NDAK WIRIDNAK WENE 28 - Nanduk Ngget Tul Pidnak Wene

¹ Iri luk, Isak-nen Yakup wene mbo buruk, imbiringgat tak puruk-nen yak tosolar-e: ”Kar-e Kanaan kweyap ndugum yeba-ge mondok wanurak pug-o.

² Are, Mesopotamia mburugundik kiya eid Mbetuel ama-t nggugundik kiya irid Laban eligwami ereba-t misik wani-o.

³ Mbal Pem Nagawan mondok amawi worak iri na-nen kat kogwe min wok kerak mbugup iri na imbiringgat tak kobosolar-e, kar-e ap kwarat onmbo irit kwat yonokluk kilirak kwarat wok kuruwag-o.

⁴ Nagawan Indo-nen imbiringgat tak kobosolar-e, kat-nen wigarag-e Nagawan Indo-nen Abarakam imbiringgat tak obosolat-nen yak tid iri na ndak ndag-et wok kuruwag-o. Nde, kar-e Mbal Pem Nagawan-nen Abarakam wok tid nggweyak kat worasu yu-ge winde yugun-er-o” yak tij-o.

⁵ Iri nggal kwasa Isak-nen-e Yakup na wirik pamu, Yakub-e Aran nap Mbetuel ambara Laban eram o Mesopotamia mbirij-o. Nde, Laban-e Yakup min Esau min iniya Iripka iri na owe-o.

Esau tuguruk kwe misik wanidnak wene 28:6-9

⁶ Nde, Esau-nen kwelel kagaidnggal-e, Yakup na-ge Mesopotamia mburuwarik kwe iri me kore yuwakluk Isak-nen Yakup na imbiringgat tak puruk wirik pidnak wene iri na min Yakup imbiringgat tak posolat-nen: ”Kar-e Kanaan kweyap ndugum wanurak pug-o” luk imiri yidnak wene iri na min-et kulij-o.

⁷ Nde, ereb-e Yakup na-ge eid min ija min-nen yidnak yidnag-et Mesopotamia mbirid iri na wene min aru lug-e,

⁸ Esau-nen yebet kasolar-e: ”E! An neid na-ge Kanaan kweyap na-ge isili eneyaso kagi” luk yenggerak pij-o.

⁹ Iri ala karuk, at Esau na-ge Ismael eram mberarik, kwe Magalat na wanij-o. Nde, kwe Magalat iri-ge Abarakam ambara Ismael ambara Nebayot iri irij-o.

Mbetel-nen Yakup nabi kagaid wene 28:10-22

¹⁰ Nde, Yakup na-ge o Mbereseba-nen o Aran nggwe mbirij-o.

¹¹ Mberarik misik me wok yosoloma, olengen wusa nggosoloma, ar-e nene yij-o. Nde, nene yekluk mbiring yosolar-e, kerep misik anggul ugwi puruk, nene yij-o.

¹² Nene yosolat nabi bem yik kagaidnggal mbera misig-e ereb-e nggweyak pem-nen mbal kundugu worala, aid nab-e mbera iri na bem lagolat mbuwagolat kwarogola, eneyagaij-o.

¹³ Nde, Nagawan Indo-ge eralu mendak-nen yak tosolar-e: ”An-e Abarakam min Isak min-nen nerembel wanugwi Mbal Pem Nagawan-nen yusu-o. Nde, o kat mbinggirik worasu sa yu-ge an-nen-e kat min kat-nen wigarak min wok kindimin-o.

¹⁴ Nde, kat-nen wigarag-e o liri nggal ligik lasolar-e, mo luwaso nggwe-nen mo mboso nggwe-nen abare ena nggwe-nen abam nggwe-nen oboksa it onnggweyak kwat ma-o. Nde, kat min kat-nen wigarak min kenpem-nen-e yi ap ndi ap oboksa imbiringgat tak inpimin-o.

¹⁵ Karu wolmin-o. An-nen-e kat nugun sa oboksa yongga korosolat, nggetlel kuburuk nimin-o. Nde, an-nen-e o yu me-t tuguruk kimin lobok yimin-o. An-e mondok keya kibimin pug-o. Urul yak kirigi oboksa-ge kwar-et kobosolat woramin-o” yak tij-o.

¹⁶ Yosoloma, Yakup na-ge indi luk luk, men yosolat-nen yosolar-e: ”Nagawan Indo-ge o yu me-t worasu-o. Ar-e yu me worasu-t nde, an-e kabak woragi-o” yij-o.

¹⁷ Iri lug-e, ar-e kwiye kwarat yosolat-nen yosolar-e: ”Nde, yu me-ge mondok ijar-o! Yu-ge ndemeret Mbal Pem Nagawan amar-o. Aid arem pak tumende-ge yu me-t kagi” luk yij-o.

¹⁸ Nde, kub-e Yakup-nen anggul ugwi mbara nene yid kerep iri na-ge sindik purug-e, ap-nen: ”Yu-ge iri yidnak sa-o” luk enaru wolmakluk, Mbal Pem Nagawan amanggim nak lenak posolat kerep iri na bem-e e saitun engen amburu kilik pij-o.

¹⁹ Nde, o iri na me unu yarosolar-e, Mbetel irit yarij-o. (O iri nanduk unu-ge Lus.)

²⁰ Iri luk Yakup-nen owak mbarosolar-e: ”Nagawan Indo-nen nde an tu yu mborosola, yongga norosolat, kurak nuburuk mborosolat, nunggwi mende min an yururak nusum min yongga norosola,

²¹ an-e tuguruk konag-et nde neid eram lobok yimindig-e, Nagawan Indo-ge an Nembal Pem Nagawan kwat ma-o.

²² Nde, iri kwaridnak sa-o luk kerep sindik pigi sa yu me-ge Nagawan Indo erembel wanurak sa kwat mag-o. An nde Nagawan Indo-nen nde yi mende ndi mende wok nuruwa mende enggep lombok oboksa karetkwe irit Nagawan Indo wok timin-o” yij-o.