NDAK WIRIDNAK WENE 18 - Nanduk Ngget Tul Pidnak Wene

Mbal Pem Nagawan-nen: ”Li ap mbi wok kirimin-o” luk urul Abarakam yak tidnak wene 18:1-15

¹ O Mamere iri me e erembel wanugwi ereba na erem pem Abarakam na-ge koreyak woragij-o. Iri tarem-e mo eyak-nen uwi sum-nen wiridnak o lije iri na tumende bem koreyak worasoma-ge, Nagawan Indo-ge Abarakam imbiri bem nam yij-o.

² Ereya na-net Abarakam na undugun pugaksa yik kagaidnggal-e, ap kenan nde at urugwe ambigit nde mendak eneyarug-e, ndag-et nak wok inpil mborosolar-e, enndam tud luk-nen

³ yak ondosolar-e: ”Naptag-o. An nema wok yigit lak, wot karuk mbururag-e lag-o.

⁴ Naptag-o. An-e yi siyak kenangga kunuwok marak pumu, kir-e siyak kenpabok kwarogolar-e, e yu indipma wolmer-o.

⁵ Nde, an-nen nunggwi mende marig-et mbi wok kundumu, nuruk kenmawi rak puruk-nen kit-nen mbururak tu erep pigep iri-ge kambok ter-o. Naptag-o. Kir-e an nggal nema-t wok yigen-o” yosoloma, it-nen yogolar-e: ”Kat-nen konak kwat nunpugun iri bem-e wiwa-o. Kat kama nggul-o” yiga-o.

⁶ Yogolikma-ge, Abarakam na-ge ndag-et nak uwi lije sum-nen wiridnak iri na arem nggosolat, Sara yak tosolar-e: ”Kar-e oroti mburu konak mbi ndak wosa wanugwi mende bem kenan pem wanuruk, omok wosa keya buruk, oroti kago wosa woragi-o”

⁷ yak turuk, ar-e puburak mberarik, owam kwarat woraso sa ereba na mberarik, sapi wam marik usul uno na lubuk iri na lembena yarik, ndegel oboso nap iri na eram pamu, ndag-et nak lid lud tak pij-o.

⁸ Abu lid lud tak posoloma-ge, Abarakam-nen-e sapi agamo amburu min sapi agamo amburu logoktak min uno sa ereba na min-e ap sal at eram lobok yiga ereya na enndam pamu, nonggola-ge, at Abarakam-net e iri na indipma-net mak indij-o.

⁹ Iri yosola-ge, it-nen Abarakam kin wok obogolar-e: ”Kat kogwe Sara ngge me worasu-o?” luk kin waniga-o. Yogola, Abarakam-nen wene onggo yosolar-e: ”O lije ma worasu-o” yak ondosoloma,

¹⁰ it ereya na ennggendumu ap misik-nen yosolar-e: ”Nde, an-e waneya sembilan woraruk, tuguruk lobok yimin-o. Nde, iri tarem-e kogwe Sara la li ap mbi ndaguwa-o” yak tij-o. Nde, it wene iri yogola-ge, Sara na-ge it ap sal iri onmbol nggwe o lije sum uwi iri na tumende bem woralar-e, kulij-o.

¹¹ Nde, it Abarakam min Sara min-e abu inndi worak me, Sara na-ge kwami yoso na lak yidnak irit woragij-o.

¹² Iri ala karug-e, Sara na-ge arem-nen nak limit nda worosolat-nen yosolar-e: ”An abu nindi worak li yidnak yu nggal-nen-e kugut kondosola, nun-nen nimin nene yuwa-a? An nun na abu indi worak yu-ge!” luk peragij-o.

¹³ Perasola karuk, Nagawan Indo-nen Abarakam yak tosolar-e: ”Noluk-nen Sara-ge ’An-e abu nindi worak nggwe la nggesa ndagurag-o?’ luk te rak posolat nda yusu-o?

¹⁴ Nagawan Indo-nen-e kwarugwi buk mende-t nde kwarurag-e meya? Waneya sembilan woraruk, an-e lobok yimin-o luk urul pigi iri tarem-e Sara-ge la li ap mbi ndaguwa-o luk yak kirigi nar-o” luk yak tij-o.

¹⁵ Nde, Sara na-ge kwiye-nen yubul posolar-e: ”An-e nda-ge yigit lag-o” luk yij-et nde, Nagawan Indo-nen-e: ”Ndemeret. Kar-e yanem nda tigen nar-o” luk yij-o.

Abarakam-nen Sorom nap lak tak unpurak pug-o luk Nagawan Indo emengen mbarid wene 18:16-33

¹⁶ Iri luk, ap sal kenan ereya na mborogola, Abarakam-e ndemera inpil mberarik, o Sorom yik kudtak sa wok yogolar-e,

¹⁷ Nagawan Indo-nen perasolar-e: ”An-nen kwarurak yu-ge Abarakam imbiri bem kura burag-e meya-o.

¹⁸ Nde, at-nen wigarag-e ap enlem nggok kwat yosolat, enmawi worak irit kwat ma-o. Nde, an-e at ebem-net ap enlem oboksa inmbiringgat tak pimin-o.

¹⁹ Nde, Abarakam linigi na-ge at-nen-e at elirak min at-nen wigarak min at-nen watsa yak ondosola, it-nen-e an-nen yidnak yidnak yogolat, konak mot mot nak kwarogolat wolmakluk linigi na-ge, nde, it-nen nde iri kwat tenak woragola-ge, an-nen Abarakam imin urul pigi na-ge kwar-et onposolat woramin-o” peragij-o.

²⁰ Peraruk yarik, erep min-et Nagawan Indo-nen Abarakam yak tosolar-e: ”An-e Sorom min Nggomora min onpog-e meya angin worak kolosolat, nde, it-nen yi meya ndi meya nggog-et kwatli-o yogola kuligi-o.

²¹ Iri bem-nen an-e it iri nggal kwatli-o luk onpok kulusu iri-nen ndemeret, lak? Are, lag-a? luk oboksa lembeneyekluk mbimin-o”

²² yak tosola-ge, it mberen ya na-ge Sorom nggwe mbiriga-o. Alat nde, Nagawan Indo na-ge Abarakam imin woragij-o.

²³ Worala-ge, Abarakam na Nagawan Indo eram panggosa mborosolat-nen kin wanosolar-e: ”Lud tak kwarugwi nab-e lud tak kwarugwi buk nap inmin lambuksa lak tak unpugun-a?

²⁴ Ap lud tak nak kwarugwi lima pulu (50) nggal o iri me nde woragola-ge, o siri iri oboksa Nagawan Indo kat-nen lak tak pugun, lak? Ap lima pulu (50) iri inmiri yosolar-e, o siri iri lak tak pigit lak yugun pug-a?

²⁵ Lud tak kwarugwi nab-e lugud tak kwarugwi nap inmin undurag-e mondok meyog-o, Nagawan Indo wa-e. Nagawan Indo-nen nde lak tak onposolar-e, lud tak kwarugwi nab-e ndemeret lugud tak kwarugwi nap inmin-et lak tak unpugun me, mondok meyog-o. O yu oboksa enpem Wene Mbenaroso-nen-e wene kasa lugud tak enpem mbarurag-e meya-o” luk yij-o.

²⁶ Yosoloma-ge, Nagawan Indo-nen tuguruk yosolar-e: ”An-nen ap lima pulu (50) lud tak kwarugwi nde o Sorom eneyamindig-e, it ereya-nen ndowaga o siri iri-ge lak tak pimin pug-o” yij-o.

²⁷ Yosoloma, Abarakam-nen tuguruk yosolar-e: ”Nagawan Indo wa-e. Kisili rak nuburak pug-o. An-e kwiye lag-et wene yu-net tuguruk erep kundusu-o. An-e ki nab-et me, yi wene ndi wene yurag-e meya-t nde,

²⁸ o iri me ap lima pulu ennggendumu empat pulu lima (45) nak nde lud tak kwarugwi woragola-ge, Nagawan Indo kat-nen-e lugud tak kwarugwi nap lima ereya enpem nak-nen o iri lak tak pugun-a?” yosoloma, Nagawan Indo-nen yosolar-e: ”O siri iri me nde lud tak kwarugwi nap empat pulu lima (45) woragola-ge, o siri iri-ge lak tak pimin pug-o” yij-o.

²⁹ Yosoloma, Abarakam-nen tuguruk yosolar-e: ”Ap empat pulu (40) nak lud tak kwarugwi woragola-ge, iri-ge ngge kwarag-o?” luk kin wanosola, Nagawan Indo-nen yosolar-e: ”O iri me nde ap empat pulu (40) nak nde lud tak kwarugwi woragola-ge, an-nen lak tak inpimin pug-er-o” yij-o.

³⁰ Yosoloma, Abarakam-nen yosolar-e: ”Nagawan Indo wa-e. An tuguruk yosola-ge, kisilepma yurak pug-o, nab-o. Nde, o iri mende ap tiga pulu (30) nak lud tak kwarugwi woragola-ge, ngge kwarugun-o?” yosoloma, Nagawan Indo-nen onggo yosolar-e: ”Iri ala-ge, iri na lak tak inpimin pug-er-o” yij-o.

³¹ Yosoloma, Abarakam-nen yosolar-e: ”Nagawan Indo wa-e. An-e kwiye lag-et wene lit kuruk mburusu yu bem-e kisili niyudtak pug-o. Ap nde dua pulu (20) nak woragola-ge, ngge kwarag-o?” yosoloma, Nagawan Indo-nen yosolar-e: ”O siri iri me nde ap dua pulu nak woragola-ge, o siri iri-ge lak tak pimin pug-o” yij-o.

³² Worok tak posolat, Abarakam-nen yosolar-e: ”Nagawan Indo wa-e. An tugurug-et wene yosola-ge, kisilepma nuburak pug-o. Iri me nde ap lud tak kwarugwi nap sepulu nak woragola-ge, ngge kwarag-o?” yosoloma, Nagawan Indo-nen yosolar-e: ”O siri iri me nde ap sepulu nak nde lud tak kwarugwi woragola-ge, o iri-ge lak tak pimin pug-er-o” yij-o.

³³ Wene Abarakam imin yurug-e, Nagawan Indo na mborosola-ge, Abarakam na-ge tuguruk ama mbirij-o.