Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

NDAK WIRIDNAK WENE 29 - Nanduk Ngget Tul Pidnak Wene


Yakup Laban ama wok yid wene 29:1-14

1 Yakup na mborosolar-e, o Kanaan-nen mo luwaso (timur) ambigit o ereba nggwe-t mbirij-o.

2 Mborosolar-e, mimo yik kagaidnggal-e yabu wanugwi sa ereba me yi mbun nenaridnak mbi kagaij-o. Yi iri na eralu-ge kambing wam min lomba wam min oro kenan irit yud pud kagaij-o. Iri me-nen wam ereba na-ge yi kenangga mak tugwi-o. Nde, yi mbun nenarak iri na-ge, emnde-ge kerep nggok-nen lerak kagaij-o.

3 Nde, kambing wam min lomba wam min ereba na ndok wat yosola-ge, wam yik karok woragwi ereba na-nen-e yi usurup kerep iri na lembera keya buruk wam yeba na yi mak tugwi-o. Mak turug-e, yi usurup kerep na tuguruk lembera lerak pugwi-o.

4 Nde, Yakup-nen wam ndugurugwi nap iri me worali ereba na yak ondosolar-e: ”Nir-e Aran-nen-o” luk yiga-o.

5 Yogolikma, Yakup-nen tuguruk kin wok onposolar-e: ”Kir-e Naot ambara Laban-e kenaru, lak?” yosoloma, it-nen yogolar-e: ”Nenaru-o” luk yiga-o.

6 Yogolikma, Yakup-nen kin wanosolar-e: ”Ar-e ngge kwasa worasu-o?” luk kin wanosoloma, it-nen yogolar-e: ”Ob-et worasu-o. Nde, at ara Arakel-e eid owam kambing min lomba min yi mak turak nduguluk lobok yusu iri yik ki-o” yak tiga-o.

7 Yogolikma, Yakup-nen yak ondosolar-e: ”Kir-e wam mayak pugwi ndak ndag-e awo worala, o lengge-t yu-ge noluk-nen mayak pili-o? Kir-e noluk-nen wam-e yi kenangga mak turuk, tusuangge na tuguruk nujwakluk keya bili bug-o?” luk yak indij-o.

8 Yosoloma, it-nen yogolar-e: ”Nde, lomba wam oro yeba oboksa ndok worasola-net yi usurup lembera waburuk, yi-ge kenangga mak tul-o” luk yiga-o.

9 Yakup na it inmin wene yik tenak worasola-ge, Arakel na-ge kambing wam min lomba wam min nduguluk lobok yij-o.

10 Yakup-nen yik kagaidnggal Arakel na wam nduguluk yi kenanggugwi sa na wok yosola karug-e, mborosolat yi usurup nggelak iri na lembera keya buruk wam yeba na yi kenangga mak tosolar-e,

11 Yakup-nen-e Arakel na paluk tarik alen-nen yip mak tosolat-nen

12 yosolar-e: ”An-e kat keid iri irid Iripka ambara-o” yak tosoloma, Arakel na-ge wene iri na eid yak teyekluk ma pong kil mbirij-o.

13 Laban na ambara Yakup na obok kulurug-e, imin lambuk yurak pem pong kil mberarik, imin lambuk lug-e, Yakup na paluk tarik wa yak turuk, imin ama nggwij-o. Nggwamu-ge, Yakup-nen wene ereba na Laban imbiri bem ndindera yak tosola-ge,

14 Laban-nen-e: ”Ndemerer-o. Kar-e an nambarar-o” luk yij-o. Iri luk, Yakup na Laban imin woralar-e, waneya misik irit woragij-o.


Arakel min Lea min wok unpurak pem Yakup na-ge Laban ndegel obosolat woragid wene 29:15-30

15 Nde, misik tarem-e Laban-nen Yakup yak tosolar-e: ”Kar-e we nimi nambara bem nak we nak an neyabu wanosolat wolmomtak iri-ge meya-o. Kat-nen yabu wanugun pem-e onggo-ge nunggwirik wok kururak perasu-o?” yak tij-o.

16 Laban na iligwami-ge mberen woraiga-o. Ambap unu-ge Lea, Nde, owot unu-ge Arakel irit woraiga-o.

17 Nde, Lea na erengen-e konag-et nde, Arakel-e ebe na konak, erare na mondok kigirik irit woragij-o.

18 Nde, Yakup na indi-ge Arakel wanurak ebem puruk-nen Laban yak tosolar-e: ”Nimi kat-nen nde: ’Arakel wanugun-o’ yosola-ge, an-e ndegel kobosolat olengen tuju woramin-o” yak tij-o.

19 Yosoloma, Laban-nen yosolar-e: ”Ap nin wok undurak perak meya-o. Kat wok kururak iri-ge mondok konag-o. Iri ala-ge, kar-e yu me-t wolmin-o” yij-o.

20 Iri yamu Arakel na wanurak pem yabu kan wanosolar-e, olengen tuju irit woragij-o. Nde, at-nen Arakel wanurak indi wat tak pidnak pem-e at-nen yabu wanosolat olengen tuju-t nde, we marig-et tarem wanidnak nggal irit yik kagaij-o.

21 Nde, Yakup-nen Laban yak tosolar-e: ”Olengen abu tuju woragi-o. Iri ala, nimi kara na wok niri-o” yak tij-o.

22 Yak tosoloma, misik tarem-e Laban-nen kwe Yakup wok teyekluk nunggwi mende nggok sagosolat, o siri iri me woragwi nap oboksa yonggo inpij-o.

23 Alat nde, kubu iri na-ge Laban-nen-e Arakel na-ge keya buruk, Lea na Yakup eram pil lobok yamu-ge, Yakup na-ge imin nene yij-o.

24 (Iri luk Laban-nen-e ndegel oboso kwe Silpa na-ge Lea ndegel obosolat wolmakluk wok tij-o.)

25 Kub-e Yakup-nen piridnggal-e kwe-ge Lea na nde wok tidnak karug-e, Yakup na-ge Laban eram mberarik yak tosolar-e: ”Nimi kar-e noluk-nen yu nggal kwat nibigen-o? An-e Arakel wanurak pem-et yabu kan wok korosolat woragi na-t nde, noluk nimi kar-e namberam laigen-o?” luk yak tij-o.

26 Yosoloma, Laban-nen onggo yosolar-e: ”Nir-e ambap iri na ap wanigit lak worala-ge, owot nanduk ap wok tugwi bug-o.

27 Kindi abu nak wolmin-o. Kwe wanogolat nunggwi mende sakolat tuju tarem woragwi iri na woraruk, i worok yosola-nen-e Arakel na wog-et kirimin-o. Nde, mbigija-ge kat-nen tuguruk yabu wok norosolat, olengen tuju woragun iri nag-o” luk yak tij-o.

28 Iri yosoloma, Yakup-nen-e: Ob-o yosoloma, kwe wanogolat tuju tarem sakwi na ndak yosola-ge, Laban-nen-e Arakel na-ge Yakup wok tij-o.

29 (Wok turug-e, Laban-nen-e ndegel oboso kwe Mbilka na-ge Arakel ndegel ubuwakluk wok tij-o.)

30 Iri yamu, Yakup na-ge Arakel na min-et imin nene yij-o. Nde, woralar-e, indi kundugu-ge Arakel irit woragij-o. Nde, Lea na-ge siyak ombol nggwe nggal woragij-o. Iri yosolar-e, tuguruk Laban eyabu wanosolat olengen tuju woragij-o.


Yakup-nen elirak ndet inpidnak wene 29:31–30:24

31 Nagawan Indo-nen yik kagaidnggal-e, kwe Lea na-ge Yakup-nen-e kwe Arakel abuwa kasu iri nggal-e kagit lak ala karug-e, Nagawan Indo-nen kwe La na imbiringgat tak posola, la ndagij-o. Alat nde, Arakel na-ge yibiri irit woragij-o.

32 Lea na abila luk, li ap misik ndaguruk-nen yosolar-e: ”Nagawan Indo-ge an-nen anggun worasu-ge neyagij-o. Nde, yawo-ge an nun-nen-e an nabuwa kujwa-o” luk, la na unu-ge Uruben yarij-o.

33 Lea na tuguruk abila luk, li ap misik ndaguruk-nen yosolar-e: ”An nabuwa kagit lak worasu iri na kuluruk, Nagawan Indo-nen nambara misik yu wok nirij-o” luk, la iri na unu-ge Simeon yarij-o.

34 Lea na tuguruk abila lug-e, li ap misik ndaguruk-nen yosolar-e: ”An-e nambararak li ap kenan ndaki bem-e yawo na nun-e an nimin panggarak wolma-o” luk, la na unu-ge Lewi yarij-o.

35 Tugurug-et Lea na abila lug-e li ap misik ndaguruk-nen yosolar-e: ”Yawo-nen-e Nagawan Indo erembel wanimin-o” luk la na unu-ge Yewura yarij-o. Iri lug-e, Lea na-ge tugurug-e la misik ndakit lak irit woragij-o.

ကြှနျုပျတို့နောကျလိုကျပါ:



ကြော်ငြာတွေ