NDAK WIRIDNAK WENE 15 - Nanduk Ngget Tul Pidnak Wene

Mbal Pem Nagawan-nen Abaram urul yak tid wene 15:1-21

¹ Iri na kwatluk ombok nggwe-ge nabi pem nggal Nagawan Indo-nen Abaram yak tosolar-e: ”Abaram wa-e. Kar-e kwiye kasu-ge meyog-o. Kat lak tak kubuwa naru kurak kobosolat, onggo mondok nggok wok korosolat yimin-o” yak tij-et nde,

^2-3 Abaram-nen yosolar-e: ”Nagawan Indo Mondok Kek tak wa-e. Kat-nen-e la-ge an wok nurusu buk me, an nimining angge oboksa-ge ndegel noboso Ndamsik nap Elieset nde winde ma-o. No manggim-nen Nagawan Indo kat-nen onggo an wok nururak yigen-o?” luk yak tij-o.

⁴ Yuruk worasoma, Nagawan Indo-nen tuguruk Abaram yak tosolar-e: ”Kat ndegel koboso nap Elieset iri-nen kat kimining angge-ge winde ma-ge mondok lag-o. Are, kat kondomok kiyema-n pugun-net kat kimining angge winde ma-o” luk yak tij-o.

⁵ Yak turug-e, Nagawan Indo-nen Abaram na imin mbepme wurungsa laruk-nen yak tosolar-e: ”Kat kerengen mbal nggwe lik karuk, wonaru ereba wonari-o. Kat-nen wigarag-e wonaru abu nggal-et ligik lujwa-o” luk yak tij-o.

⁶ Yak tosoloma-ge, Abaram na-ge ndemerer-o luk Nagawan Indo ebem indi angin tubu yosola karug-e, Nagawan Indo-nen-e ”At yu-ge an nindi alen tak poso nab-o” eberasolug-e, wok ibij-o.

⁷ Nde, misik pem-e Nagawan Indo-nen Abaram yak tosolar-e: ”An-e nggweyak yu kat ombo rak kebeyekluk, o Ut Mbabilonia nggweyak pem-nen lit kuburuk wagi Nagawan Indo-nen yusu-o” luk yak tij-o.

⁸ Alat nde, Abaram-nen kin wok obosolar-e: ”Nagawan Indo Mondok Kek tak wa-e. No mende bem-nen o nggweyak yu-ge ombo yimin-o luk naru yimin-o?” luk kin wok ibij-o.

⁹ Yosoloma-ge, Nagawan Indo-nen erep nggarosolar-e: ”Olengen tiga woraidnak sapi wam kowak misik, kambing wam kowak misik, kambing wam kusi misik towe nggwende nggal merpati misik, towe tekukut misik an namanggim wani-o” luk yak tij-o.

¹⁰ Yak tosoloma-ge, Abaram-nen-e wam min towe min Mbal Pem Nagawan amanggim wanurug-e, sapi min kambing kusi min kowak min ereba na-ge irik tak nak yurung ndurungsa obo mberen lembak lembak pij-et nde, towe ereya na-ge ebis pij-o.

¹¹ Iri rak puruk worala-ge, towe yi mende ndi mende wat yidnak orogak naso ereba na-ge wam mbarak pid ereba na bem pak yosoloma, Abaram-nen-e sera wirik pij-o.

¹² Nde, keyama nggwe molengen wusa nggosola ereya na-ge Abaram na-ge mondok mondok nggaruksa nene yosoma-ge, mimo ereya na-net mondok indi kwiye ebem wok yij-o.

¹³ Iri yosoma, ereya na-net Nagawan Indo-nen yak tosolar-e: ”Karu wolmin-o. Kat-nen wigarag-e o nin me ereba me ap sal kwat luk woragola-ge, iri me woragwi nap-nen-e mumnggup manggi rak unpuruk yemndak unpuruk woragolar-e, olengen empat ratus (400) irit wolma-o.

¹⁴ Alat nde, kat-nen wigarak ereba na mumnggup manggi rak unpuruk, anggun panggun tak unpuwa nap ap enlem iri-ge an-nen-e enpem angin worak pimin-o. Nde, kat-nen wigarak-nen o iri na keya buruk mborogolar-e, silobulo kwarat waruk mburuwa-o.

¹⁵ Kar-e abu kindi worag-et luk, kalen pem-et komborak enndam mburugunmu, yapma kubuwa-o.

¹⁶ Kat-nen wigarak komborag-e ap tab-e empat wat luk-nen it-nen ndaguwa iri-nen o yu me-ge tuguruk lobok yuwa-o. Nde, it Amori nap iri-ge it-nen meya kwarat kwarogola, enpem angin worak mende pigit lak awo worala-ge, wirik inpimin pug-o” luk yak tij-o.

¹⁷ Nde, mo wusa nggosolat abu ndamuk luk worala-ge, togolwak arem kan mabidnak kule ndugu yosola min tal amare min mimo nam luk, wam mbarak ereba na enggenggerak nggwe mborosola kagij-o.

¹⁸ Ereya na-net Nagawan Indo-nen Abaram urul watsa yak tosolar-e: ”O Mesira nggweyak kuri mbarak iri kuri-nen yi Eperat kuri o nggweyak yu oboksa-ge kat-nen wigarak iri wok indimin iri-ge

¹⁹ Keni nap min Kenas nap min Katmon nap min

²⁰ Et nap min Peris nap min Erepaim nap min

²¹ Amori nap min Kanaan nap min Nggirigasi nap min Yebus nap min onnggweyak min-et wok indimin-o” luk urul yak tij-o.