NDAK WIRIDNAK WENE 24 - Nanduk Ngget Tul Pidnak Wene

Isak amanggim kwe kore yidnak wene 24:1-67

¹ Nde, Abarakam na-ge abu indi worak irit yij-o. Nde, at iri-ge yi mende ndi mende bem-e Nagawan Indo-nen-e imbiringgat tak posolat woragij-o.

² Nde, misik tarem-e Abarakam aringgi arengge oboksa inggem pidnak nap ndegel oboso indi worak iri na yak tosolar-e: ”Kinggi-ge an nawak ponok ponok enggendumu iri me puruk, owak mbarosolar-e:

³ ’An-e Nagawan Indo Mbal Pem Nagawan mbal min nggweyak min tena woraso owag-o. Kat kambara Isak amanggim kwe-ge o Kanaan yu kweyab-e mondok kore yimin pug-o’ luk yi-o.

⁴ Kar-e an nambara amanggim kwe kore-ge tuguruk mburugundik, an ndesa mbidnak sa nerem ma an nowe nowot enndam-et kore mbururag-o” luk yak tij-o.

⁵ Yak tosoloma, ndegel oboso nap iri na-nen kin wok obosolar-e: ”Kwe-nen nde o yu me an nimin lobok yurak nimbir-o luk ama iri me larok yosola-ge, ngge kwarurag-o? Iri ala karug-e, kat kambara Isag-e an nimin kat kerem ma mbururag-e op, lak?” luk kin wanij-o.

⁶ Alat nde, Abarakam-nen wene onggo yosolar-e: ”Mondok lag-o. An nambara iri-ge ereba me imin mbururag-e mondok lik laksa-o.

⁷ Nagawan Indo mbal tena worasu Mbal Pem Nagawan yu-nen an neid ama-nen na irit, an nowe nowot woragwi sa-nen wok nuburuk lobok yarik, ’O yu-ge kat-nen wigarak wok indimin-o’ luk owak mbara pamu-o. Iri yid Nagawan Indo iri-net at-nen yidnak aid nap misik lenak puwama, yongga korosola, kar-e an nambara amanggim kwe-ge ndag-et nak ndurumsa wanugun-o.

⁸ Alat nde, kwe ndugum iri na nde kat kimin lobok yurak nde ’Nimbir-o’ yosola-ge, owak mbaridnak yu-ge kat kebem-e lag-o. Nde, kar-e an nambara-ge iri me mondok waruk mbururag-e lik laksa-o” luk yij-o.

⁹ Yosoloma, ndegel oboso nap iri na-nen-e at onggo ibid nap Abarakam iri na awak ponok ponok enggendumu tena buruk, Abarakam-nen kwarurak ebem pid ereba na ”Kwarimin-er-o” luk owak mbarosolat-nen tena bij-o.

¹⁰ Iri lug-e ndegel oboso nap na-ge unta wam-e sepulu wanoso, Abarakam arengge silobulo onggo nggok pugwi erep min-et waruk yarik, o Naot woraso sa o Mesopotamia abare abam (utara) nggwe mbirij-o.

¹¹ Nde, o iri na me wok yosolar-e, o siri ombol nggwe yi kenanggugwi sa iri na me unta wam ereba na ndong tak puruk worasoma, o na-ge keyama yosolat, kweyap ndugum yi kenanggil lobok yugwi ndak ndak kwat yij-o.

¹² Iri luk, Abarakam ndegel oboso nap iri na-nen tepan yosolar-e: ”An nonggo bid nap Abarakam Ambal Pem Nagawan, Nagawan Indo wa-e. An tu lobok yigi yu ebe worak mak-nen yongga niri-o. Kat-nen an nonggo pid nap Abarakam tul yak tigen iri na ndak ndak tak pi-o.

¹³ Yi kenanggugwi sa mendak worasu yu yik niyi-o. Nde, yanem-e li kwami ndugum ndugum o ma nggwe-nen yi kenanggil lobok yogola,

¹⁴ kweyap ndugum ndugum ereba ennggendumu kwe ndugum misik an-nen yak tosolat: ’Kid kenanggigen iri mbi kanggurum-nen nggosa mak niri-o’ yak tosoma nde, ’Ob-o! Kat kenangga mak korosolat, kat kowam unta wam ereba min-et kenangga mak tosolat yimin-o’ yak norosola karug-e, ’Yu-ge Nagawan Indo kat-nen ndegel koboso nap Isak amanggim lenak pigen kwe-ge yu-t kagi’ luk peramin-o. Perasolar-e: ’Kat-nen an nonggo pid nap Abarakam iri na tul yak tigen ndak ndak pid kagi’ luk peramin-o” luk tepan yij-o.

^15-16 Nde, ap iri na tepan awo pok tak pigit lak ma, kwe ndugum Iripka iri-ge mondok erengenma nilo nggal konak ap-nen imin nene yugwi buk iri-ge yi kenanggeyekluk yimbe endakmbe bem keyoksa waruk yi kenanggugwi sa iri na me lobok yij-o. Nde, at iri-ge ap Mbetuel ara-o. Nde, Mbetuel eij-e Naot, nde, Mbetuel ija-ge Milka. Nde, Naot iri-ge Abarakam owe-o. Nde, kwe ndugum Iripka na yi kenangguruk, lobok yosoma-ge,

¹⁷ Abarakam ndegel poso nap na pong karik, kwe iri na eram wok luk-nen yak tosolar-e: ”Nara wiwa-o. Kat yi kenanggigen iri mak niri-o” yak tij-o.

¹⁸ Yak tosoloma, kwe na-nen yosolar-e: ”Nab-o. Min-o” luk ndag-et nak yimbe na endakmbe bem-nen nggorarik, kwe na-net ap na yi mak tij-o.

¹⁹ Ap na yi na nasoloma-ge, kwe iri na-nen yosolar-e: ”Kat kowam unta wam min-et ebem yamuksa nujwakluk yi kenangga mak timin-o” luk yak tij-o.

²⁰ Yak turuk, kwe na-ge ndag-et nak yi kenangga unta wam yi mak tugwi ondoro ereba na me kela pil lobok lik mbitlik yarik, ndag-et nak unta wam ereba na-ge mondok imbit ambatsa mak tij-o.

²¹ Kwe na iri kwarosola-ge, Abarakam ndegel oboso nap iri na-ge ene mbi yigit lak-nen: ”An tu lobok yigi na-ge Nagawan Indo-nen ebe worak tak pusu yu-t lak?” luk lombot nak posolat larok yij-o.

²² Unta wam ereba na yi imbitsa nasoloma karug-e, Abarakam ndegel oboso nap iri na-nen-e onggo nggok pugwi enabi sumbanok emas posid-nen konidnak mbi wanarik, kwe iri na abirumbun pem ngonoksa yirik pij-o. Nde, emas-nen konidnak manggo nggok mberen-e erabitmu yirik pij-o.

²³ Yirik puruk yarik, ap iri na-nen yak tosolar-e: ”Kat keid unu-ge ta-o? Kama-ge an nenggamirak inmin nene yurag-e o mbi terak worasu, lak?” luk kin wanij-o.

²⁴ Kin wanosoloma-ge, kwe na-nen yosolar-e: ”An neij-e Mbetuel-o. Nde, an neid iri eid min ija min-e Naot min Milka min-o.

²⁵ Nde, nit nenma-ge nggandum mbato ariwak min unta wam naso mende min kwarat worasu-o. Nde, nene yurak ondoro na terag-et worasu-o” yak tij-o.

²⁶ Yosoloma-ge, Abarakam ndegel oboso nap iri na-ge erare nggwe tud luk Nagawan Indo erembel wanosolat-nen

²⁷ yosolar-e: ”Nagawan Indo an nonggo bid nap Abarakam Embal Pem Nagawan wiwa-o. Nde, Nagawan Indo iri-ge mondok mot mot nak at ndegel oboso nap Abarakam urul yak tidnak irit ndak ndak tak pij-o. At ambigir-e kindi konak yusu-o. Nde, kat-nen-e an lit nuburuk nok nok Abarakam owe owot woraidnak sa enndam nibil lobok yigen-o” luk tepan yij-o.

²⁸ Nde, kwe na-ge ndag-et nak ija eram o ma puburak mberarik, wene ereba na ndindera ija yak tij-o.

^29-30 Nde, kwe Iripka owe unu-ge Laban. Nde, Laban na-ge Abarakam ndegel oboso nap-nen yidnak wene ereba na-ge at owot-nen ndindorosola, kulij-o. Iri-nen owot abi sumbanok yirik pid iri na min manggo erabit pem mberen yirik pid ereba na min karuk yarik, Laban na-ge Abarakam ndegel oboso nap yi kenanggugwi sa koroga owam unta wam min worasoma, iri na eram pong pang nak mbirij-o.

³¹ Mberarik, Laban-nen ap na yak tosolar-e: ”Nagawan Indo-nen imbiringgat tak kibidnak nab-o! Kar-e mbepme yeba worasu-ge meyog-o. Ma mburuwog-o. Kat kondoro min kowam unta wam ereba min nene yurak ondoro-ge abu lud tak pidnak worasu-o” luk yak tij-o.

³² Yak tosoloma-ge, ap na-ge totno mbiriga-o. Mbirigarik, o ma nggukmu-ge, Laban na-nen silobulo wam ombolwak pem ereba na nggosa keya buruk, wam ereba na-ge nggandum mbato ariwak ereba na min wam naso mende erep ereba na min mak tij-o. Mak turug-e, Abarakam ndegel oboso nap iri na min at anggamirak totno lobok yiga nap ereba na min unuwok marurak yi kenangga waruk lobok yij-o.

³³ Nde, nunggwi mende endam pil lobok yogola, Abarakam ndegel oboso nap iri na-nen yosolar-e: ”An-e nunggwi mende ninggit lak ma-net an nebem pidnak wene mbi yimin-o” yij-o. Yosoloma-ge, Laban-nen yosolar-e: ”Yi-o, nab-o” yak tij-o.

³⁴ Yosoloma, Abarakam ndegel oboso nap iri na-nen mondog-et tel korosolar-e: ”An-e Abarakam ndegel oboso nab-o.

³⁵ Nde, Nagawan Indo-nen-e an-nen ndegel oboso nap Abarakam iri-ge mondok imbiringgat wok tosolar-e, yi mende ndi mende kwarat ombo rak pij-o. Ombo rak posolar-e, lomba wam nde kambing wam nde sapi wam nde unta wam nde kelerai wam nde perak tol nde emas tol nde ndegel ubugwi nap kweyap nde ap nde mondok kwarat Nagawan Indo-nen ombo rak pij-o.

³⁶ Nde, an-nen ndegel oboso nap ogwe Sara iri-ge abu indi worag-et nde, li ap misik ndagij-o. Nde, an-nen ndegel ubusu nap iri arengge ereba-ge ambara irit winde rak pij-o.

³⁷ An-nen ndegel oboso nap iri-nen-e an-e at-nen yidnak yidnak kwaruwakluk ’Owak mbari-o’ luk, watsa yak norosolar-e: ’An nambara yu amanggim-e kar-e kwe-ge o Kanaan yu kwami-ge mondok wok turak pug-o.

³⁸ Are, an neid owe owot endam mburugundik, it ennggendumu-t an nambara-nen wanuwakluk, kwe mbi pil lobok yi-o’ yak nirij-o.

³⁹ Yosoloma, an-nen kin wok obosolar-e: ’Mbirimindik pem nde kwe-nen nde nimin lobok yurak nimbir-o yosola-ge, ngge kwarurag-o?’ luk yigi-o.

⁴⁰ Yosolakmu-ge, at-nen yosolar-e: ’An-nen idnak Nagawan Indo pempa an-e at-nen yidnak yidnak kwaroso Nap iri-nen idnak aid nap-nen-e kat yongga korosola, kat-nen yabu wanugun iri-ge ebe worak ma-o. Nde, an nambara amanggim kwe-ge an nerem nap an neid owe owot-nen nderak ennggendumu-net kagun-o.

⁴¹ Kar-e an nowe nowot endam mburugundik, it-nen-e an nambara-nen wanurak kwe wok kirigit lak, larok yogola perak, wene owak mbarigen iri na-ge kat kebem-e lag-o’ luk yak nirij-o.

⁴² Yanem an-e yi kenanggugwi sa wok yosolar-e, tepan narem nak-nen yosolar-e: ’Nagawan Indo an-nen ndegel oboso nap Abarakam Embal Pem Nagawan wa-e. An tula lobok yigi yu ebe worak tak pi-o.

⁴³ Nde, an-e yi kenanggugwi sa yu me-t mendak worasoma, kwe ndugum mbi yi kenanggil lobok yosola-ge, ”Yi mak niri-o” luk nggi yimin-o.

⁴⁴ Nde, at-nen nde yi mak norosolat, an nowam unta wam yi kenangga mak tosolat yosola-ge, iri-ge Nagawan Indo kat-net an nonggo bidnak nap ambara iri na amanggim lenak pidnag-o peramin-o’

⁴⁵ luk, awo tepan narem nak-nen yil mborosoma-ge, Iripka nde yi kenanggeyekluk yimbe endak pem keyoksa lobok yosolat, yi kenanggugwi sa iri me yi kenanggosoma, an-nen ’Yi mbi mak niri-o’ luk nggi yigi-o.

⁴⁶ Yosolakmu, ndag-et nak endak pem-nen nggosa yarik, ’Min-o’ yak nirij-o. ’Nde, kat kowam unta wam ereba na an-nen yi mak timin-er-o’ luk yij-o. Yosoloma-ge, an-e yi na nasola, an nowam ereba na min-et yi mak tij-o.

⁴⁷ Iri lug-e, an-nen-e: ’Kat keij-e ta-o?’ luk kin wok ibigi-o. Iri yosola, at-nen yosolar-e: ’An neij-e Naot min Milka min enmbara Mbetuel-o’ yij-o. Yosola karug-e, an-nen-e enabi sumbanok abirumbun pem yirik puruk, manggo mberen erabit pem yirik pigi irir-o.

⁴⁸ Iri luk, an-e tud luk Nagawan Indo erembel wanosolat, Abarakam Embal Pem Nagawan kek tak posolat erembel wanosolar-e: ’Kat-nen-e an nonggo pid nap owe owot endam nok nok lit nuburuk lobok yigen-o. Iri yigenma, an-e Abarakam ambara amanggim kwe ndugum iri imin lambuk yigi-o’ luk yigi-o.

⁴⁹ Nde, kit-nen-e an-nen ndegel oboso nap iri na nde abuwa karuk, at indi-n peragidnak nde kwarurak peragolat-nen-e an yak nururag-o. Lak ala na yag-et nururag-o. Iri yogola, an-nen kwarurak nindi wok mak-nen-o” luk yij-o.

⁵⁰ Yosoloma, Mbetuel min ambara Laban min-nen yogolar-e: ”Yigen ereba oboksa-ge Nagawan Indo nak-nen kwaridnak me, nit-nen wene yurag-e meya-o.

⁵¹ Iri ala karuk, Nagawan Indo-nen yid iri nggal-et lagwe Iripka yu-ge kat kimin mburuwarik, kat-nen ndegel oboso ambara-nen wanuwag-o” yiga-o.

⁵² Yogolikma-ge, Abarakam ndegel oboso nap iri na-nen wene iri kulurug-e, tud luk Nagawan Indo erembel wanij-o.

⁵³ Iri luk, sum min unmuruk pugwi mende emas min perak min-nen konidnak enabi sumbanok, eneyanggo sumbanok ereba na-ge kwe Iripka wok turuk, onggo nggok pugwi mende erep min-et ija min kwe iri irid min kenangga wok indij-o.

⁵⁴ Iri rak purug-e, Abarakam ndegel oboso nap iri na-ge anggamirak inmin-e nunggwi mende min yi min nuruk, iri me nene yiga-o. Nde, nene luk, men yogolar-e, Abarakam ndegel oboso nap iri na-nen yosolar-e: ”An nonggo bid nap eram mbereyek-nen ’Mbiri-o’ luk yak nerer-o” yij-o.

⁵⁵ Alat nde, kwe owe min ija min-nen yogolar-e: ”Iripka-ge tepan misik ala na, ap misik inggi nene luk ala na-nen mburuwa-o” luk yiga-o.

⁵⁶ Yogolikma-ge, Abarakam ndegel oboso nap iri na-nen yosolar-e: ”Iri yogolat, an tena nibili-ge meyog-o. Nde, Nagawan Indo-nen an-nen tu lobok yigi-ge ebe worak tak pij-o. Iri ala-ge, an nonggo bid nap eram mbereyek-nen ’Mbiri-o’ yak nerer-o” luk yij-o.

⁵⁷ Yosoloma-ge, it-nen yogolar-e: ”Iri ala-ge, Iripka wene mbo buruk, at indi ngge perasu kin wanuwog-o” luk yiga-o.

⁵⁸ Nde, Iripka wene mbo buruk, kin wok obogolar-e: ”Kar-e ap yu imin mburugun, lak?” yogolikma, at-nen yosolar-e: ”Eyo. Imin mbirimin-o” yij-o.

^59-60 Iri yosola karug-e, kwe mbi pempa Iripka ndegel uburuk nusu iri na enmbereg-et Abarakam ndegel oboso nap iri na min at imin lobok yiga nap ereba ”Inmin mberer-o” yak indiga-o. Yak unduruk, Iripka iri na imbiringgat tak obogolat-nen yak togolar-e: ”Iripka kar-e ap mondok kwarat iniya kwat min-o. Kat-nen wigarak-nen-e it unuwim nap unuwi silmu nggogolar-e, ir-e ombok nggwe luk wolmag-o!” luk yak tiga-o.

⁶¹ Iri luk, kwe Iripka na ndegel ubugwi kweyap ndugum ereba na inmin-e mburuwokluk abu lid lud tak puruk, unta wam ombol pem kore yil laruk, Abarakam ndegel oboso nap iri na imin mbiriga-o.

⁶² Nde, iri tarem-e Isak na-ge nembaga ereba ma-nen lobok yarik, yi mbun emnde mbarak unu-ge ”An yebet neyaso uruk na woraso iri-nen yidnak id mbun emnde mbarag-o” iri na keya buruk lobok yarik, o Kanaan-nen abare ena (selatan) nggwe worasoma,

⁶³ misik tarem-e keyama nggwe o lije ma-nen waring kil eyapmu ereba na me nosolat-nen erengen yik kagaidnggal-e unta wam ereba lobok yosola, yik kagaij-o.

⁶⁴ Nde, kwe Iripka na-ge Isak karuk, unta wam ombolwak pem-nen kapsa mbosolar-e:

⁶⁵ ”Ap yapmu-nen nendam lobok yusu yu-ge ta-o?” luk Abarakam ndegel oboso nap iri na kin wanij-o. Kin wanosoloma, ap iri na-nen yak tosolar-e: ”At iri-ge an-nen ndegel oboso nab-o” luk yij-o. Yosoloma-ge, kwe na-ge sum pem erare kuragij-o.

⁶⁶ Iri luk, ndegel oboso nap iri na-nen-e at-nen kwaridnak miridnak ereba na Isak na imbiri bem ndindirij-o.

⁶⁷ Iri lug-e, Isak-nen-e kwe Iripka na-ge ija Sara woraso o lije sum wi iri na me imin nggwarik, wanij-o. Nde, Isak-nen Iripka abuwa kasolat-nen ija wat yidnak me, indi angabanga rak woragid iri na-ge kondok yij-o. 25:1-6 Ayat ya arem-e Abarakam ilirak kwe misik-nen nderak ereba na unnu mbarak worasu-o.