NDAK WIRIDNAK WENE 12 - Nanduk Ngget Tul Pidnak Wene

Mbal Pem Nagawan-nen Abaram wene mbo bid wene 12:1-9

¹ Nagawan Indo-nen Abaram yak tosolar-e: ”Kuwi nggweyak min kowe kowot min keid uwi min oboksa keya buruk, o an-nen mirik kibimin sa irit mbiri-o.

² Nde, an-nen-e kat-nen wigarak kwarat tak pumu-ge, it iri-ge ap enlem nggok irit kwat ma-o. Nde, an-nen-e kimbiringgat tak kobosola, kanggu kobok mborosolar-e, kar-e imbiringgat kwat yugun-o.

³ Nde, ap-nen nde kat kimbiringgat tak kobogola-ge, an-nen na imbiringgat tag-et inpimin-o. Kat nde imbiri lamut tak kobogola-ge, an-nen na imbiri lamut tag-et inpimin-o. Kat kebem-nen nggweyak ma worali nap enlem oboksa imbiringgat tak inpimin-o” luk yak tij-o.

^4-5 Abaram na-ge olengen tuju pulu lima (75) bem-e o Aran keya bid iri-ge Nagawan Indo-nen yak tid iri na ndak ndag-et kwarosolat keya bij-o. Nde, Abaram na Kanaan wi mborosolar-e, ogwe Sarai min owot ambara Lot min mborogolar-e, o Aran-nen ndok wirid isilobulo min ndegel ubugwi nap ereba na nduguluk mbirij-o. Mberarik, o Kanaan wok luk-ge,

⁶ Abaram na-ge o Kanaan nggweyak nggwe-t mbirid mbirij-e o More iri me kek tak pugwi e elem pem wok yid iri-ge o Sikem iri me it-nen erembel wanugwi sa iri me wok yij-o. (Nde, ereya tarem-e Kanaan nab-e o iri me woragola tarem-o.)

⁷ Nde, Nagawan Indo na-ge Abaram imbiri bem nam luk-nen yak tosolar-e: ”Nggweyak yu-ge an-nen kat-nen wigarak wok indimin nggweyak-nen yusu-o” luk yak tosoloma-ge, Abaram-nen-e at anggarem nam yid Nagawan Indo iri na amanggim wam wosa kan purak ondoro kona ndama pil lagaij-o.

⁸ Iri rak purug-e, Abaram na-ge abare ena (selatan) nggwe tu wanij-o. Mo luwaso ambigit abare ena nggwe ndobo worak o siri Mbetel nggwe mberarik, o lije sum-e Mbetel wok, o Ai siri wok, ereba me wirij-o. Nde, o Mbetel iri-ge mo mboso nggwe-o. Nde, Ai iri-ge mo luwaso nggwe-o. Iri me-nen na Abaram-nen-e Nagawan Indo amanggim wam wosa kan purak ondoro na misik kona mendaga pil laruk, Nagawan Indo erembel wanij-o.

⁹ Iri rak purug-e, iri me-nen tu wanarik, iri me-nen-e nin me, nin me-nen-e nin me irit tit o Kanaan nggweyak pem abare ena (selatan) nggwe mbirij-o.

Abaram Mesira woragid wene 12:10-20

¹⁰ Abaram na o Kanaan worasoma-ge, nogoro nggok mbi mbud yosoloma-ge, ereba me woraruk, nogoro na lak yosola-n lobok yurak puruk, Abaram na-ge abare ena nggwe ambigit Mesira mbirij-o.

¹¹ At na mberarik, Mesira nggweyak kuri worak iri na me nggweyekluk-nen ogwe Sarai na yak tosolar-e: ”Nogwe kar-e mondok kerare na konak me,

¹² Mesira nap-nen nde kat keyarug-e, it-nen peragolar-e: ’Kwe yu-ge at ogwe-o’ peraruk, kar-e wok kuburak keya kobogolat, an-e mondok nuruwa-o.

¹³ Iri ala karug-e, kat-nen yosolar-e: ’An-e at owor-o’ luk yurag-o. Iri yugunmu-ge, an-e nuruk keya nobogolat, kat kebem-nen an-e konak nak kwat nubuwakluk iri yurag-o” yak tij-o.

¹⁴ Iri lug-e, Abaram na onggweyak kuri worak iri na kwidsa Mesira wok yukmu-ge, it Mesira nap-nen ndemeret kwe Sarai na-ge mondok erare konak irit yik kaiga-o.

¹⁵ Yik karug-e, Mesira nagawan iri na woraso sa yabu tena woragwi nap erep-nen-e nagawan iri na yak togolar-e: ”Kwe iri erare-ge konak lombog-o” yak togolikma-ge, Sarai na waruk nagawan woraso sa mbiriga-o.

¹⁶ Nagawan iri na-nen Sarai na ebem-nen Abaram na konak nak kwat obosolar-e, lomba wam nde kambing wam nde sapi wam nde kelerai wam nde unta wam nde kwarat wok tij-o. Nde, ereba wok tosolat na at ndegel uburak nap na kwarat lena wok tij-o.

¹⁷ Alat nde, nagawan na-nen kwe Sarai wanid iri na-nen ndowaga, ud aye worak nin tak nan tag-e Nagawan Indo-nen-e nagawan na min at woraso sa woragwi nap min enpem mberak pij-o.

¹⁸ Iri ala karuk, nagawan-nen-e Abaram wene mbo buruk kin wok obosolar-e: ”Kar-e an nimin ngge kwarigen-o? Nde, kat-nen nam-et nak: ’Kwe yu-ge an nogwer-o’ yurag-et nde,

¹⁹ noluk-nen kat-nen yosolar-e: ’Yu-e an nowor-o’ yigenma an-e waneyekluk wanigi-o? Yawo-ge kogwe wanurug-e, mondok mbiri-o” luk yak tij-o.

²⁰ Yak turuk, nagawan na-nen-e Abaram na ogwe min aringgi arengge min o iri me-nen wirik unpuwakluk, ene amawi min at woraso sa yabu wanugwi nap ereba na watsa yak indij-o.