NDAK WIRIDNAK WENE 32 - Nanduk Ngget Tul Pidnak Wene

Yakup-nen Esau imin lambuk yurak pem lid lud tak pidnak wene 32:1-21

¹ Nde, Yakup na-ge tu wanarik ama mborosoma-ge, aid nab-e at imin lambuk yiga-o.

² Lambuk luk, Yakup-nen yik eneyasola-nen perasolar-e: ”Yu me-ge Mbal Pem Nagawan woraso sa me, o yu me unu-ge Makanaim-o” luk yarij-o.

³ Iri lug-e, ap ereb-e owe Esau eram o Erom wi nanduk wirik inpij-o.

⁴ Wirik onposolat-nen yak ondosolar-e: ”Wene-ge yu nggal an nowe Esau yak turag-o. ’Ndegel koboso nap an Yakup na-ge Laban eram-et woragirik, lobok yusu-o.

⁵ Woralar-e, sapi wam min kelerai wam min lomba wam min kambing wam min ndegel nubugwi nap min kwarat ombo yigi-o. Nde, wene-ge an kindingen tak nobonok-nen an nanggul pem kek tak Esau yak kurusu-o’ luk Esau yak ter-o” luk yak endamu mbiriga-o.

⁶ Nde, mbiriga na tuguruk Yakup eram lobok yogolat-nen yogolar-e: ”Nde, nir-e kowe Esau na eram wok luk lobok yili-o. Nde, yawo-ge ab-e empat ratus (400) inmin luk, kat kimin lid pid yuwokluk lobok yusu-o” luk yiga-o.

⁷ Nde, wene iri na kuluruk, Yakub-e umud kwarat yosolat kwiye yij-o. Iri yosolar-e, at imin worali nap ereba na-ge menggesa kere mberen tak puruk, lomba wam min kambing wam min sapi wam min unta wam min ereba na iri nggal-et menggesa mberen tak pij-o.

⁸ Iri kwarid iri-ge Yakup-nen yebet kasolar-e: ”Esau-nen ap nggubunuruk lobok yosolat, nde, it kere nanduk yidnak iri na nde ondosola-ge, it abok yidnak ereba na-ge kwiye mburuwa-o” luk yebet kagaij-o.

⁹ Nde, Yakup-nen tepan yosolar-e: ”Nombo Abarakam min neid Isak min-nen kek tak kubugwi Mbal Pem Nagawan wa-e. An nene kwara kuli-o. Nagawan Indo kat-nen-e: ’Kowe kowot endam tuguruk kama mburugunmu-ge, yi mende ndi mende oboksa bem-e kat kamanggim-e konak nak kwarosolat woramin-o’ luk urul yak nirigen-o.

¹⁰ An nggal-et nde kat-nen nabuwa kasolat, an nimin pem kundik worasu yu-ge mondok ijar-o. Nde, an nanduk mborosolat yi Yareren mbarosolar-e, silobulo mbi waruk mbirigir-e lag-o. Are, wangun nak ninggem mbirigi-t nde, yawo an tuguruk lobok yusu yu-nen-e kere mberen tak puruk lobok yusu-o.

¹¹ Nde, nowe Esau lobok yosolar-e, kwami-nen li marik-nen nit pidsa nunduwa-o luk an-e kwiye kwarat yusu-o. Iri ala-ge, an nowe Esau emndam-nen nimiri yi-o luk kemengen mbarusu-o.

¹² Nagawan Indo kat-nen-e: ’Kat kamanggim-e yi mende ndi mende oboksa konak nak kwat kobosolat, kat-nen wigarak yi sisiri nggal kwarat tak posola, ap-nen wonarurag-e mondok meya-o’ luk urul pigen iri na yebet karuk, yongga niri-o” luk tepan yij-o.

^13-15 Nde, Yakup na iri me nene lug-e, at arengge ereba na-ge ereb-e owe Esau amanggim lenak posolar-e, kambing wam kowag-e dua ratus (200), nde, kusi-ge dua pulu (20), nde, lomb kowag-e dua ratus (200), nde, kusi-ge dua pulu (20), unta marik min mendaso ija-ge tiga pulu (30), nde, sapi wam kowag-e empat pulu (40), nde, kusi-ge sepulu, nde, kelerai wam kowag-e dua pulu (20), nde, kusi-ge sepulu irit lenak pij-o.

¹⁶ Nde, wam ereba na-ge lena oro arik tak puruk, oro misig-e at ndegel oboso nap misik inggem puruk, nde, misig-e, at ndegel oboso nap misik inggem puruk, iri kwasa ndegel ubugwi nap ereba na ininggem pil lobok lug-e, at-nen yak ondosolar-e: ”Kir-e wam lena wok kindigi yeba waruk nanduk mberer-o. Nde, mborogolar-e, we kasa tabuk mbururak pug-o. Are, mborogolar-e, lena mbo wam min ndegesa nanduk mborogola, iri nggal-et wam min ndegesa abok lena mborogola, iri nggal kwasa kuri wat kerak mbururag-o” yak indij-o.

¹⁷ Yak unduruk, ndegel oboso nap wam erep waruk nandug-et mbururak lenak pid nap iri na yak tosolar-e: ”An nowe Esau-nen nde ’Kar-e ta ndegel oboso? Nde, kar-e ngge me mburusu-o? Nde, wam yeba ombo-ge ta-o?’ luk kin wok kobosola-ge,

¹⁸ kat-nen onggo yosolar-e: ’Lag-o. Yeba-ge ndegel koboso nap Yakup arengge-o. At-nen ndegel oboso nap Esau amanggim pamu, waruk lobok yili-o. Nde, ndegel oboso nap Yakub-e ninmbirik lobok yusu-o’ luk yak ti-o” luk yak tij-o.

^19-20 Iri yak turuk, ndegel oboso nap wam waruk at nanduk iri imbirik mbururak nap na wene-ge at nanduk mbururak nap yak tid iri na nggal nag-et yak turuk, it oboksa wene misiget iri na nag-et yak indij-o. Nde, Yakup-nen iri kwarid iri-ge Esau na amanggim pidnak ereba karuk, indi yanggorak pem at imin lambuk makluk iri kwarij-o.

²¹ Nde, Esau amanggim wam pid ereba na-ge nanduk waruk ndimirik unpurug-e, o lije ma at woraso sa iri na me arig-et nak nene yij-o.

O Piniel-nen Yakup aid nap imin yig nggwidnak wene 32:22-32

²² Nde, Yakup na nene yij-et nde, kubu men yosolar-e, ogwerak mberen min ndegel ubugwi kweyap mberen min ilirak sebelas ereya na min yi Yabok iri na mbara ndegera inpil ndil larug-e,

²³ tuguruk aringgi arengge ereba na ndegera pil ndil laruk yarik,

²⁴ at arig-et nak worasoma-ge, ap misik lobok yarik, enmberek yig nak nggwerenak irit worakmu o miyak yij-o.

²⁵ Ap iri na-nen lombot pidnggal-e, ar-e ombol nggwe yurag-e lag-et karug-e, Yakup ubugulwak lel kagaidnggal, ubugulwak kundid iri na yoroksa keya bij-o.

²⁶ Nde, ap iri-nen yosolar-e: ”Yawo keya nibi-o. Abu mo yarurak kwat yij-o” luk Yakup yak tij-o. Yosoloma, Yakup-nen yosolar-e: ”Nab-o. Kat-nen nde imbiringgat nebem pigit lak ma-ge, mondok keya kibimin pug-o” luk yak tij-o.

²⁷ Yosoloma, ap iri na-nen Yakup yak tosolar-e: ”Kat kunu-ge ta-o?” yosoloma-ge, ”An nunu-ge Yakub-o” luk yij-o.

²⁸ Yosoloma, ap iri na-nen Yakup yak tosolar-e: ”Kar-e Mbal Pem Nagawan min ki nap min inmin-et yig nggwigen-et nde, kar-et ombol nggwe yidnak me, kunu-ge Yakup iri-ge lag-o. Yawo-ge kunu-ge Isarael kwat yij-o” luk yak tij-o.

²⁹ Nde, Yakup-nen yosolar-e: ”Kat kunu yi-o” yij-et nde, at-nen yosolar-e: ”Kar-e no manggim an nunu karu yurak yusu-o?” yak turug-e, Yakup na imbiringgat tak ibij-o.

³⁰ Nde, Yakup-nen yosolar-e: ”An-e Mbal Pem Nagawan kagi-t nde, nurug-et worasu-o” yosoluk, o yig nggwisa sa iri na unu-ge Piniel irit yarij-o.

³¹ Nde, mo na kona pil wasola-ge, Yakup na-ge ubugulwak kundik iri na yorok tak pidnak me, o Piniel-nen mborosolar-e, ya langgok irit mbirij-o.

³² Iri kwaridnak me, yawo-nen na Isarael-nen wigarak-nen-e wam elepwak kundidnak sa uno-ge mondok nunggwi bug-o. Nde, iri-ge Yakup ubugulwak yoroksa wiridnak ala karuk-nen keya bugwi-o.