NDAK WIRIDNAK WENE 22 - Nanduk Ngget Tul Pidnak Wene

Mbal Pem Nagawan-nen ”Isak wosa namanggim pi-o” luk Abarakam na watsa yak tid wene 22:1-19

¹ Nde, siyak woraruk, mbi tarem-e Mbal Pem Nagawan-nen Abarakam indi tugup lak worasu iri na kayekluk, Mbal Pem Nagawan-nen-e ”Abarakam wa-e” luk wene mbo bij-o. Wene mbo obosoloma, Abarakam-nen erep nggarosolar-e: ”An-e yu-o” luk yij-o.

² Yosoloma, Mbal Pem Nagawan-nen yak tosolar-e: ”Kar-e kambara misiget nderak Isak kindi kundik iri imin luk, o Moria nggwe mbiri-o. Nde, ereba ma-nen an-nen-e ndobo misik mirik kibimin-o. Nde, ndobo iri bem-e kambara iri-ge an namanggim wosa kan pi-o” luk yak tij-o.

³ Yak tosoloma, nene luk, kuplila-ge Abarakam na-ge kan nggara kelerai wam ombolwak pem kamasa puruk yarik, at ambara Isak min ndegel ubugwi nap mberen inmin luk, o Mbal Pem Nagawan-nen yak tid iri na nggwe mbiriga-o.

⁴ Nde, mborogolar-e, mberen nene luk, kenan tarem tak posolat-nen yik kil mbiridnggal-e, ndobo Mbal Pem Nagawan-nen yak tid iri na-ge erepma-t yik kagaij-o.

⁵ Yik karuk, Abarakam-nen at ndegel ubugwi nap mberen ereya na yak ondosolar-e: ”Kir-e kelerai wam yu min yu me-t wolmer-o. An-e nambara nenmberek ele me-t mburulndik, Nagawan Indo erembel wanuruk, lobok yul-o” yak indij-o.

⁶ Yak unduruk yarik, Mbal Pem Nagawan amanggim wosa kan purak kan iri na-ge Isak endak pem puruk, nde, ar-e kanduk min kabo min wanuruk, it enmberek mborogolar-e,

⁷ Isak-nen yosolar-e: ”Neid wa-e!” yosoloma, Abarakam-nen erep nggarosolar-e: ”Nambara wa-e. No-o?” luk yak tij-o. Yak tosoloma, Isak-nen yosolar-e: ”Nir-e kanduk min kan min waruk mbitli-t nde, Mbal Pem Nagawan amanggim wosa kan purak lomba wam-e lak yu-ge, ngge-o?” luk yij-o.

⁸ Yosoloma, Abarakam-nen erep nggarosolar-e: ”Mbal Pem Nagawan-nen nak lid lud tak puwa-o” yak turuk mbiriga-o.

⁹ It na mbirigarik, Mbal Pem Nagawan-nen Abarakam yak tidnak iri na me wok yogolar-e Mbal Pem Nagawan amanggim wosa kan purak ondoro kona mendaga pil laruk yarik, kan waruk mbirid ereba na-ge ondoro konid na bem ndama keya buruk, ambara na kamasa kan ndamak pid iri na bem mbinggirik pij-o.

¹⁰ Iri rak purug-e, ambara na wereyekluk kabo wanij-o.

¹¹ Wanuruk, wereyek perak yosoma-ge, Nagawan Indo-nen yidnak aid nap-nen mbal nggwe-nen wene mbo bosolar-e: ”Abarakam, Abarakam!” luk yosoloma-ge, Abarakam-nen nggarosolar-e: ”An-e yu-o” yij-o.

¹² Yosoloma-ge, Nagawan Indo-nen aid nap yak tamu, Abarakam yak tosolar-e: ”La iri andi bandi rak posolat, ebem yi kwatlik ndi kwatlik kwarurak pug-o. Kar-e kambara misiget nderag-et nde, kar-e an-nen yidnak iri na-t kek tak posolat, an-nen yidnak yidnag-et kwarosolar-e, kambara kindi angin lag-et wosa an namanggim peyekluk yusu keyagi-o” luk yak tij-o.

¹³ Iri yosola ereya na-net Abarakam na yik kagaidnggal-e, lomba wam kusi misik anggul ambo wererak ereya na-nen egere bem ket mbetla keya buruk worasoma, yik kagaij-o. Karuk, Abarakam-nen-e lomba wam kusi iri na-ge waga yarik, ambara Isak ondolma Mbal Pem Nagawan amanggim wosa kan pij-o.

¹⁴ Kan puruk, Abarakam-nen iri kwarid sa iri na unu yarosolar-e: ”Ukwe pidnak mende Nagawan Indo-nen lud tak pidnak sa-o” luk unu yarij-o. Yawo-nen na ap-nen yogolar-e: ”Nagawan Indo ondobo yu bem-nen Nagawan Indo-nen-e ap-nen ukwe pidnak lud tak pidnag-o” luk yili-o.

¹⁵ Tuguruk, Nagawan Indo-nen idnak aid nap-nen Abarakam wene mbo bosolat-nen yosolar-e:

¹⁶ ”Nagawan Indo-nen yosolar-e: ’An nondomok nunu nggal-o’ luk owak mbarosolar-e: Kar-e yu kwarosolar-e, kindi angin yigit lag-et an namanggim kambara misiget nderak na-ge wosa peyekluk yigenma me,

¹⁷ an-nen-e kar-e imbiringgat kwarat kebem mberak posolar-e, kat-nen wigarag-e wonaru nggal, yi mbini nggal ligik lujwa-o. Nde, kat-nen wigarak-nen wim nggogolar-e, wim nab-e urugwe nggwe rak unpuwa-o.

¹⁸ Kar-e an-nen: ’Irit kwari-o’ yigi iri na ndak ndag-et kwarigenma me, yi nap ndi nap ap enlem oboksa-nen an-nen kat-nen wigarak inmbiringgat tak pigi nggal, imbiringgat tak unpuwakluk an nemengen mbaruwa-o” luk owak mbarij-o.

¹⁹ Iri lug-e, Abarakam na-ge tuguruk ndegel ubugwi nap mberen ereya na endam mbirij-o. Inmin lambuk luk, mbirigarig-e, o Mbereseba wok luk, Abarakam na-ge pem iri me-t woragij-o. 22:20-24 Ayat ya arem-e Abarakam owot Naot-nen wigarak unnu mbarak wene worasu-o.