NDAK WIRIDNAK WENE 21 - Nanduk Ngget Tul Pidnak Wene

Isak ndagidnak wene 21:1-8

¹ Nagawan Indo-nen-e: ”Kimbiringgat tak pimin-o” luk Sara yak tid iri na ndak ndag-et Sara na-ge imbiringgat tak pij-o.

² Abarakam na indi worak luk worasoma-ge, Mbal Pem Nagawan-nen wat tak pid iri na tarem ndak ndak kwe Sara na abila luk, li ap mbi ndagij-o.

³ Ndagosoloma-ge, Abarakam-nen la iri na unu-ge Isak irit yarij-o.

⁴ Nde, la na ndaguruk, tuju nene luk delapan pem-e Mbal Pem Nagawan-nen ”Irit kwarurag-o” yid iri na ndak ndag-et kwarosolar-e, la na iye ambesap mbarij-o.

⁵ Nde, Abarakam-e olengen seratus (100) pem worala, Isak ndesa mbij-o.

⁶ Nde, Sara-nen yosolar-e: ”Mbal Pem Nagawan-nen-e an-e nalen-nen ndowaga nda rak nibij-o. Nde, ap-nen nde an la ndaki yu kulurug-e, an nda tigi iri na nggal enalen-nen ndowaga nda tuwa-o” luk yij-o.

⁷ Iri yuruk yarik, siyak min nambena yosolar-e: ”An nun-e abu indi worag-et nde, nambara ndakirik, kamo mak tusu-o. Iri ala-ge, ta-nen nggal an nun Abarakam yak togolar-e: ’Kat kogwe Sara na-ge la ndagarik, kamo mak tusu-o’ yuwa-o?” yij-o.

⁸ Nde, la na nggok yosolat, kamo mbarak posola-ge, Abarakam-nen-e alen yosolat, yi mende ndi mende nggok sagij-o.

Agat ambara Ismael min langgal eneyagaid wene 21:9-21

⁹ Nde, misik tarem-e Abarakam min Mesira kwe Agat iri na min enmbara Ismael na Sara ambara Isak iri na imin keyari piga-o.

¹⁰ Keyari pukmu, Sara-nen karuk, Abarakam yak tosolar-e: ”Yawo-ge kwe an ndegel noboso kwe iri-ge ambara min langgara wirik unpurag-o. Kat kimining angge an nambara Isak-nen winde yurak iri-ge mondok at ambara iri-nen mondok wanurag-e lag-o” luk yak tij-o.

¹¹ Yak tij-et nde, Abarakam iri-ge Ismael iri na at ambara-t nde, wirik purak indi angin yij-o.

¹² Alat nde, Mbal Pem Nagawan-nen Abarakam yak tosolar-e: ”Kar-e ndegel koboso kwe Agat iri min ambara min enpem kumud kasu-ge meyog-o. ’Kat-nen wigarag-e kwarat ma-o’ luk urul yak kirigi na-ge Isak ebem-net kwat ma me, kar-e Sara-nen yak kurusu irit kwari-o.

¹³ Iri nggal-et Ismael iri na kat kambara-t me, Agat ambara iri na at-nen wigarak na kwarat yosolat, ap enlem nggok irit kwat ma-o” luk yak tij-o.

¹⁴ Yak tosoloma-ge, kub-e Abarakam-nen-e nunggwi mende tu laro wok turuk, sapi wam aboro-nen konidnak yimbe iri na arem yi kenanggo mbi kwe na wok turuk, la na kamboksa ombol pem pak nggerasa buruk, wirik pamu, kwe na-ge o Mbereseba lid iri na nggwe-t waring kasolat woragij-o.

¹⁵ Nde, kwe na ereba-t waring tenak worasoma-ge, yi na abu mondok lak yij-o. Lak ala karug-e, la na-ge egere ndumu ereba keya burug-e,

¹⁶ kwe na-ge siyak erepma (100 meter) nggal mberarik, koreyak worasolat-nen perasolar-e: ”An nambara yu-ge an nerengen pem-nen wat momtak iri-ge an-e mondok nindi andi-o” perarug-e, yip tosolat woragij-o.

¹⁷ Nde, Mbal Pem Nagawan-nen Ismael ene kuluruk, mbal nggwe-nen Mbal Pem Nagawan-nen idnak aid nap-nen Agat yak tosolar-e: ”Agat wa-e. Kar-e noluk-nen kindi kabak yusu-o? Kar-e kwiye kasu-ge meyog-o. Mbal Pem Nagawan-nen-e kambara iri ene-ge abu kulij-o.

¹⁸ Kar-e kambara eram mburugundik, kambok turuk, yip lak tak pi-o. An-nen-e at-nen wigarag-e ap enlem nggok irit kwarak pimin-o” luk yak tij-o.

¹⁹ Iri yak turuk, Mbal Pem Nagawan-nen Agat na erengen kuwarak posoloma, kwe na-nen yik kagaidnggal-e, yi mbun emnde mbarak misik yik kagaij-o. Karuk yarik, kwe na-nen sapi wam aboro-nen konidnak yimbe iri na arem yi kenangga waruk mberarik, la na mak tij-o.

²⁰ Mbal Pem Nagawan-nen-e Ismael na imin irit woralar-e, la na-ge nggok irit yij-o. Nggok luk, la na-ge o lid Paran iri na me-t woralar-e, ar-e towe mena woroso inggi mbuk worak irit woragij-o.

²¹ Worala-ge, ija-nen-e la na-ge kwe-ge Mesira kwe misik wok tij-o.

Abarakam min Abimelek min kundik wolmomtak wene mbariga wene 21:22-34

²² Ereya tarem-e Nagawan Abimelek min at-nen idnak esan ombo ereba na onowe Pikol min-e Abarakam eram lobok yogolat-nen yogolar-e: ”Kat-nen yi kwatlik ndi kwatlik kwarusu ereba-ge Mbal Pem Nagawan-net yongga kurusu-o.

²³ Iri bem-e kat-nen-e an min an nilirak min an-nen wigarak min-e ’Mondok mot mot nag-et kwat konposolat woramin-o’ luk Mbal Pem Nagawan imbiri bem-et owak mbari-o. An-nen kat kimin nindi konak woragi iri na nggal-et kat-nen na an min yu me woragwi nap ennggendumu kat worasu nap yeba min-e konak nak irit kwat nonposolat wolmomtag-o” luk yak tij-o.

²⁴ Yosoloma, Abarakam-nen yosolar-e: ”Irit kwarimin-o luk mondok owak mbarusu-o” luk yij-o.

²⁵ Iri yij-et nde, abok nggwe-ge Abimelek ndegel ubugwi nap-nen yi kenanggurak ondoro yi mbun mbarid mengga waniga iri na yebet karug-e, ”Niri nera-nen owak mbarigi-o” luk yij-o.

²⁶ Iri yosola karuk, Abimelek-nen yosolar-e: ”Wene iri-ge an-e naru bug-o. Ta-nen mengga wanij-o? Iri wene-ge kar-e an-e yak nirigit lak, yawo-net yosola kulusu-o” luk yak tij-o.

²⁷ Yosoloma-ge, Abarakam-nen olomba wam min esapi wam min-e wonasa keya buruk, Nagawan Abimelek irit wok tij-o. Iri kwarogolar-e, it mberen ennggendumu kundik wolmomtak irit wene mbariga-o.

²⁸ Nde, Abarakam-nen-e olomba oro ereba na enggendumu-nen lomba mendaso tuju irit lena arik tak posola,

²⁹ Abimelek-nen yosolar-e: ”Ereba-ge no manggim iri kwarusu-o?” luk kin wok ibij-o.

³⁰ Yosoloma, Abarakam-nen onggo yosolar-e: ”Lomba wam tuju ya-ge kat-nen nde: ’Yi kenanggurak ondoro iri-ge at Abarakam-net yalamu-o’ yosolar-e, yenggerak purak pem lomba ya-ge kat wanurag-o” yak tij-o.

³¹ Iri nggal kwarogolat iri me-nen it enmbereg-e ”Kundik wulmul-o” luk, owak mbaridnak ala karuk, iri me unu-ge Mbereseba irit yariga-o.

³² It mberen iri na Mbereseba iri me-nen kundik wolmomtak wene mbatlug-e, Abimelek min Pikol min-e enma Pilisin nap woragwi sa mbiriga-o.

³³ Iri luk, Mbereseba iri me Abarakam-nen e tamariska misik yagurug-e, iri na me-ge Abarakam na-ge pem-et woraso Mbal Pem Nagawan, Nagawan Indo erembel wanosolat woragij-o.

³⁴ Iri kwat lug-e, Abarakam iri na-ge Pilisin nap enma ereba na-ge siyak woragij-er-o.