NDAK WIRIDNAK WENE 17 - Nanduk Ngget Tul Pidnak Wene

Iniye ambasap mbarugwi iri-ge urul yak indidnak iri na yenggerak purak pem mbarugwi-o 17:1-27

¹ Nde, Abaram na woralar-e, olengen sembilan pulu sembilan (99) pem worasoma-ge, Nagawan Indo at imbiri bem nam yosolat-nen yak tosolar-e: ”An-e Mondok Namawi worak Mbal Pem Nagawan-nen yusu-o. Kar-e an-nen yidnak yidnak nak kwarosolat, pempa an nindi-nen pidnak nak kwarosolat wolmin-o.

² An-e kat kimin urul paga yak korosolat, kat-nen wigarag-e kwarat tak posolat yimin-o” yak tij-o.

³ Yak tosoloma, Abaram na-ge erare nggwe tud yosola, Mbal Pem Nagawan-nen yosolar-e:

^4-5 ”An-nen kat urul yak kurusu-ge yu-o: Kar-e ap enlem kwarat ombo kek tak kwat yugun-o. Iri bem-e yawo kat kunu Abaram iri-ge lag-o. Are, Abarakam-nen yusu-o luk urul pusu-o.

⁶ Kat-nen wigarag-e kwarat tak inpimin ereba ennggendumu-ge ereb-e nagawan men ma-o. Kat-nen wigarak kwarat kwat yogolar-e, ap enlem nin nan kwat ma-o.

⁷ Nde, an-nen kat kimin kat-nen wigarak inmin urul yak kindigi iri-ge mondok kwar-et konposolat woramin-o. An-nen urul yak kundusu yu-ge pem woralik nalik irit wolma-o. An-e kat Kembal Pem Nagawan min kat-nen wigarak Enmbal Pem Nagawan min kwat yimin-o.

⁸ Yawo kat ap sal nggal worasu nggweyak yu-ge kat min kat-nen wigarak min winde rak kinpimin-o. Nde, an-e it Enmbal Pem Nagawan kwatluk, o Kanaan nggweyak oboksa-ge kat-nen wigarak wok undumu, pem irit winde wolma-o” luk urul yak tij-o.

⁹ Yak turuk, tuguruk Mbal Pem Nagawan-nen Abarakam yak tosolar-e: ”Kat-nen na irit, kat-nen, wigarak-nen na irit, pem woragolar-e, an-nen urul yak kundusu yu-ge mondok keya burak pug-o. Kwarogolar-et wolmomtak na-e.

¹⁰ Kat na irit, kat-nen wigarak na irit, ab-et nde ala-ge, mondok iniye ambesap mbarurag-o.

^11-12 Nde, o yawo kuri-nen-e li ap ndesa mburuk, tuju nene luk, delapan pem tak pogolar-e, mondok iniye ambesap waburag-o. Ndegel kubugwi nap inlirak kama-nen ndesa mbidnak na irit, kat-nen onnggo pidnak nap na irit, mondok iniye ambesap mbarurag-o. Nde, kiniye ambesap mbarugup iri-ge an-nen kit kinmin urul pidnak na yenggerak purak irit kwat ma-o.

¹³ Ab-o yidnak oboksa iniye ambesap waburag-o. We kenaboro mbarugup iri bem-net an-nen kat kimin urul pigi iri-ge pem irit wolma-o luk yenggerak puwa-o.

¹⁴ Ap-net nde, iye ambesap mbarigit lak ala-ge, an-nen urul yak kindigi iri na kwarigit lak yosola me, at iri-ge an nelem nab-e mondok lag-o” yak tij-o.

¹⁵ Iri luk, Mbal Pem Nagawan-nen Abarakam yak tosolar-e: ”Kar-e kogwe iri unu-ge Sarai-o yusu iri-ge lag-o. Yawo kuri-nen kogwe iri unu-ge Sara-o.

¹⁶ An-nen Sara iri-ge imbiringgat tak posolar-e, an-nen li ap mbi wok kirimin iri na at-nen ndaguwa-o. An-nen Sara imbiringgat tak posola-ge, at iri-ge ap enlem oboksa iniya kwat ma-o. Nde, at-nen wigarak ereba ennggendumu-ge ap ereb-e nagawan men ma-o” luk yak tij-o.

¹⁷ Iri yak tosoloma-ge, Abarakam na-ge tud yij-et nde, nda tosolat-nen indi yebet kasolar-e: ”Ap abu indi worak olengen seratus (100) woraidnag-e la ndagurag-a? Nde, Sara na olengen sembilan pulu (90) woraidnak yeba nggal-e nggesa-nen la ndagurag-o?” peragij-o.

¹⁸ Iri peraruk-nen Abarakam-nen Mbal Pem Nagawan yak tosolar-e: ”Ismael iri-net an niming angge winde mag-o” luk yij-o.

¹⁹ Alat nde, Mbal Pem Nagawan-nen yosolar-e: ”Lag-o. Kat kogwe Sara iri-net li ap mbi ndaguwama, kat-nen-e unu-ge Isak yarugun-o. Nde, an-e la iri min at-nen wigarak min inmin urul yak kirigi na-ge mondok pem irit kwat tenak woramin-o. Nde, urul yak kirigi iri-ge pem irit wolma-o.

²⁰ Alat nde, Ismael amanggim nggi yigen iri na kwar-et kibimin-o. Iri bem-nen an-nen imbiringgat tak pumu, at-nen wigarag-e kwarat ma-o. At iri-ge ap enlem duabelas iri onmbo kwat ma-o. Nde, at-nen wigarag-e ap enlem nggok misik kwarat tak pimin-o.

²¹ Alat nde, an-nen urul yak kirigi na-ge kambara Isak iri imin-et kwarimin-o. Nde, yanem nggal-et olengen abok yu bem-e kat kambara Isak iri-ge Sara-nen ndaguwa-o” yak tij-o.

²² Nde, Mbal Pem Nagawan-nen wene na abu Abarakam yak turug-e, mbirij-o.

²³ Iri tarem-net Abarakam na-ge Mbal Pem Nagawan-nen yidnak yidnak kwarosolar-e, ambara Ismael na-ge iye ambesap mbarosolar-e, at ama woragwi nap min at ama-nen ndet inpidnak ndegel ubugwi nap min onnggo pidnak nap min oboksa iniye ambesap wabij-o.

²⁴ Nde, Abarakam ar-e olengen sembilan pulu sembilan (99) pem iye ambesap mbariga-o.

²⁵ Nde, ambara Ismael na-ge olengen tiga belas worasola, iye ambesap mbariga-o.

^26-27 It enmberek min Abarakam ndegel ubugwi nap min-e misik tarem nak iniye ambesap mbariga-o.