NDAK WIRIDNAK WENE 11 - Nanduk Ngget Tul Pidnak Wene

O Mbabel-nen o mot wiridnak wene 11:1-9

¹ Nde, nandug-e yi ap ndi ap yi wi ndi wi woragolar-e, mondok enne-ge misiget nak yogolat, enne nggut na misiget nak yogolat woraiga-o.

² Woragolar-e, ir-e mo luwaso ambigit nggwe waring kagolar-e, o nggweyak yamuk tak Mbabilonia iri me karug-e, iri na me-t woraiga-o.

³ Woragolar-e, it-nen wene mbal kerak mbogolar-e: ”Yawo-ge nir-e nggweyak kona omok wosa keya buruk, amawi makluk woraguwog-o” luk wene mbatlug-e, woraga koniga-o. Nde, iri kwarogolar-e, kebet wururak nggweyak kerep kwarat wora min kerep ereba na anggam pem nambeksa panggaril ludtak mende amburu min-et kona buruk woragolat-nen

⁴ yogolar-e: ”Nenggarag-o. Nir-e o nggok misik wiril lul lul anggul-e mbal pem kundugu puwog-o. Nde, iri wurulndig-e, yi wi ndi wi ndibi ndi yigit lak, ondoro misik nak ndok worak woragolat, nonpok na yi wi ndi wi mborosolat ma-o” luk yiga-o.

⁵ Iri kwarogola-ge, Nagawan Indo-ge it unuwi siri min ap ereba-nen o mot wiril laidnak na min kayekluk mbuwagarik,

⁶ Nagawan Indo-nen yosolar-e: ”Nde, it yu-ge enlem na misiget, enne na misiger-et woragolat, mondog-et nde it-nen kwarurak mururak abu lid lud tak pili yu-ge woragolar-e, yanem-et it inndi-n pidnak iri-ge mondok kwaruwar-o.

⁷ Anggam-nen anggam ene kulurak meya makluk, nir-e mbulndik, enne nari wari rak puwog-o” luk yiga-o.

⁸ Iri nggal kwasa Nagawan Indo-nen ap ereba na-ge yi wi ndi wi ndibi ndi rak enpamu, o nggok na-ge wirigit lak, keya bikma-o.

⁹ Iri rak inpidnak me, Nagawan Indo-nen o iri me-nen ap enlem oboksa enne nari wari rak unpuruk, iri me-nen Nagawan Indo-nen-e ab-e yi wi ndi wi ndibi ndi rak enpamu me, o iri na unu-ge Mbabel-o. 11:10-26 Ayat ya arem-e Sem-nen wigarak Tera kuri unnu mbarag-o.

Tera-nen wigarak 11:27-32

²⁷ Tera-nen wigarag-e yu-o: Tera iri-ge Abaram min Naot min Aran min ineid. Nde, Aran na-ge ambara mbi unu-ge Lot.

²⁸ Nde, Aran na-ge Mbabilonia nggweyak pem at ama Ut iri me-nen-e eid Tera na uruk worala, at nanduk wat yij-o.

²⁹ Nde, Abaram na-ge Sarai wanij-o. Nde, Naot na-ge Aran ara Milka wanij-o. Nde, Aran ambara misik unu-ge Yiska irit woragij-o.

³⁰ Nde, kwe Sarai na-ge yibiri irit woragij-o.

³¹ Nde, mbi tarem-e Tera na-ge Mbabilonia nggweyak pem at uwi Ut na keya buruk yarik, ambara Abaram min ombo Lot min ambara ogwe Sarai min ndegel unpuruk Kanaan mbururak puruk mbiriga-t nde, Aran woklug-e, iri na me-t woraiga-o.

³² O Aran worakmu, Tera na-ge olengen dua ratus lima (205) bem wat yij-o.