NDAK WIRIDNAK WENE 14 - Nanduk Ngget Tul Pidnak Wene

Abaram-nen Lot yongga wiridnak wene 14:1-16

¹ Nagawan empat ereya-ge o Mbabilonia nagawan Amarapel min o Elasat nagawan Ariok min o Elam nagawan Kendotlaomet min o Nggoyim nagawan Tindeal min-e

² wim pogolar-e, nagawan lima ya inmin wim piga-o: O Sorom nagawan Mbera min o Nggomora nagawan Mbirisia min o Atma nagawan Sinap min o Semboim nagawan Semembet min o Mbela (unu misiget Soat) iri nagawan min ereya na inmin wim mbariga-o.

³ Nde, it nagawan lima iri na lambuk yogolar-e, it-nen yidnak ensan ombo min Sirim lid iri me ndok wiriga-o. (Nde, iri na me-ge yawo-nen-e Wat Yoso Yi Koma-o yili-o.)

⁴ Nde, it nagawan lima ya-ge nagawan Kendotlaomet-nen yemndak unpuruk woralar-e, olengen duabelas irit woragij-et nde, olengen tiga belas iri bem-e imin wim mbaruwokluk ebem mbud yiga-o.

⁵ Nde, olengen empat belas iri bem-e Nagawan Kendotlaomet iri na min nagawan at imin lambuk yidnak nap ereba na min it-nen yidnak ensan ombo ereba na min lobok yigarik, urugwe nggwe rak onpogolar-e, Erepaim nab-e o Aserot Karenaim-nen urugwe nggwe rak onpogolat, Susim nab-e o Am-nen urugwe nggwe rak onpogolat, Emim nab-e o Sawe-Kirataim-nen urugwe nggwe rak onpogolat,

⁶ Ori nab-e ndobo worak Erom nggwe-nen ondogolat, muk iniyil mbiriga mbiriga lid maksa Eparan iri me inpil mbiriga-o.

⁷ Iri kwasa langgara inpil mbutluk, tuguruk Enmispat mbiriga-o. (Enmispat iri-ge yawo Kandes irit yili-o.) Nde, it-nen-e Amalek nap unuwi nggweyak oboksa min Amori nap Aseson-Tamat woragwi nap oboksa min unduruk, yemndak inpiga-o.

⁸ Iri luk, abok nggwe-nen-e it Sorom nagawan min Nggomora nagawan min Atma nagawan min Semboim nagawan min Mbela nagawan min lambuk yogolar-e, it-nen yidnak ensan ombo min ndik ndik ndok ndok Sirim lidmu kamarak puruk, inmin wim mbarogolar-e,

⁹ Elam nagawan min Nggoyim nagawan min Mbabilonia nagawan min Elasat nagawan min it nagawan lima ereya na lambuk yogolar-e, nagawan empat ereya inmin wim mbariga-o.

¹⁰ Nde, Sirim mbirik iri-ge oboksa yi ugup nak emnde mbarep parep kwarat me, it Sorom nagawan min Nggomora nagawan min-nen wim kwiye-nen mburukmu-ge, yi ugup emnde mbarep parep ereba na me nak yubuksa mbiga-t nde, it nagawan kenan erep ereba na-ge enmawi kundurug-e mengga mborogolar-e, ndobo nggwe ereba mbiriga-o.

¹¹ Nde, it ombol nggwe yiga nagawan empat ereya na-nen-e o Sorom min Nggomora min yi mende ndi mende woraso ereba na min nunggwi mende oboksa min mberena waruk mbiriga-o.

¹² Nde, Abaram owot ambara Lot na-ge o Sorom worasoma me, wim nap nggogolar-e, ebe min aringgi arengge min mberena wok uburuk mbiriga-o.

¹³ Alat nde, ap misik mesag-et nak perak nde mengga mberarik, Iberani nap Abaram iri na eram wene waruk mbirij-o. Nde, iri tarem-e Abaram na-ge Amori nap mbi unu-ge Mamere at iri-nen erembel wanoso e ereba na elem pem worasoma, yak til lobok yij-o. Nde, ap Mamere min owe owot Eskol min Aner min it ereya-ge Abaram imin kundidnak nap, at anggamirag-o.

¹⁴ Nde, Abaram na-nen kulidnggal owot ambara Lot na wim nap-nen kugun waruk mbiridnak wene kulurug-e, Abaram-nen-e at totno woragwi nap wim nggugwi enaru nap tiga ratus delapan belas (318) iri ndok worak unpuruk, nagawan empat ereya na muk iniyil mbirigarik, o Ndan iri na me wok yogolar-e,

¹⁵ Abaram-nen-e at imin mbiriga nap yeba na-ge menggesa ereb-e tu nin nggwe nggogola, nde, ereb-e tu nin nggwe nggogola, iri nggal kwasa kubu o bem mbud yogolar-e, wim nap ereb-e urugwe nggwe rak unpuruk, ereb-e langgara o abare abam (utara) nggwe o Ndamsik ambigit muk iniyil iniyil Oba inpil mbutluk,

¹⁶ Abaram amawi kondosolar-e, yi mende ndi mende oboksa mberena waruk mbiriga yeba na tuguruk mberena waruk lobok yij-o. Owot ambara Lot min na aringgi arengge min ligwami min kugun wok unpuruk mbiriga nap erep ereba na min-et tuguruk wok unpuruk lobok yij-o.

Melkisendek-nen Abaram imbiringgat tak pidnak wene 14:17-24

¹⁷ Nagawan Kendotlaomet iri na min at imin lambuk yidnak nap nagawan erep ereba na min urugwe nggwe rak unpurug-e, Abaram na-ge tuguruk lobok yosoma-ge, Sorom nagawan na-ge Sawe lidmu iri me abuwok mbirij-o. (Nde, lid iri unu misig-e Nagawan Ilid.)

¹⁸ Nde, Melkisendek o Salem nagawan iri-ge eyabu misig-e Mbal Pem Nagawan Mondok Kek tak-nen yidnak tepan ombo irit worasolar-e, mburu min anggut engen amburu min Abaram amanggim waruk lobok lug-e,

¹⁹ Abaram na imbiringgat tak obosolat-nen yosolar-e: ”Mbal Pem Nagawan Mondok Kek tak mbal min nggweyak min ndak worak pid iri na-nen Abaram kimbiringgat tak kubuwag-o!

²⁰ Wim nap urugwe nggwe rak unpuruk, ombol nggwe rak kibid Mbal Pem Nagawan Mondok Kek tak iri nak erembel wanugwi irit wolmag-o” luk yak tij-o. Yak tosoloma-ge, Abaram-nen-e at-nen wim kugun pem wanid yi mende ndi mende ereba na enggep lombok menggesa karetkwe irit Melkisendek wok tij-o.

²¹ Iri luk, Sorom nagawan iri na-nen Abaram yak tosolar-e: ”Kat-nen wim kugun pem wanidnak mende yeba-ge wanosola-t nde, an nab-e tuguruk an wok nururag-o” luk yak tij-o.

²² Alat nde, Abaram-nen wene erep nggarosolar-e: ”Mondok Kek tak Mbal Pem Nagawan, mbal min nggweyak min ndak wirid Nagawan Indo iri na imbiri bem yak kurusu-o.

²³ An-e kat karengge-ge mondok mbi wanimin pug-o. Keresi-a? Are, kuwok sum kere pok tak mariger-o luk tet mondok wanimin pug-o. An-nen nde wanumu-ge, kat-nen-e: ’Abaram yu-ge an-nen yi mende ndi mende ombo rak pigi-o’ yugun naru mondok wanimin pug-o.

²⁴ An nondomok namanggim-e mondok wanimin pug-o. Alat nde, an nap-nen ininggem woraso perak irit wanimin-o. Nde, an nenggamirak kwat yidnak nap Aner min Eskol min Mamere min perak nde wanuwa-o” luk owak mbarij-o.