NDAK WIRIDNAK WENE 1 - Nanduk Ngget Tul Pidnak Wene

Ndak Wiridnak Wene O ndak wiridnak wene 1:1–2:4

¹ Mondok mondog-e, Mbal Pem Nagawan-nen mbal min nggweyak min ndak worosolar-e,

² nggweyag-e awo nggweyak abage kwat yigit lak, nari wari nak woragij-o. Woralar-e, yi koma nak suwarep mbuwarep tak yi mende ndi mende oboksa yi-nen yemndak woralar-e, mondok ndamuk mom ndirik irit woragij-et nde, Mbal Pem Nagawan Indi-ge yi iri na ombol pem yebaluk nij-o.

³ Nde, Mbal Pem Nagawan-nen yosolar-e: ”Yaya min-o” yosoloma, yaya yij-o.

⁴ Nde, yaya iri na-ge Mbal Pem Nagawan-nen yik karug-e, alen irit kagaij-o. Iri rak purug-e, yaya-ge ndamuk iri na-t waga weyara arik tak pij-o.

⁵ Iri rak purug-e, yaya na unu-ge ”Lengge” yarij-o. Nde, ndamuk iri na unu-ge ”Kubu” yarij-o. Nde, kubu woraruk, lak yosola-ge, lengge kwat yij-o. Iri-ge anggul anggul tarem-o.

^6-7 Imbirig-e, Mbal Pem Nagawan-nen yosolar-e: ”Yi menggesa arik tak ondoro mberen kwat min-o” yosoloma-ge, iri na nggal-et kwat yij-o. Nde, yi mbal urugwe nggwe worasu yu-ge yi mbal ombol pem worasu iri me-net weyara arik tak pamu-o. Iri nggal kwasa Mbal Pem Nagawan-nen yi na menggesa mberen tak pamu-o.

⁸ Nde, yi menggesa abam nggwe rak pid iri na unu-ge ”Mbal” yarij-o. Kubu na woraruk, kuplila kwat yid iri-ge mberen pem tak posolat tarem-o.

⁹ Iri luk, Mbal Pem Nagawan-nen yosolar-e: ”Yi nggweyak ma worasu yu-ge wonggoksa ondoro misik yosolat, nggweyak nam mag-o” yosoloma-ge, iri na nggal-et kwat yij-o.

¹⁰ Nde, nggweyak lorok tak iri na unu-ge ”Nggweyak” yarosolat, yi wonggona labuk yidnak iri na unu-ge ”Yi koma-o” luk yij-o. Nde, iri na yik karug-e, Mbal Pem Nagawan-e alen kagaij-o.

¹¹ Alen karug-e, Mbal Pem Nagawan-nen yosolar-e: ”Nggweyak yu-nen-e yak yoso mende engen nin tak nan tak uwi wirik puwag-o. Nde, iri-ge e engen-nen tup yoso mende min we engen nak yoso mende min irit mburuwag-o” yij-o. Yosoloma-ge, iri na nggal-et kwat yij-o.

¹² Iri nggal kwasa yak yoso mende nin tak nan tak iri-ge nggweyak yu-nen wirik pamu-o. Nde, ereba na-ge Mbal Pem Nagawan-nen yik karug-e, alen kagaij-o.

¹³ Kubu na woraruk, kuplila kwat yid iri-ge kenan tak posolat tarem-o.

^14-15 Iri luk, Mbal Pem Nagawan-nen yosolar-e: ”O yaya yosolat, kubu min lengge min len yosolat, tarem min olengen min kwat yoso iri enaru yuwakluk, ap-nen yebet kagwi tarem ereba na wok yosola, silo sakwi kwat maklug-e, yaya rak poso mende mbal pem wolmag-o” luk yij-o. Yosoloma-ge, iri na nggal-et kwat yij-o.

¹⁶ Nde, Mbal Pem Nagawan-nen-e yaya rak poso mende nggok mberen, mo min waneya min ndak wirid iri-ge mo iri-nen-e lengge rak posolat, nde, waneya-nen-e kubu yaya rak posolat makluk ndak worak pamu-o. Nde, ereb-e wonaru min-et ndak woramu-o.

¹⁷ Nde, Mbal Pem Nagawan-nen-e yaya rak poso mende iri-ge nggweyak ma yaya rak puwakluk mbal pem pid

¹⁸ iri-ge, kubu min lengge min ombo wolmakluk-nen pamu-o. Iri-nen yaya na-ge ndamuk iri na-t weyara yaya rak posolat makluk-nen pamu-o.

¹⁹ Kubu na woraruk, kuplila kwat yid iri-ge empat tak posolat tarem-o.

²⁰ Iri luk, Mbal Pem Nagawan-nen yosolar-e: ”Urugup worak yi ma woraso mende nin tak nan tak kwarat ijak wat mag-o. Nde, teram nggwe-ge towe pubu noso nin tak nan tak pubu nosolat mag-o” luk yij-o.

²¹ Nde, Mbal Pem Nagawan-nen yi koma arem woraso urugup worak mondok yok nggok min yi ma woraso urugup worak nin tak nan tak min, yi towe ndi towe oboksa min ndak worak pij-o. Nde, iri na yik karug-e, Mbal Pem Nagawan-e alen kagaij-o.

²² Iri rak puruk, Mbal Pem Nagawan-nen-e imbiringgat tak posolat-nen yosolar-e: ”Yi koma arem woraso urugup worag-e kwarat wigak yosolat, ijak wosa labuk yosolar-e, yi koma arem mik mak mbi-o. Yi towe ndi towe na kwarat wigak min-o” luk yij-o.

²³ Kubu na woraruk, kuplila kwat yid iri-ge lima rak posolat tarem-o.

²⁴ Iri luk, Mbal Pem Nagawan-nen yosolar-e: ”Nggweyak-nen-e towe mena, yengge wam, sil waro, erengen kege worak nggok min marik min oboksa nin tak nan tak kwarak puwag-o” yosoloma-ge, iri na-t kwat yij-o.

²⁵ Nde, Mbal Pem Nagawan-nen-e ndak worak pid ereba na oboksa yik karug-e, alen kagaij-o.

²⁶ Iri rak puruk, Mbal Pem Nagawan-nen yosolar-e: ”Yawo-ge nit nggal kwat yurak, nit nenpage worak ap mbi ndak wuruwog-o. Nde, ndak wurulmu-ge, it-nen-e keyane min towe min, erengen kege lak na irit, erengen kege worak na irit, marik na irit, nggok na irit, nin tak nan tak oboksa it-nen ombo wolmakluk ndak wuruwog-o” yij-o.

²⁷ Nde, Mbal Pem Nagawan-nen-e ap ndak wat onposolar-e, at ondomok abage worak ndak wat enpamu-o. Ndak wat onposolar-e, kwe min ap min ndak worak inpij-o.

²⁸ Iri rak puruk, imbiringgat tak onposolat-nen yosolar-e: ”Kit-nen wigarak yi wi ndi wi woragolar-e, o tena wolmag-o. Nde, keyane yi ma woraso min towe teram nggwe noso min nggweyak ma woraso erengen kege lak min worak min oboksa kit-nen tena worabokluk kininggem pusu-o.

²⁹ Nde, yak yoso mende nin tak nan tak, engen tup yoso mende min we engen yoso mende min oboksa-ge kit nok tenak worabok-nen wok kundusu-o.

³⁰ Alat nde, yi towe ndi towe oboksa min erengen kege worak mende erep min-nen norak mende-ge tusuangge min tusuangge miri min nujwakluk, wok tusu-o” luk yij-o. Yosoloma-ge, iri na nggal-et kwat yij-o.

³¹ Mbal Pem Nagawan-nen-e ndak worak pid mende ereba na yik karug-e, alen kwarat kagaij-o. Kubu woraruk, kuplila kwat yid iri-ge enam tak posolat tarem-o.