NDAK WIRIDNAK WENE 27 - Nanduk Ngget Tul Pidnak Wene

Isak-nen Yakup imbiringgat tak pidnak wene 27:1-29

¹ Nde, misik tarem-e Isak na abu indi worak yosolat, erengen ugut woralar-e, ambara nanduk nderak Esau na wene mbo uburuk-nen yak tosolar-e: ”Nambara-o!” yij-o. Yosoloma-ge, ”No? Neid wa-e” yij-o.

² Yosoloma, Isak-nen yosolar-e: ”An-e abu nindi worak yidnak me, an wat yurak tarem-e panggo yusu neyasu yur-o.

³ Iri ala-ge, kar-e kesan min engga ma mburugundik, nggwija misik wiril mburugundik,

⁴ an nindi-nen ukwe perasu ndak ndag-et kona saguruk lobok yugunmu, an-e nasoluk, nuruk woralat ya-net imbiringgat wok kutluk wat yuwom-o” luk yak tij-o.

⁵ Nde, wene iri na Isak-nen Esau yak tosola-ge, kwe Iripka-nen-e kulij-o. Nde, wene na yak tosoloma-ge, Esau na-ge wam wiril patma mberamu-ge

⁶ Iripka-nen Yakup yak tosolar-e: ”An-e yanem ma keid Isak-nen-e Esau wene yu nggal yak tosola kuligi-o:

⁷ ’Kar-e nggwija misik wiril mbiri-o. Wutluk undu kona sak niril lobok yugunmu, nasoluk, an-e awo wat yigit lak ma-net Nagawan Indo imbiri bem imbiringgat kebem puruk wat yuwom-o’ luk yak tosola kuligi-o.

⁸ Iri nde ala karug-e, nambara wa-e. Kar-e an-nen yak kirimin iri nak kwarurag-o.

⁹ Kar-e nit nenlomba wam woraso sa mburugundik, kambing wam mondok usul nggok mberen waruk lobok yi-o. An-nen-e keid indi norak perasu nggal ndak ndag-et sagumu,

¹⁰ kat-nen-e waruk keid eram mburugunmu, at-nen-e nasoluk, wat yigit lak ma-net imbiringgat kebem puwak-nen-o” yak tij-o.

¹¹ Yak tij-et nde, Yakup-nen ija yak tosolar-e: ”Esau iri-ge usu worak, nde an-e nusu lak yu-ge, ngge-o?

¹² Neid na-ge inggi-nen an lombot nuburuk yuwarik, an-e amberam lasola neyaruk, imbiringgat wok nururak na keya buruk, imbiri lamut tak nde nubuwa me, meya-o” luk yij-o.

¹³ Yosola karuk, ija-nen yosolar-e: ”Nambara-o. At-nen imbiri lamut kebem puwa iri-ge an nebem-o. An-nen yak kurusu yu nak kwari-o. Kar-e ndag-et nak mburugundik, kambing wam ereya waruk lobok yi-o” yak tij-o.

¹⁴ Yak tosoloma, Yakup na mberarik, kambing wam ereya na waruk ija eram lobok yij-o. Lobok yosoloma, kwe Iripka-nen-e wam ereya na-ge Isak-nen norak indi-n perasu ndak ndag-et konak nak sagij-o.

¹⁵ Sagurug-e, Esau usum konak ndok worak o ma worasu iri na-ge Iripka-nen-e waga Yakup yirik ibij-o.

¹⁶ Iri lug-e, urusuwak pem min inggi sum yoboksa inggi il pem min usu lak sa iri na me-ge usu nggal kwasa kambing wam marik aboro nggosa ketsa yirik ibij-o.

¹⁷ Iri rak purug-e, Iripka-nen-e wam kona sagid iri na min oroti mburu konid iri na min Yakup wok tij-o.

¹⁸ Wok tosoloma-ge, waruk mberarik-nen yosolar-e: ”Neid wa-e” yosoloma, Isak-nen-e: ”Wa-e. Kar-e Esau, lak? Are, Yakub-a?” yosoloma,

¹⁹ Yakup-nen yosolar-e: ”Kambara manggiya Esau an nar-o. Kat-nen nebem pigen na-ge waruk lobok yigi-o. Kar-e men luk, kore yosolat uno saguruk lobok yigi yeba min-o. Nasoluk, imbiringgat tak nobonog-o” yij-o.

²⁰ Yosoloma, Isak-nen yosolar-e: ”Kar-e ndag-et nak wirigenma-o, nambara wiwa-o” yak tosoloma-ge, Yakup-nen yosolar-e: ”Nagawan Indo, kat-nen erembel wanoso Mbal Pem Nagawan iri na-nen nerengenma rak pamu-o” luk yij-o.

²¹ Yosoloma, Isak-nen Yakup yak tosolar-e: ”Kar-e ndemeret Esau-a? Ninggi tena kuburuk mbenat kebeyek-nen neram panggosa lobok yi-o” yak tij-o.

²² Yosoloma, Yakup na Isak eram panggosa mborosoloma, tena uburuk inggi bem ya bak nda bak pem lombot obosolat-nen yosolar-e: ”Kar-e kene-ge ndemeret Yakup kene-t nde, kinggi il-e Esau inggi nggal-et keyagi-o” luk yij-o.

²³ Nde, inggi il-e usu worak Esau inggi nggal-et karuk, Isak-nen-e: ”Yu-ge Yakub-er-o” luk yenggerak pigit lag-o. Alat nde, Yakup na imbiringgat tak peyekluk-nen

²⁴ tuguruk kin wok obosolar-e: ”Kar-e ndemeret Esau-t, lak?” yosoloma, Yakup-nen yosolar-e: ”Ye, an-e ndemeret Esau nar-o” luk yak tij-o.

²⁵ Yosoloma-ge, Isak-nen yak tosolar-e: ”Kat wam saiken iri mak niri-o. Nuruk, imbiringgat tak kibimin-o” luk yij-o. Yosoloma, Yakup-nen-e uno sagid ereba na eram posolar-e, anggut engen amburu siyak mbi min nujwakluk mak tij-o.

²⁶ Mak tosoloma, Isak-nen Yakup yak tosolar-e: ”An neram panggosa lobok yugundik, paluksa wa yak niri-o” yak tij-o.

²⁷ Yosoloma-ge, Yakup na Isak paluk turuk wa yak tosola-ge, Isak-nen-e Yakup usum emben sing kasolat, Yakup na imbiringgat tak posolat-en yosolar-e: ”Nambara, kat kububu emben-e Nagawan Indo-nen imbiringgat tak pidnak wal ububu emben nggal-er-o.

²⁸ Mbal Pem Nagawan-nen kat imbiringgat kebem mberak posolar-e, kar-e mbal pem-nen talme wok korosolat, keyapmu-ge amburu worak tak puwag-o! Anggut engen amburu min nggandum mbato min keyapmu-ge kwarat ligik lujwag-o!

²⁹ Ap enlem oboksa kat ndegel kubugwi kwat mag-o. Ap ene lombok oboksa-nen kat keram nak tud yogolat wolmag-o. Kat kowe kowot oboksa-nen kat kene nak kuluwag-o. Kat kiya-nen wigarag-e kat keram nak tud yogolat wolmag-o. Nde, kat imbiri lamut tak kubuwa nab-e imbiri lamut mag-o. Nde, kimbiringgat tak kubuwa nab-e imbiringgat irit mag-o” luk yij-o.

Esau-nen imbiringgat tak ubuwakluk Isak nggi yak tid wene 27:30-41

³⁰ Nde, Isak-nen Yakup na imbiringgat tak pamu, Yakup na mborosola, ereya na-t owe Esau na-ge nggwija wiril mbirid na-ge lobok yij-o.

³¹ Nde, at-nen na uno-ge undu konak nak saguruk, eid eram lobok yarik-nen yosolar-e: ”Neid wa-e. Kar-e men luk, kore yosolat uno waruk lobok yigi yeba min-o. Nurug-e, imbiringgat tak nobonog-o” luk yak tij-o.

³² Yosoloma, Isak-nen-e: ”Kar-e ta-o?” yosoloma, Esau-nen yosolar-e: ”An-e kambara nanduk nderak Esau nar-o” luk yij-o.

³³ Yosoloma, Isak na ebe wendet luk, ebem yugup tugup mbosolat-nen yosolar-e: ”Yanem kat lobok yigit lak ma na-ge ta-nen uno waruk lobok yarik, neram pamu ninggi-o? Nde, nurug-e, imbiringgat mondok tigisa at wok tukmu-o. Nde, imbiringgat iri-ge mondok pem abu abu at arengge kwat yij-o” luk yak tij-o.

³⁴ Nde, Esau na-ge wene iri na kulurug-e, mondok indi abi min kalok luk yip nggwa yosolat-nen yosolar-e: ”Neid wa-e. An na imbiringgat tag-et nibi-o!” yosoloma,

³⁵ Isak-nen yosolar-e: ”Kowot na lobok yarik, namberam laruk, imbiringgat kat wok kururak woraso na-ge wanamu-o” yak tij-o.

³⁶ Yosoloma-ge, Esau-nen yosolar-e: ”At yu-ge yawo-ge mberen pem tak posolat an namberam lagaid kagi-o. Iri ala-ge, at-nen kwaroso ndak ndag-et unu-ge Yakub-o luk yarij-o. Nde, ar-e an nangge manggiya-nen wanugwi mende na mengga wanurug-et, yawo na imbiringgat tak nuburak mende na irit mengga wanij-o. Iri ala-ge, an imbiringgat tak nuburak imbiringgat erep mbi worasu, lak?” yij-o.

³⁷ Yosoloma, Isak-nen wene onggo yak tosolar-e: ”Nde, an-nen-e an-e kat kanggul pem kek tak uburuk, at owe owot oboksa-ge at ndegel ubugwi nap tak inpigi-o. An-nen-e anggut engen amburu min nggandum mbato min obok wok tigirik me, yawo-ge neram-e kat kwat kuburag-e mondok yi lak ndi lak agaij-o, nambara-o” yak tij-o.

³⁸ Nde, Esau na-ge at eid emengen mbal tenak worasolat-nen yosolar-e: ”Neid wa-e. Kar-e imbiringgar-e misiget iri nag-et tena woraigen, lak? Neid wa-e. An na nimbiringgat tag-et nibi-o” yosoluk, tuguruk yip kundugu bij-o.

³⁹ Nde, Isak-nen Esau yak tosolar-e: ”Mbal nggwe-nen kat kebem-e talme mbuma bug-o. Keyapmu na amburu rak puwa bug-o.

⁴⁰ Kar-e pempa wim nak perenak woragun-et nde, kowot iri inggiyapma woragun-o. Alat nde, kat-nen kamawi-t kundugundig-e, at inggiyapma-nen wesera mburugun-o” yak tij-o.

⁴¹ Yak tosoloma, Esau na-ge eid-nen imbiringgat na-ge owot Yakup wok tidnak pem Esau isilepma-ge Yakup ebem posolat-nen indi arem perasolar-e: ”An neij-e yanem-et wat yurak panggorak worasu me, wat mama, tabun pem-nen-e mondok nowot yu-ge wirimin-o” luk arem peragij-o.

Isak-nen Yakup na-ge Laban eram wirik pidnak wene 27:42–28:5

⁴² Esau-nen Yakup wururak arem yemnak pidnak wene iri na Iripka-nen kulurug-e, at-nen-e ap ndimirik enpamu, Yakup wene mbo ibikma lobok yamu yak tosolar-e: ”Kwara kuli-o. Kowe Esau na-ge kat-nen imbiringgat wanigen iri na bem kururak kusuwa wora worasu-o.

⁴³ Iri ala-ge kar-e an-nen yak kirimin irit kwari-o. Kar-e ndag-et nak an nowe Laban eram Aran mbiri-o.

⁴⁴ Mburugundik, at imin siyak ereba worasoma, kowe isilepma teyok yosolat,

⁴⁵ kat-nen at kwat ibigen ereba mondok abu memerak posola-net an-net: ’Inggi wil mberer-o’ luk ap ndimirik unpumu-nen kinggi wil lobok yuwa-o. An nambararak misik tarem-et mberensa-t lak yurak iri-ge an-e nimbir-o” yak tij-o.

⁴⁶ Yak turuk, Iripka-nen Isak yak tosolar-e: ”An-e Esau ogwerak erem nin kweyap wanid yeba yik iniyudtag-e mondok nisili kwarat yusu-o. Iri ala, Yakup min-et Et kweyap ndugum yeba wanurak ala-ge, an-e no manggim nuruk wolmomtag-o? Mondok wat yeg-o” luk yij-o.