NDAK WIRIDNAK WENE 26 - Nanduk Ngget Tul Pidnak Wene

Isak iri na o Nggerat woragid wene 26:1-25

¹ Nde, misik tarem-e nanduk Abarakam worala, nogoro mbud yid iri na nggal-et nogoro nggok irit mbud yij-o. Iri ala karug-e, Isak iri na-ge Pilisin nap nagawan Abimelek iri na eram Nggerat mberarik, at-nen Nggerat wi iri me wolmomtak pem nggi yak tij-o.

² Iri kwarosola karug-e, Nagawan Indo Isak eram wok yosolat-nen yak tosolar-e: ”Kar-e an-nen yak kirigi iri na ndak ndag-et worasu sa yu me-t wolmin-o. Mesira wi-ge mbururak pug-o.

³ Nde, an-nen-e nggetlel kuburuk nosolat, imbiringgat tak kobosolat woramin-o. Nde, nggweyak yu-ge oboksa kat wok kurumu, kat-nen wigarak-nen winde yuwa-o. Nde, an-nen-e keid Abarakam ’Inik nggal kwat kibimin-o’ luk urul yak tigi iri na ndak ndag-et kwat kibimin-o.

⁴ Nde, iri-ge an-nen-e kat-nen wigarag-e wonaru mbal pem worasu ereba nggal kwarat tak posolat, nggweyak yu-ge oboksa kat-nen wigarak winde rak inpimin-o. Iri yosola karuk, nggweyakma worali nap enlem oboksa-nen-e an-nen kat-nen wigarak inmbiringgat tak onposola karuk, it iri nggal imbiringgat tak unpuwakluk an nemengen mbaruwa-o.

⁵ Nde, Abarakam-nen an-nen yidnak yidnak kwarosolat, an-nen ’Iri nggal kwarurag-o’ yidnak wene ereba na oboksa puksa tena woralat, an-nen ebem pidnak wene ereba na oboksa kwarosolat kwarid iri na bem imbiringgat tak kibimin-o” yak tij-o.

⁶ Iri yak tosola karuk, Isak na-ge o Nggerat woragij-o.

⁷ Nde, Isak iri na o Nggerat worala-ge, iri me woragwi nap-nen Isak kin wok obogolar-e: ”Kwe Iripka yu-ge kat kowot, lak? Are, kogwe, lak?” luk kin wanogola-ge, at-nen yak ondosolar-e: ”Iri-ge nogwe-ge lag-o. Nowot-nen yusu-o” luk yak ondosolat woragij-o. Nde, Isak-nen iri nggal yid iri-ge kwe Iripka iri-ge erare konak karuk, at wanurak peraruk Isak wuruwa naru, kwiye-nen iri yak ondosolat irit woragij-o.

⁸ Nde, Isak iri na-ge siyak pem irit iri me woragij-o. Woralar-e, misik tarem-e Nagawan Abimelek-nen o kebet tu belak nggwe yik kagaidnggal-e, Isak iri na-ge Iripka enmberek idndok wene mbarogolat woragola, eneyagaij-o.

⁹ Eneyarug-e, Abimelek-nen-e Isak iri na wene mbo buruk-nen yak tosolar-e: ”Kwe iri-ge kogwe-t yu-t nde, kar-e noluk-nen nowor-o yosolat woraigen-o?” luk yak tij-o. Yosoloma, Isak-nen onggo yosolar-e: ”An nindi-nen yebet kasolar-e, an-nen nde ’Nogwe-o’ yosola-ge, wanurak peraruk nuruwa-o luk-nen yigi-o” luk yak tij-o.

¹⁰ Yak tosoloma, Abimelek-nen yak tosolar-e: ”Kar-e noluk iri nggal kwat nonposolat woraigen-o? Ap an nuwokma yeba-nen nde kogwe iri imin nene nde yelepnggal-nen-e meya-ge erem-e kat kebem-o” luk Isak met ibij-o.

¹¹ Iri yak turuk, Abimelek-nen ap at ujokma worali nap ereba na nggomo ondosolat-nen yak ondosolar-e: ”Ta-nen nde at yu ogwe min yi lik ndi lik kwat unpuwa iri-ge mondok undurag-o” luk yak indij-o.

¹² Nde, Isak-nen yabu o iri me wanarik yagij-e olengen yagid iri na bem-e yabu wanarig-e uwi-ge mariget pil kagaij-et nde, olengen iri na bem-et ebe mbarosolar-e, mondok terak minik (seratus kali lipat) irit mbarij-o.

¹³ At arengge mende na kwarat yosolar-e, ar-e mondok yi mende ndi mende ombo irit yij-o.

¹⁴ Iri nggal kwarosolat, at olomba wam min esapi wam min oro kwarat ligik lasolat, ndegel ubugwi nap min kwarat ala karug-e, ”At yu nak yi mende ndi mende ombo yusu-o” luk Pilisin nab-e enlengen ale ebem piga-o.

¹⁵ Enlengen ale yogolar-e, Abarakam worasolat tarem at ndegel ubugwi nap-nen yi kenanggurak ondoro nggweyak emnde mbaril lobok yiga ereba na-ge nggweyak yala kam nil lobok yiga-o.

¹⁶ Iri kwarogolar-e, nagawan Abimelek-nen Isak yak tosolar-e: ”Kar-e nggok yosolat, nir-e karing lapmu rak nunpusu me, kar-e yu me wolmomtag-e lag-o. Mbiri-o” yak tij-o.

¹⁷ Yak tosoloma, Isak iri na-ge o iri me-nen mberarik, Nggerat Mbirikmu ereba me o lije sum wi wutluk, siyak woragij-o.

¹⁸ Iri na me woralar-e, Abarakam nanduk woralat yi kenanggurak ondoro nggweyak emnde mbaril lobok yid nde, Abarakam wat yosoloma, it Pilisin nap-nen nggweyak yala kam nil lobok yiga ereba na tuguruk yalil lobok yij-o. Yi ondoro emnde mbaril lobok yid ereba na unu-ge eid Abarakam-nen unu yaril lobok yid ereba na-t yarij-o. Ki-ge yarigit lag-o.

¹⁹ Isak ndegel ubugwi nap ereba na-ge Nggerat mbirikmu iri na me yi kenanggurak ondoro nggweyak emnde mbarukmu-ge yi irit pilanuruk luwasola kaiga-o.

²⁰ Alat nde, it Nggerat iri me wam yik karok woragwi nap-nen-e yi iri na wene lit lit Isak owam yik karok woragwi nap ereba na enpem nggin yogolat-nen yak ondogolar-e: ”Yi yu-ge nit ninij-o” luk yiga-o. Iri yidnak ala karuk, Isak-nen nggweyak emnde mbaridnak iri na unu yarosolar-e: ”Yuk puk mbidnak sa” irit yarij-o.

²¹ Iri ala karuk, Isak ndegel ubugwi nap ereba na-ge yi kenanggurak ondoro misik yaliga-o. Yalukmu-ge, iri na min-et inmiri yogolat enpem mbud yiga-o. Iri yidnak ala karuk, Isak-nen yi mbun emnde mbariga iri na unu yarosolar-e: ”Sirid mbaridnak sa” luk yarij-o.

²² Imiri yogola, iri me keya burug-e, Isak na-ge nduguluk nin me mberarig-e, yi kenanggurak ondoro misik yalij-o. Nde, iri yalid iri na-ge imiri yigit lak ala karuk, Isak-nen unu yarosolar-e: ”Terak imiri lak” irit yarij-o. Iri yarid iri-ge, at-nen yosolar-e: ”Yawo-ge Nagawan Indo-nen ’kinggi ya bugun, kuwok ya bugun’ yugwi sa-nen waga terak woragolat, yi mende ndi mende ombo wolmomtak sa nenpamu-o” yosolat-nen yarij-o.

²³ Iri me worarug-e, misik tarem-e Isak iri na-ge mberarik, o Mbereseba wok yij-o.

²⁴ Mberarik, nene yosoma, kubu-ge Nagawan Indo at eram wok yosolat-nen yak tosolar-e: ”An-e keid Abarakam Embal Pem Nagawan-nen yusu-o. Kwiye yurak pug-o. An-e nggetlel kuburuk nosolat worasu-o. An-nen an ndegel noboso nap Abarakam urul yak tosolat: ’Yu nggal kwat kibimin-o’ luk urul yak tigi iri na ndak ndag-et an-nen imbiringgat kebem posolat, kat-nen wigarak kwarat tak kobosolat irit kwat kibimin-o” luk yak tij-o.

²⁵ Yak tosola, Isak-nen-e wam wosa kan purak ondoro kona mendaga keya buruk, iri na me Nagawan Indo erembel wanij-o. Iri na me o lije sum wi worak puruk worala-ge, at ndegel ubugwi nap-nen-e yi kenanggurak ondoro misik yaliga-o.

Isak min Abimelek min enmberek kundik wolmomtak wene mbariga wene 26:26-33

²⁶ Misik tarem-e o Nggerat-nen Abimelek min at nggomo woroso Ausat min at-nen idnak esan ombo onowe Pikol min iri-ge Isak eram lobok yiga-o.

²⁷ Lobok yogola karuk, Isak-nen yak ondosolar-e: ”Nandug-e kir-e an nimin sirid mbarogolat, kenma-nen langgara wirik nibigep na-t nde, noluk yawo an neram lobok yili-o?” luk kin wok inpij-o.

²⁸ Yak ondosoloma, it-nen onggo yogolar-e: ”Kar-e Nagawan Indo-nen nggetlel kuburuk nosola karuk, nit-nen peragolar-e, nir-e kat kimin kundig-et wolmog-o luk owak mbarurak irit perali-o.

²⁹ Iri ala-ge, nanduk nit-nen kat kimin meya kwarigit lak, konak nag-et woraruk, kondomok wene lag-et lobok yigen iri nggal-et kat-nen na ’Kit-nen kwat nibigep iri na nggal-et meya kwat kinpimin pug-o’ luk owak mbari-o. Nde, kat-nen konak nak nusu iri-ge Nagawan Indo-net nggetlel kuburuk nosola-nen kwarusu-o luk nir-e nam-et keyali-o” luk yak tiga-o.

³⁰ Iri yogola-ge, Isak-nen-e: ”Naptag-o. An nimin totno nunggwi mende nog-o” luk, sagarik ningga-o.

³¹ Nuruk, nene luk, kuplila-ge, it ondomoktak-nen: ”Iri nggal-et kwarul-o” luk owak mbaril lobok yiga-o. Iri lug-e, it mborogola-ge, Isak-nen-e indingen min-et wa yak endaga wirik inpij-o.

³² Mborogola, iri na tarem-et Isak ndegel ubugwi nap ereba na lobok yogolat-nen yak togolar-e: ”Nit-nen yi kenanggurak ondoro nggweyak yalige na-ge yi-ge mondok worasu-o” yak tiga-o.

³³ Yak togolikma, Isak-nen-e yi emnde mbariga iri na unu-ge: ”Owak mbaridnak sa” luk yarij-o. Iri kwaridnak ala karuk, o siri iri na unu-ge Mbereseba yariga-o.

Esau-nen ogwerak erem nin kweyap wok inpid wene 26:34-35

³⁴ Esau na ndesa mburuk, olengen empat pulu (40) pem-e, Et kweyap ndugum mberen wok inpij-o. Nde, kweyap ereya-ge Mberi ara Yurit min Elon ara Mbasmat min irit wok inpij-o.

³⁵ Nde, kweyap mberen ereya enpage-nen ndowaga Isak min Iripka min-e indi abi kala keya bogolat woraiga-o.