NDAK WIRIDNAK WENE 20 - Nanduk Ngget Tul Pidnak Wene

Abarakam min Abimelek min-nen kwaridnak wene 20:1-18

¹ Nde, Abarakam na o Mamere-nen mberarik abare (selatan) nggwe Kanaan nggweyak pem o Sut wok Kandes wok iri me-t woragij-o. Woraruk, imbirik Nggerat mberarik woralar-e,

² Sara iri-ge at ogwe na-t nde, at-nen yosolar-e: ”Sara yu-ge an nowor-o” yidnak pem-e Nggerat Nagawan Abimelek iri na-nen-e kwe Sara iri na eram pil lobok yuwakluk ap wirik inpij-o. Iri yamu, kwe Sara iri na pil lobok yikma worasoma-ge,

³ misik tarem-e nabi bem Mbal Pem Nagawan Abimelek eram wok yosolat-nen yosolar-e: ”Kwe iri-ge un worag-et nde, kar-e wanigendik me, mondok wat yugun-o” luk yak tij-o.

⁴ Nde, Sara iri na-ge Abimelek-nen-e wanij-et nde, imin-e nene yigit lag-o. Nde, Nagawan Abimelek-nen yosolar-e: ”Nagawan Indo wa-e. An-e meya-ge kwarigit lag-o! Irit nde, kar-e an nuwokma woragwi nap inmin lak tak nunpugun-a?

⁵ Abarakam ondomok-nen ondokwak nggwe-nen yosolar-e: ’Kwe yu-ge an nowor-o’ yosolat, at kwe yu-nen na Abarakam-nen yid iri na nggal nag-et yosola karuk-nen waneyek nak kwasa wanigirig-o. Iri bem-e an-e meya kwarigit lag-o” luk yak tij-o.

⁶ Yosoloma, Mbal Pem Nagawan-nen nabi bem yak tosolar-e: ”Ndemerer-o. Kar-e kwe iri-ge kindi mbek tak pem waneyek nak kwasa wanigen iri bem-nen kwe iri imin nene yugun naru kesari tenaguruk worala, kar-e an nimin meya kwarigit lak yigen-o.

⁷ Alat nde, yawo-ge kwe iri-ge tuguruk un eram pil mbururag-o. Nde, kwe iri un-e an nene lomboksa yoso nap-nen yusu-o. At-nen-e kat wat yugun naru kamanggim tepan yuwa-o. Nde, kat-nen nde kwe iri nde un eram pil mbirigit lak yugun nggwe-ge kat min kat kuwokma woragwi min oboksa wat yugub-o” luk yak tij-o.

⁸ Iri yak tamu nene luk kuplila-ge at eyabu wanugwi nap ereba na yonggo unpuruk, ndok worogola-ge, Mbal Pem Nagawan-nen at yak tid wene ereba na enaru rak pij-o. Iri yosola-ge, ir-e kwiye kwarat kaiga-o.

⁹ Yak undurug-e, Abimelek-nen Abarakam wene mbo buruk, kin wok obosolar-e: ”Kar-e noluk-nen iri nggal kwat ninpigen-o? An-e no meya kwat kubukmu-nen kar-e an min an-nen tenagidnak wi woragwi nap min lak tak nunpuwakluk nenare bigen-o? Ndemeret iri mende-ge kwarugwi bug-et nde, noluk kwat nibigen-o?

¹⁰ Noluk-nen kar-e iri nggal kwarigen-o?” luk yak tij-o.

¹¹ Yosoloma, Abarakam-nen onggo yosolar-e: ”O yu me-ge Mbal Pem Nagawan indi aye kagwi buk nap ennggendumu me, an nogwe wanurak puruk nuruwa yur-a? peraruk-nen iri nggal yigirig-o.

¹² Ndemeret kwe yu-ge an nowor-o. Nineij-e misiger-et nde, niniya nak arik tak me, ndemeret nde wok kerak mbigerig-o.

¹³ Iri kwarige bem Mbal Pem Nagawan-nen yosolar-e: ’Kar-e keid min wolmomtag-e lag-o. Are, yi wi ndi wi ereba nak waring tenak wolmin-o’ yak neramu, yi wi ndi wi nak waring tenak woralar-e, an-nen nogwe yak tosolar-e: ’Kat-nen-e an nimin-e ap oboksa yak ondosolar-e: ”At yu-ge an nowe-o” yak undurag-o. Kat-nen nde iri nggal yosola-ge, ndemeret kar-e an-nen yidnak yidnak nak kwaroso-nen yusu-o luk yenggerak kibimin-o’ luk yak tigi-o” luk yak tij-o.

¹⁴ Wene iri na yogolug-e, Abimelek-nen kwe Sara iri na-ge tuguruk Abarakam wok tosolar-e, at ndegel ubugwi nap min lomba min sapi min irit Abarakam wok tij-o.

¹⁵ Iri luk, Nagawan Abimelek-nen Abarakam yak tosolar-e: ”Yeba-ge oboksa an nuwi nggweyak-nen yusu-o. Iri ala-ge, kat-nen wolmomtak peragun sa iri me-t ondoro wanuruk wolmin-o” yak tij-o.

¹⁶ Yosoluk, Sara yak tosolar-e: ”Ap oboksa-nen Sara kar-e meya kwarigit lag-o luk yenggerak puwaklug-e, kat kowe iri-ge perak tol-e seribu irit wok tigi-o” yak tij-o.

^17-18 Abimelek-nen Abarakam ogwe Sara waneyekluk yid iri na bem-nen ndowaga Nagawan Abimelek woraso sa woragwi kweyab-e Nagawan Indo-nen ibiri rak inpij-o. Iri ala karuk, Abarakam-nen Mbal Pem Nagawan emengen mbarosola-ge, Abimelek iri na ki rak obosolat, at ogwe min ndegel ubugwi kweyap min ki rak inpij-o. Iri yosola-ge, kweyap li ndakwi buk kwat yiga ereba na-ge tuguruk li ndakwi kwat yiga-o.