NDAK WIRIDNAK WENE 19 - Nanduk Ngget Tul Pidnak Wene

Sorom nap-nen meya kwarugwi wene 19:1-11

¹ Nde, aid nap mberen ereya na-ge mbirigarik, kubu nggwe Sorom wok yiga-o. Nde, Lot na-ge o iri na kerep pak tumende bem koreyak worasoma, ap mberen ya nak wok yogola karuk, men luk mberarik, wok onposolar-e, it indipma tud yosolat-nen

² yosolar-e: ”Naptag-o. An nema ngguruk, kunuwok marak pogola, an nema nene luk-nen mbururak nde ala-ge, kubu kabu-nen mbururak peraigep sa mbururag-o” yak indij-o. Yak ondosoloma, it-nen onggo yogolar-e: ”Nab-o. Nir-e silmu yeba-t nene yul-o” yiga-o.

³ Yogola, Lot-nen-e enmengen kwarat mbarid mbarid, at imin at ama nggwiga-o. Nggogolar-e, nunggwi mende undu konak nak min oroti kan engen pem wora min enndam pamu, ndak irit ningga-o.

⁴ Nde, it na awo nene yigit lak worakmu-ge, o Sorom iri me woragwi nab-e o iri me lop lop wiriga-o. Iri yogolar-e, o iri me woragwi nap indi worak-nen sujwe-nen oboksa iri me woraiga-o.

⁵ Ap ereba na-nen enne nggoksa Lot yak togolar-e: ”Ap kat kama nene yurak lobok yiga ya na-ge ngge me worali-o? Mondok nendam pi-o. Inmin nene yul-o!” yiga-o.

⁶ Yogola, Lot na mbepme tumende bem laruk, tuguruk tu na ombol nggwe lerak puruk-nen

⁷ Sorom nap yeba na yak ondosolar-e: ”Nenggamirak wiwa nag-o. Kir-e meya yu nggal kwarurak yili-ge mondok meyog-o.

⁸ Naptag-o. Koler-o. An niligwami ap-nen inmin nene yugwi buk ya kendam peyeg-o. Kit-nen kwarurak perali iri kwat onpobok-nen-o. Alat nde, it ap sal ya-ge an nema nggwidnak ala, an-net mondok inmiri yusu me, it enpem-e yi kwatlik ndi kwatli-ge kwarurak pug-o” luk yak indij-o.

⁹ Alat nde, it Sorom nap ereba na-nen Lot yak togolar-e: ”Kebe-o! Kat na ap sal nin nap-net yusu-o. Kat-nen nit nenpem wene mbarugun-a? Mondok kebe-o! Lak nde ala-ge, it mberen inmin kwat unpuwokluk yili yu-ge te-t nde, mondok terak minik ija nggal kwat kubul-o” luk panggo yogolat, Lot na pela keya buruk, tu na yutlukmu,

¹⁰ ap ngguru mberen ya na ininggi mbepme wirik pigarik, Lot na lesa ibil ngguruk, tu na lerak piga-o.

¹¹ Iri luk, ap ya na-nen ap mbepme yeba na-ge enlengen ugut tak pikma, tumende na kudtag-e meya agaij-o.

Lot na Sorom keya bidnak wene 19:12-22

^12-13 Ap ngguru mberen ya na-nen Lot yak togolar-e: ”O siri yu-ge mondok lak tak pul me, kat kambararak nde, kararak nde, kararak ununtak, kowa kowot nde o siri yu me nde woragola-ge, yu me-nen inmin luk, mondok nin sa mbururag-o. Nde, o yu woragwi nap onpok mondok meya iri Nagawan Indo-nen kulurug-e, o Sorom siri yu lak tak puwakluk nir-e ninpil lobok yamu-o”

¹⁴ yogolikma-ge, Lot na-ge at ararak mberen wok unpurak enabi pili ereya na endam mberarik, yak ondosolar-e: ”Kir-e yanem-et nak o siri yu keya buruk, nin sa mbururag-o. O yu-ge Nagawan Indo-nen mondok lak tak puwa-o” yak indij-et nde, at yu-ge keyari wene nde yusu kwasa keya biga-o.

¹⁵ O nda yekluk kil posola-ge, aid nap mberen ya na-nen ndag-et nak mburuwakluk emengen mbarogolat-nen yogolar-e: ”Mondok ndag-et nak! Kat min kogwe min kararak mberen min o siri yu lak tak posolat imin lak tak kunpuwa naru, ya me-nen ndag-et nak mberer-o” luk yak indij-o.

¹⁶ Nde, Lot na-ge indi mberen yosola karuk, aid nap mberen ya na-nen-e enabuwa-nen at ogwe min nde at ararak ndugum mberen ereya na nde ininggi tena buruk, ndemera o siri iri na ombol nggwe inpil mbiriga-o.

¹⁷ Inpil mbutluk, aid nap misik-nen yosolar-e: ”Kinndi imiri yogolar-e, mondok pong nak kudtag-o. Konmbol nggwe yik kagolat, tu ndumu lidmu ndong yogolat, mondok kwarurak pug-o. Lak tak kinpigit lak makluk, ndobo worak ereba nggwe-t pong kudtag-o” yak indij-et nde,

¹⁸ Lot-nen yosolar-e: ”Ije! Nab-o. Nir-e ndobo worak nggwe mberer-o yak nundusu-ge meyog-o.

¹⁹ Nde, kat-nen-e ndemeret yongga norosolat, nindi imiri yusu-t nde, ndobo worak nggwe ereba-ge tu-ge mondok erepma me, an-e tu-ge awo-t mborosoma, lak tak nuburak iri nimbirik mborosolar-e, lak tak nubuwa yu-ge ngge-o?

²⁰ Yik ker-o. O siri marik misig-e nabuwok nggwe koroga worasu ele-o. Iri ala-ge, lak tak nubuwa naru nde, ’Iri me mbiri-o’ yak niri-o” luk yij-o.

²¹ Yosoloma, aid nap iri na-nen onggo yak tosolar-e: ”Iri ala-ge, ob-o. O siri marik iri-ge lak tak pimin pug-o.

²² Ndag-et nak mbiri-o! Kat iri me wok yigit lak ma-ge, an-e yi kwatlik ndi kwatlik kwarurag-e meya-o” yij-o. Nde, Lot-nen yosolat ”O siri marig-o” yidnak pem-e o siri iri unu-ge Soat yiga-o.

Sorom min Nggomora min yigisa lak tak pid wene 19:23-29

²³ Lot na Soat wok yosoma-t molengen kona pil wagij-o.

²⁴ Wok yosola-ge, mimo Nagawan Indo-nen kanduk talme emben ninggis mende worak iri-ge o Sorom min Nggomora min ebem mberak pil mbuwasolar-e,

²⁵ o siri mberen ya na yigisa lak tak posolar-e, we o lid ereba na min ebem yak yidnak mende oboksa min o iri na me woragwi nap min oboksa mondok lak tak pij-o.

²⁶ Alat nde, Lot ogwe na-ge petla imbirik nggwe yik kasoma, kwe na-ge kerep mayu kwat yij-o.

²⁷ Nene nak luk, kub-e Abarakam na-ge tuguruk Nagawan Indo eralu mendak woragid sa iri na me ndag-et ndag-et mbirij-o.

²⁸ Mberarig-e, Sorom nggwe, Nggomora nggwe min o lid ereba na nggwe yik kagaidnggal-e, kule-ge nggweyak kan nasolat kan mondok nggok kwiye worak mabosoma-nen laso nggal ndugunuruk lasola kagaij-o.

²⁹ Mbal Pem Nagawan-nen-e o siri ereba Lot woragid o lid iri na-ge iri nggal kwasa lak tak pij-et nde, Mbal pem Nagawan-nen-e Abarakam-nen yidnak iri na indi yebet karuk, Lot na-ge yongga worosola, mengga mberamu-o.

Moap nap min Amon nap min wigak yidnak wene 19:30-38

³⁰ Lot na-ge Soat wolmomtak kwiye-nen-e ararak mberen ya na inmin o ndobo worak nggwe ereba na mbirigarik, kerep anggo misik me woraiga-o.

³¹ Woragolar-e, ambap iri na-nen owot na yak tosolar-e: ”Nineid na abu indi worak, nde, o yu me-ge nit wok nunpuruk la ndagurak na ab-e lag-o.

³² Iri ala karuk, nir-e nineid yu indi nden kaso engen amburu mak turuk, li ndaguwok-nen imin nene yuwog-o” yij-o.

³³ Yurug-e, iri na tarem kubu-ge indi nden kaso anggut engen amburu mak turuk, ara ambap na-ge eid imin nene yij-e eid na-ge mondok indi abu nden kaga lak yidnak me, ara na imin nene luk mbirij-e kagit lag-o.

³⁴ Nene luk, kub-e ambap iri na-nen owot iri na yak tosolar-e: ”Yawo kubu an-e neid imin nene yigi-o. Kat na irit, an na irit, li namuwok-nen yawo kubu-ge mondok tuguruk nineid na indi nden kaso engen amburu mak turuk, kat imin nene yi-o” yak tij-o.

³⁵ Yak turug-e, iri na nggal-et kubu-ge Lot na indi nden kaso anggut engen amburu mak turug-e, ara owot iri na-ge Lot imin nene luk mbirij-e Lot na-ge mondok abu indi lak yidnak me, kagir-e lag-o.

³⁶ Iri kwarogolar-e, Lot ararak mberen ya na-ge ineid Lot ebem-net enabila yiga-o.

³⁷ Nde, kwe ambap na-nen-e li ap misik ndaguruk unu-ge Moap yarij-o. Nde, at iri-ge Moap nap yawo worali onmbo irit kwat yij-o.

³⁸ Nde, kwe owot iri na-nen-e li ap misik ndaguruk, unu-ge Mbenami yarij-o. Nde, at iri-ge yawo worali ap elem Amon iri onmbo kwat yij-o.