NDAK WIRIDNAK WENE 30 - Nanduk Ngget Tul Pidnak Wene

¹ Alat nde Arakel na-ge la ndakit lak irit woralar-e, ambap iri na bem erengen ale posolat-nen Yakup yak tosolar-e: ”La misik ndak niri-o. Lak nde ala-ge, an-e mondok wat yeg-o” luk yak tij-o.

² Yosoloma, Yakup isilepma Arakel ebem posolat-nen yosolar-e: ”An-e Mbal Pem Nagawan-e lag-o. Kar-e Mbal Pem Nagawan-net la ndagurag-e lak tak kubusu-o” luk yak tij-o.

³ Yosoloma, Arakel-nen yosolar-e: ”An ndegel noboso kwe Mbilka yu-nen la ndaguwak-nen imin nene yi-o. An-e at ebem-nen la ija kwat yek-nen-o” yak tij-o.

⁴ Iri luk, Arakel-nen-e at ndegel oboso kwe Mbilka na Yakup wok tamu, imin nene yij-o.

⁵ Nde, kwe Mbilka na abila luk, li ap misik ndagij-o.

⁶ Arakel-nen yosolar-e: ”Mbal Pem Nagawan-nen wene mot mot nak nebem mbarosolar-e, an-nen nggi yak tigi wene kuluruk, nambara wok nirij-o” luk la na unu-ge Ndan yarij-o.

⁷ Iri luk Mbilka na tuguruk abila luk, li ap misik ndagosola,

⁸ Arakel-nen yosolar-e: ”An-e nambap min yig mbarosolar-e, mondok kwarat namawi kwindigi an-net ombol nggwe yigi-o” luk la na unu-ge Naptali yarij-o.

⁹ Nde, kwe Lea na-nen ondomok abage mbaridnggal ar-e li ndagurag-e lag-et karug-e, at ndegel oboso kwe Silpa na-ge Yakup wanuwakluk wok tij-o.

¹⁰ Wok tamu Silpa na-ge li ap misik ndagij-o.

¹¹ Ndagamu-ge, Lea-nen yosolar-e: ”An-e imbiringgat worak yigi-o” luk la iri na unu-ge Nggat yarij-o.

¹² Iri luk, Silpa na-ge tuguruk li ap misik ndagij-o.

¹³ Ndagamu-ge Lea-nen yosolar-e: ”An-e nalen kwarar-o. Nde, kweyap erep-nen an nimin yogolar-e: ’Ar-e alen kwarat worag-o’ yuwa-o” luk la iri na unu-ge Aset yarij-o.

¹⁴ Nde, misik tarem-e mbato mbarugwi tarem Uruben na yapmu ereba waring kasoma-ge, tusuangge obat mbi karug-e, waruk lobok yarik ija Lea eram wok yosoloma-ge, Arakel-nen Lea yak tosolar-e: ”Obat kambara-nen kagaid iri-ge siyak an wok niri-o” yak tij-o.

¹⁵ Yosoloma, Lea-nen yosolar-e: ”Kar-e an nun iri wanigen-et nde, kebem-e lasu bug-a? Nde, yawo-ge tugurug-et an nambara-nen wanid tusuangge obat yu-t wanurak yusu yu-ge ngge-o?” luk yak tij-o. Yak tosoloma, Arakel-nen onggo yosolar-e: ”Kat-nen nde kambara-nen wanid tusuangge obat iri siyak wok norosola-ge, yawo kubu-ge Yakup kimin nene yuwa-o” luk yak tij-o.

¹⁶ Iri luk worasoma, keyama nggwe Yakup na yapmu nggwe-nen lobok yosoma-ge, Lea-nen Yakup imin tak puruk-nen yak tosolar-e: ”Nambara-nen tusuangge obat mbi kagaid iri na bem nimin nene yurak onggo pigirik me, kar-e nimin nene yurag-o” yak tosoloma, Yakup na-ge Lea imin nene yij-o.

¹⁷ Mbal Pem Nagawan-nen Lea-nen tepan yidnak wene kuluruk, Lea na abila luk ambara misik lima rak posolat ndagij-o.

¹⁸ Lea-nen yosolar-e: ”An-nen Silpa na nun eram kegera wok tigi bem-e Mbal Pem Nagawan-nen onggo wok nirij-o” luk la iri na unu-ge Isakat yarij-o.

¹⁹ Iri luk tuguruk Lea na abila luk ambara misik enam tak posolat ndaguruk-nen

²⁰ yosolar-e: ”Mbal Pem Nagawan-nen-e we wok ondoso mende konak lombok irit wok nirij-o. Nde, yawo-ge an nun-nen-e an-e nilirak ap nak enam ndaki bem-e nun-nen-e indingen tak nobosolat, kek tak nubusu-o” luk la iri na unu-ge Sebulon yarij-o.

²¹ Iri luk tuguruk Lea na abila luk lagwe misik ndaguruk unu-ge Ndina yarij-o.

²² Nde, Arakel na Mbal Pem Nagawan-nen indi yebet karug-e, at-nen tepan yoso iri na kulurug-e, la ndaguwakluk la wi tu kuwarak pamu,

²³ Arakel na-ge abila luk li ap misik ndaguruk, Arakel-nen yosolar-e: ”An-e la ndagurak pem-e imbiri lamut woraso iri na-ge Mbal pem Nagawan-nen lak tak nibij-o.

²⁴ Nagawan Indo-nen li ap misik tuguruk wok nuruwag-o” luk la iri na unu-ge Yusup yarij-o.

Wam ombo yurak pem Yakup min Laban min wene mbariga wene 30:25-43

²⁵ Kwe Arakel-nen la Yusup na ndaguruk woragolar-e, Yakup-nen Laban yak tosolar-e: ”An yawo-ge nama mbereyek-nen lerak nibi-o.

²⁶ Nab-o, an kwarat ndegel kobosolat nirigak mbirid iri-ge karu irir-o. Nogwerak min nilirak min-e kat ndegel kobosolat-nen wok onposolat, ndet onposolat kwarigi nar-o. Nde, yawo-ge wok unpuruk mbereyek-nen keya inpi-o” luk yak tij-o.

²⁷ Yosoloma, Laban-nen Yakup yak tosolar-e: ”Kwara kuli-o. An-nen mbenarosoma-ge, kat kebem-nen Nagawan Indo-nen imbiringgat tak nubusu-o luk naru yusu-o.

²⁸ Iri ala-ge, kat-nen nak: ’Onggo-ge iniksa wok nururag-o’ luk wat tak pi-o. An-e kat-nen yugun irit wok kirimin-o” luk yak tij-o.

²⁹ Yosoloma, Yakup-nen yosolar-e: ”Nimi kar-e karu irir-o. An-e kat ndegel kobosolar-e, kwarat nirigak mbirid nar-o. Nimi kowam an-nen parugu worala-ge kwarat yid nar-o.

³⁰ An lobok yigit lak ma-ge, nimi karengge-ge marig-et woragij-et nde, yawo-ge an nebem-nen Nagawan Indo-nen imbiringgat tak kobosolar-e, karengge kwarat tak pij-o. Nde, yawo-ge an-e nogwela enmanggim yabu wanimin-o” luk yak tij-o.

³¹ Yosoloma, Laban-nen yosolar-e: ”Kat-nen nak yi-o. Onggo-ge no wok kururak perasu-o?” yosoloma, Yakup-nen onggo yosolar-e: ”Nimi-o. Kat-nen onggo wok nururag-e lag-o. Kowam-e parugu-t woramin-et nde, mbigija-ge kat-nen an-nen yak kirimin wene iri ’Ob-o’ yak nurugun iri nag-o.

³² Nde iri-ge yu nde yigi-o: An yawo lomba wam min kambing wam ligik worasu sa ereba mbirimindik, lomba wam amarik miri min kambing wam usul usu kisinggemburuk min wembebenggek min ereba nak ndegera an yabu wanidnak onggo irit wanurak perasu-o, nab-o.

³³ Nde, kat abok nowam limbinil lobok yugunnggal nde kambing wam usu wembebenggek min kisinggemburuk min lomba wam miri min nde lak ala karug-e, ’At yu-ge an nowam yariya wanamu-o’ luk nam-et kagun-o” yak tij-o.

³⁴ Yak tosoloma, Laban-nen erep nggarosolar-e: ”Nab-o. Iri-ge ob-o. Kat yigen irit kwaruwog-o” yij-o.

³⁵ Alat nde, iri na tarem-et Laban-nen-e kambing wam kusi usu kisinggemburuk min miringgubuk loronggubuk min ereba na lena arik tak posolat, kambing wam kowak usu miringgubuk loronggubuk min wembebenggek min ereba na lena arik tak posolat, usu lerensu lena arik tak posolat, lomba wam usu miri lena arik tak posolug-e, ilirak-nen tena wolmakluk lena ininggem pij-o.

³⁶ Iri rak purug-e, it na wam nduguluk mborogolar-e, Yakup aye-nen nggweyak kuri wosa keya bid sa mbiriga-o. Nde, iri me mborogolar-e, kenan nene yugwi-o. Nde, Laban owam erep minggirik ereba na-ge Yakup-nen parugu woragij-o.

³⁷ Woralar-e, misik tarem-e Yakup-nen e awat min mbandam min mberangan min inggi kingga mbarak ereba na wanarig-e, aboro waga yal penggek kal penggek tak puruk,

³⁸ wam yi naso sa ereba na me pil lobok yij-o. Nde iri-ge kambing lomba ereba-ge yi nayekluk lobok yosolar-e, iye naso ala-n kwarij-o.

³⁹ Pamu, wam ereba na nde engen waga pidnak sa ereba na-nen nde iye ninggidnak ala-ge, amarik ndagosolat na usu-ge kisinggemburuk min miringgubuk loronggubuk min wembebenggek min nak ndagosolat woragij-o.

⁴⁰ Nde, Yakup-nen-e lomba wam ereba na-ge lena keya buruk anggul-e ndemera Laban owam kambing wam usu miringgubuk loronggubuk ereba na min miri min ambigit ndimirik posolat kwarosolar-e, at owam min Laban owam min lena arik tak pij-o.

⁴¹ Nde, Laban owam amawi worak kusi ereba na-nen wam iye nasola-ge, Yakup-nen-e e engen wa ereba na abuwok wam yi naso sa posolat woragij-o.

⁴² Alat nde e engen wa ereba na-ge wam amawi lak eralu-ge pigit lak me, wam usu loro amawi lak oboksa iri-ge Laban owam-et woragij-o. Nde, usu miri min miringgubuk loronggubuk min wembebenggek min amawi worak oboksa ereba na-ge Yakup owam-o.

⁴³ Iri nggal kwarosolar-e, Yakup na-ge yi mende ndi mende ombo irit kwat yosolar-e, kambing wam min lomba wam min kelerai wam min ombo yosolat, ndegel ubugwi nap na kwarat winde woragij-o.