NDAK WIRIDNAK WENE 16 - Nanduk Ngget Tul Pidnak Wene

Agat min Ismael min 16:1-16

¹ Abaram ogwe Sarai na-ge yibiri irit woragij-o. Alat nde, Mesira kwe Sarai ndegel oboso kwe unu-ge Agat iri perak nde ndugum irit woragij-o.

² Worala-ge, Sarai-nen Abaram yak tosolar-e: ”Nagawan Indo-nen-e an-e la mbi ndaguwa-o luk neberasu buk me, an-nen ndagidnak nggal la mbi ndet nuruwak-nen kar-e Agat imin nene yosolat wolmomtag-e op perasu-o” luk yak tij-o.

³ Iri nggal kwasa Sarai-nen-e we imin nene yurak amanggim nak kwe Agat na-ge Abaram wok tij-o. (Nde, ereya tarem-e Abaram o Kanaan woralar-e, olengen-e sepulu woraruk-nen kwarij-o.)

⁴ Nde, Abaram na kwe iri na imin nene yik tenak worasoma-ge, kwe na-ge abila yij-o. Nde, kwe Agat na-nen ambik abage mbaridnggal ar-e abila yoso karuk yarig-e, alen luk indi-nen kek yosolar-e, kwe Sarai na-ge teberak ibij-o.

⁵ Iri kwarosola karuk, Sarai-nen Abaram yak tosolar-e: ”Kwe yu-ge an-nen kat wok kurukmu, at ebebeyok mbal koragidnggal-e, abila ala karuk, ar-e kek yosolat, an-e teberak nubusu-o. Nde iri-ge erem-e kat kebem-o. Nagawan Indo nak-nen kat min an min nennggendumu-ge wene mbaruwag-o” luk yak tij-o.

⁶ Yak tosoloma, Abaram-nen yak tosolar-e: ”Irit nde, kwe iri-ge ndegel koboso teberak-net yusu me, kat-nen ebem purak mende nde worala-ge, ebem nak posolat wolmin-o” yak tij-o. Yosoloma-ge, Sarai na-nen-e kwe na-ge yi kwarurak ndi kwarurak ebem posolar-e, kwarat wit watsa ebem posolat worala-ge, kwe na-ge aye-nen mbirij-o.

⁷ Nde, kwe na mborosolar-e, o Sut lid nggwe mburugwi sa yi mbun emnde mbarak mbi koroga worasoma-ge, aid nab-e kwe Agat iri na imin lid pid luk-nen

⁸ yosolar-e: ”Sarai ndegel poso kwe Agat wa-e. Kar-e ngge nggwe-nen ngge me mburusu-o?” yosoloma, kwe na-nen erep nggarosolar-e: ”An-e an-nen ndegel oboso kwe Sarai iri aye-nen mburusu-o” yak tij-o.

⁹ Yosoloma, aid nap na-nen yosolar-e: ”Kar-e tugurug-et Sarai eram mburugundik, ndegel-et posolat wolmin-o” yak tij-o.

¹⁰ Yak turuk, aid nap iri na-net yak tosolar-e: ”An-nen-e kat-nen wigarag-e kwarat tak unpumu, wonat unpurag-e ap misiger-o luk-nen na mondok wonat unpuwa bug-o.

¹¹ Kar-e yanem yeba-t li ap mbi ndakun-o. Nde, kat-nen yip tigen iri-ge Nagawan Indo-ge abu kulidnak me, kat kambara unu-ge Ismael yari-o.

¹² Alat nde, kat kambara iri-ge kelerai wam erengen kege nggal erengen mberen woralar-e, ap oboksa inmin wim mbarosolat wolma-o. Iri yosola, ap oboksa-nen na at imin wim mbarogolat wolma-o. Ar-e owe owot inmin-e kundik woragit lak, arig-et irit wolma-o” yak tij-o.

¹³ Yosoloma-ge, Agat-nen perasolar-e: ”An-e ndemeret yebet neyasolat woraso Mbal Pem Nagawan na-t kagi, lak?” peraruk-nen unu yarosolar-e: ”Nagawan Indo mondok an kwara yebet neyaso-o” luk yarij-o.

¹⁴ Iri yidnak sa ala karuk, yi mbun emnde mbarak o Kandes wok Mberet wok iri na ap-nen unu yarogolar-e, ”An yebet neyaso uruk nak woraso iri-nen yidnak id mbun emnde mbarag-o” luk yiga-o.

¹⁵ Iri luk mberarik, kwe Agat na-ge li ap mbi ndagamu, eid Abaram-nen-e la na unu-ge Ismael irit yarij-o.

¹⁶ Nde, ereya tarem-e Abaram na woralar-e, olengen delapan pulu enam (86) woragij-o.