NDAK WIRIDNAK WENE 23 - Nanduk Ngget Tul Pidnak Wene

Sara wat yamu, yapma burak Abarakam-nen nggweyak onggo bid wene 23:1-20

¹ Nde, kwe Sara iri na woralar-e, olengen seratus dua pulu tuju (127) irit woragij-o.

² Woraruk, o Kanaan nggweyak pem o Eboron iri me wat yamu-ge, Abarakam iri na-ge indi yorok yosolar-e, ogwe ubud-nen yip tij-o.

³ Iri yosolar-e, Abarakam iri na-ge ogwe lugwinik iri na-ge iniksa keya buruk, o iri me woragwi Et nap endam mbirij-o. Mberarik yak ondosolar-e:

⁴ ”Naptag-o. An-e ap sal-et nde, kennggendumu worasu-o. Iri bem-e an nogwe yapma peyek-nen nggweyak siyak mbi kenpem onggo purag-e nunggwirig-o?” luk yak indij-o.

^5-6 Yosoloma, it-nen onggo yak togolar-e: ”Kar-e nit nennggendumu kunu worag-et worasu me, nit nonnggweyak ninndimu yu me-t yapma bi-o. Nit oboksa-nen na at yapma burak ondoro konurag-e nindingen-er-o” luk yak tiga-o.

⁷ Yogolikma-ge, Abarakam iri na-ge it endam iri me tebe luk-nen yosolar-e:

⁸ ”Ndemeret nde, kit-nen kinndi mbek tak pem-et yu me yapma burag-e ob-er-o peragolar-e, naptag-o. Soat ambara Eboron nggi yak ter-o.

⁹ Iri yugupmu, at eyabu eralu kerep yanggo Makpela iri an nebem onggo wanuwag-o. At-nen nde onggo wanurak perasolar-e, an nebem-et kenlengen pem-et onggo wanuwag-o. Iri yosola-ge, nggweyak iri-ge an-e ombo wolmomtak me, onggo-ge indi tisa wok timin-o” luk yak indij-o.

¹⁰ Nde, o siri iri me nggugwi sa pak tumende bem iri na me wene iri na mbarogola-ge, at Eboron iri na-ge Et nap-nen wene mbarili sa iri na me-t ennggendumu koreyak woragij-o. Woralar-e, iri me koreyak worali ereba na enlengen pem-et Eboron-nen wene iri na onggo yosolar-e:

¹¹ ”Abarakam wa-e. An nelem nap enlengen pem-et yak kurusu-o. Kerep yanggo iri-ge nggweyak min-et kat kogwe lugwinik iri yapma bonok-nen kar-et wok kirimin-o” luk yak tij-o.

¹² Iri yosoloma-ge, Abarakam iri na-ge Et nap ereba na entalu tebe yij-o.

¹³ Iri luk, ap erep ereba na min-et kuluwakluk Abarakam-nen Eboron yak tosolar-e: ”Nab-o. Wene yimin yu kwara kuli-o. Konggweyak min ereya oboksa an onggo buruk, nogwe lugwinik iri yapma peyek-nen kar-e tol yu-ge wanir-o” luk emengen mbarij-o.

^14-15 Yosoloma, Eboron-nen onggo yosolar-e: ”Nit nenmberek kundik wolmomtak iri nak nggok-nen yusu-o. Nggweyak marig-et onggo-ge perak kerep tol empat ratus (400) purak ereya nggal-e nggok-nen yusu-ge lag-o. Nab-o. Kogwe lugwinik iri-ge iri me-t yapma bi-o” yak tij-o.

¹⁶ Yosoloma, Abarakam-nen-e: ”Ob-o” yosolug-e, Eboron-nen onggo burak tol unu yarid ereya na ndak ndak wonasa keya buruk, perak tol ereba na angin ndak worosolar-e, silobulo wene wurugwi nap-nen angin ndak wurugwi ndak ndak irit ndak wosa angin-e empat ratus (400) irit wonarak puruk, Et nap ereba na enlengen pem-et nggweyak onggo Eboron wok tij-o.

¹⁷ Ap Eberon onggweyak Makpela o Mamere mo luwaso (timur) ambigit nggwe iri me na-ge Abarakam ombo yij-o. Nde, Abarakam-nen nggweyak onggo bid iri-ge yabu min kerep yanggo min e wi kere wi min ya ndigirik irit kuri wosa ombo yij-o.

¹⁸ Nde, Et nap o siri pak tumende bem iri wene mbarurak ndok wiriga nap oboksa-nen-e: ”Nggweyak iri-ge Abarakam onggweyag-er-o” luk yiga-o.

¹⁹ Iri lug-e, Abarakam-nen-e ogwe lugwinik iri na-ge Kanaan nggweyak pem kerep yanggo Makpela iri na me yapma bij-o.

²⁰ Iri nggal kwasa nggweyak iri min kerep yanggo iri min-e nandug-e Et nap enarengge woragij-et nde, iri kuri-nen-e at-nen wigarak pem lud wat yogola, yapma unpurak Abarakam-nen onggo buruk winde yij-o.