanggim wam wosa kan purak ondoro ndama pil laruk, unu yarosolar-e, EL iri-ge Isarael Embal Pem Nagawan-o luk yarij-o.