NDAK WIRIDNAK WENE 13 - Nanduk Ngget Tul Pidnak Wene

Abaram min Lot min pondoksa enarik yidnak wene 13:1-13

¹ Wirik inpikma-ge, Abaram na-ge Mesira keya buruk, abare abam (utara) nggwe lagaid iri-ge o Kanaan-nen-e abare ena nggwe (selatan) ambigit lagaij-o. Lasolar-e, ogwe min aringgi arengge min Lot min inmin-et lagaij-o.

² Nde, Abaram iri-ge arengge kwarat, lomba wam nde kambing wam nde sapi wam nde perak tol nde emas tol nde ombo mondok kek tak irit woragij-o.

³ Nde, at na o Mbetel mborosolar-e, nin me-nen-e nin me wok luk, nin me-nen-e nin me wok luk, irit kwaril kwaril mberarik, nanduk at-nen o lije sum wirid sa o Mbetel wok, o Ai wok iri na me worasolat-nen

⁴ Nagawan Indo amanggim wam wosa kan purak ondoro kona ndama pil lagaid sa iri na me-t wok yij-o. Wok lug-e, iri me-nen Nagawan Indo erembel wanij-o.

⁵ Nde, Lot na ogwela worak, lomba wam min kambing wam min sapi wam min ndegel ubugwi nap min worag-et me,

⁶ it onowam nak kwarat ala, o iri me it onowam-nen norak tusuangge lak nggal iri-nen ndowaga it mberen lambuksa wolmomtag-e meya agaij-o.

⁷ Iri-nen ndowaga it Abaram owam yik karok woragwi nap ereba na min Lot owam yik karok woragwi nap ereba na min-e onowam-nen norak tusuangge ndugwi yuk puk mbiga-o. (Nde, ereya tarem-e o iri me-ge Kanaan nap min Peris nap min woragola tarem-o.)

⁸ Yuk puk mbogola karuk, Abaram-nen Lot yak tosolar-e: ”Nab-o. Nit mberen yu-ge nenpe misiger-et nde, nit nonowam yik karok woragwi nap yu-ge yuk puk tenak yu-ge meya-o.

⁹ Iri nggal kwatli me, nab-o. Nir-e nenarik tak yuwog-o. Nde, nenarik tak yogolat-nen nde, kat ponok nggwe mborosola-ge, an-e ponok nggwe mbirimin-o. Iri ala karug-e, kat-nen nak o nggweyak yu-ge limbini-o” luk yak tij-o.

¹⁰ Yak tosoloma-ge, Lot na-ge erengen ponok ponok ereba limbinidnggal-e, yi Yareren imik nggwe-nen kundugu mberarik, o Soat pem linik iri-ge yi na kwarat, Nagawan Indo eyapmu min Mesira min nggweyak nggal irit yik kagaij-o. (Nde, Nagawan Indo-nen o siri Sorom min Nggomora min lak tak pigit lak ma-ge, ndemeret o ereya nggal-et woragamu-o.)

¹¹ O nggweyak iri na yik karug-e, Lot na-ge mo luwaso ambigit yi Yareren imik nggwe wunde yil mbirij-o. Nde, it ap mberen enarik yogolar-e, iri nggal kwasa enarik yiga-o.

¹² Abaram na-ge o Kanaan iri na me-t worala-t nde, Lot na-ge o siri nggwe ap lak tusuangge worak nggwe-nen o lije sum nak ya worak mbirid mbirid o Sorom mak mak wok yij-o.

¹³ Nde, o Sorom iri me-ge ab-e Nagawan Indo imin-e yi meya ndi meya, kwarugwi buk mende ereba na nak kwarogolat woraiga-o.

Abaram na-ge o Eperon mbiridnak wene 13:14-18

¹⁴ Nde, Lot na mberamu, Nagawan Indo-nen Abaram yak tosolar-e: ”Kat mendak worasu sa iri me-nen kerengen mondok kwara ponok ponok ereba mbenari-o.

¹⁵ Nde, o nggweyak kat-nen kaigen ereba oboksa-ge an-nen kat min kat-nen wigarak min-et wok kindimin-o. Iri yumu, mondok pem kat karengge irit wolma-o.

¹⁶ Nde, an-nen kat-nen wigarak kwarat tak pimin-o. Nde, iri rak pumu-ge, ap misiger-o luk tet-nen na wonat unpuwa bug-o. Ap-nen o liri wonarurak meya yili iri nggal-et kat-nen wigarak wonat unpurag-e mondok meya ma-o.

¹⁷ O nggweyak yu-ge an-nen wok kirimin me, kar-e yawo-ge o nggweyak wok kirimin ereba oboksa limbinil waring ki-o” yak tij-o.

¹⁸ Iri yak tosoloma-ge, Abaram na-ge o lije sum wi na-ge mijara turuksa o Mamere iri me kek tak pugwi e elem pem o Eperon koroga wiril mberarik woragij-o. Woralar-e, Nagawan Indo amanggim wam wosa kan purak ondoro kona ndama pil lagaij-o.