NDAK WIRIDNAK WENE 25 - Nanduk Ngget Tul Pidnak Wene

Abarakam wat yamu, yapma bidnak wene 25:7-11

^7-8 Nde, Abarakam iri na woralar-e, olengen seratus tuju pulu lima (175) irit woraruk, wat yij-o.

⁹ Woraruk, wat yamu-ge at ambararak Isak min Ismael min-nen-e yapmu kerep yanggo Makpela o Mamere mo luwaso (timur) ambigit iri na me yapma ibiga-o. Nde, nggweyak iri-ge nandug-e Et nap Soat ambara Eboron onggweyag-et nde,

¹⁰ nggweyak iri-ge Abarakam-nen Et nap iri na ebem onggo bidnak me, ogwe Sara yapma ibidnak iri na me-t at na yapma ibiga-o.

¹¹ Abarakam iri na wat yosola-ge, Mbal Pem Nagawan-nen-e imbiringgar-e ambara Isak iri na ebem posolat irit woragij-o. Ereya tarem-e Isak na-ge yi kenanggurak ondoro yalidnak misik unu-ge ”At iri-ge keya noboso buk” iri na eralu-t woragij-o.

Ismael-nen wigarak 25:12-18

¹² Ismael iri-ge Abarakam ambara Sara ndegel oboso Mesira kwe Agat-nen ndagamu-o.

^13-16 Ismael ilirag-e enpe duabelas irir-o. It unnu yu me worasu ya-ge it ndesa mbidnak ndak ndak obo nit nit mbarag-e yu-o: Nebayot min Kendat min Atmbel min Nipsam min Misima min Nduma min Masa min Andat min Tema min Yetut min Napis min Ketma min irit ndet inpij-o. Nde, it enpe duabelas yu-ge ap enlem duabelas irit onmbo-nen yusu-o. Nde, it woragwi sa o unu-ge it unnu bem para irit yariga-o.

¹⁷ Nde, Ismael iri na-ge woralar-e, olengen seratus tiga pulu tuju (137) irit woraruk, wat yij-o.

¹⁸ Nde, at-nen wigarak ereba na-ge Mesira-nen mo luwaso (timur) nggwe Asiut ambigit nggwe o Awila wok Sut wok enggendumu ereba me-t ombo luk woraiga-o. Nde, it ereba-ge Abarakam-nen wigarak erep ereba na inmin-e kundik woragit lag-o.

Esau min Yakup min ndet yidnak wene 25:19-26

¹⁹ Nde, yu-ge Abarakam ambara Isak woraidnak wene-o.

²⁰ Aram nap o Mesopotamia woraso Mbetuel ambara Laban owot kwe Iripka iri na Isak-nen wanij-o. Nde, kwe wanid tarem-e Isak na-ge olengen empat pulu (40) bem-nen wanij-o.

²¹ Nde, Isak-nen-e ogwe na la ndakit lak ala karuk, tepan ogwe na amanggim Nagawan Indo emengen mbarij-o. Nde, Nagawan Indo-nen-e at-nen tepan yoso iri na erep nggarosolar-e, ogwe na-ge abila yij-o.

²² Nde, kwe Iripka abila na-ge la kambera me, arem ereba-nen li mberen ereya na-ge yig mborok yogolat woraiga-o. Iri ala karug-e, kwe na-nen yosolar-e: ”Noluk-nen an narem yu-ge yu nggal kwat tenak worasu-o?” luk Nagawan Indo-nen mirik ubuwakluk Nagawan Indo yak tij-o.

²³ Yak tosoloma-ge, Nagawan Indo-nen erep nggarosolar-e: ”Kat karem iri-ge ap enlem mberen worali-o. Nde, ap enlem mberen ereya-ge enmberek sirid mbarak irit ndakun-o. Nde, nanduk mbuwa iri-ge amawi-ge lag-et nde, abok mbuwa iri-ge amawi worak irit mbuwa-o. Nde, nanduk mbuwa iri-nen-e abok mbuwa ndegel ubuwa-o” yak tij-o.

²⁴ Iri yak tamu worasoma-ge, la ndagurak tarem ndak ndak yosolar-e, kwe na-ge li kambera ap nak irit ndagij-o.

²⁵ Nde, nanduk mbid iri-ge aboro mimi irit ndet yij-o. Nde, usu-ge embem sum usu nggal-o. Iri ala karuk, unu-ge Esau irit yariga-o.

²⁶ Nde, la abok mbid iri na-ge Esau ujok nggut irit tenaguruk, mbij-o. Iri ala karuk, unu-ge Yakup yariga-o. Nde, li mberen ya ndesa mbiga tarem-e Isag-e olengen enam pulu (60) bem-nen ndet yiga-o.

Esau-nen manggiya-nen wanugwi imbiringgat iri na onggo wanid 25:27-34

²⁷ Nde, li mberen ereya nggok yogolar-e, Esau na-ge wal nggwe nak mborosolar-e, towe mena woroso inggi mbuk lembe irit woragij-o. Nde, Yakup na-ge ene lak, erengen nak worak o ma nak woraso irit kwat yij-o.

²⁸ Nde, Isak na-ge Esau-nen woroso towe mena ereba na nasolar-e, Esau iri na-t indingen tak puruk woragij-o. Nde, Iripka-nen-e Yakup iri na-t indingen tak puruk woragij-o.

²⁹ Misik tarem-e Yakup na-ge korangen mimi mbi sagosoma-ge, Esau na-ge walma nggwe-nen nere-nen komo yarik, lobok yosolar-e,

³⁰ Yakup na yak tosolar-e: ”Nab-o. An-e nere mondok meya-o. Kat korangen mimi sagusu ereba siyak mak niri-o” yak tij-o. (Iri yid iri-nen at unu yogolar-e, ”Erom-o” yili-o.)

³¹ Yakup-nen yosolar-e: ”Iri ala, mbigija-ge kat-nen imbiringgat manggiya nderak-nen wanugwi iri na wok norosola-net mak kirimin-o” yak tij-o.

³² Yak tosoloma, Esau-nen yosolar-e: ”Ob-o. An nde nere-nen wat yimindig-e, imbiringgat manggiya nderak-nen wanugwi iri-ge ngge rak purag-o?” yij-o.

³³ Yosoloma, Yakup-nen tugurug-et yosolar-e: ”Imbiringgat manggiya nderak-nen wanugwi iri-ge ’Wog-et kirimin-o’ luk mondok owak mbari-o” yak tosoloma, Esau-nen-e owak mbatluk, imbiringgat manggiya nderak-nen wanugwi iri na-ge Yakup wok tij-o.

³⁴ Iri yosoloma, Yakup-nen-e oroti min korangen sa ereba na min mak tij-o. Mak tamu-ge, Esau na-ge nasoluk mbirij-o. Iri nggal kwasa Esau-nen-e imbiringgat manggiya nderak nak-nen wanugwi na-ge liring liring tak pamu-o.