NAM PARA WENE 9 - Nanduk Ngget Tul Pidnak Wene

¹ Iri luk, aid nap imbirik (yang kelima) iri-nen oboba ene pu yosola, an yik kaginggal-e, mbal pem-nen nggweyak ma wonaru misik mbuwasola, kagi-o. Nde, wonaru iri wok tosolar-e, wat yugwi mbun tu imig iri wok tij-o.

² Wonaru iri na-nen wat yugwi mbun tu kuwarosola-ge, arem-nen-e tirik kule nggal mundurak luwasolar-e, wat yugwi mbun kule iri na-nen teram nggwe pidsa muruk yosolar-e, mo eyaya lumu rak posolar-e, ndamuk yij-o.

³ Nde, kule na arem-nen-e sil kwarat nggweyak ma mbuwagaij-o. Nde, sil ereba wok tosolar-e, kigaru eyak nggal wok tij-o.

⁴ Sil ereba yak tosolar-e: ”Tusuwangge min e min yaidnak mende min norak pug-o. Are, inmbiriwak pem Mbal Pem Nagawan-nen idnak lop nok tak pugwi mende pigit lak nap nak nok unpurag-o” luk yak tij-o.

⁵ Sil ereba na yak tosolar-e: ”Ap ereba-ge mondok undurak pug-o. Are, andi bandi rak nak onposolat waneya lima wolmomtag-o” luk yak tij-o. Nde, sil ereba eyak andi-ge kigaru-nen yilik onposoma, andi kagwi nggal-o.

⁶ Nde, waneya lima iri arem woragolar-e, ap ereba na-ge wat momtak tula kore yuwa-t nde, wat momtag-e meya-t ma-o. ”Wat teyeg-o” luk yuwa-t nde, wat momtak elem-e it endam-nen mbiridnak me, war-e ma bug-o.

⁷ Sil ereba na abage-ge wim timbiril mbururak pem lid lud tak pidnak kuda wam abage nggal-o. Nde, anggul pem-e nagawan-nen pugwi emas-nen konidnak topi nggal woragaij-o. Erare-ge ap entare nggal,

⁸ anggulsu-ge kwami enanggulsu nggal, nde, eyag-e singa ndakngge eyak nggal-o.

⁹ Nde, imigwak pem-e posid-nen konidnak tagun nggal yirig-o. Nde, insiyamu ene mu-ge wim pil mborogolat nggweyak koma kuda wam kwarat-nen lit karuk mborosola, ene mbirip nggal-o.

¹⁰ Nde, sil ereba-ge kigaru nggal-et nde, iyuwak worak yilik onposo irit woragaij-o. Nde, waneya lima worasolat-nen ap andi bandi rak unpurak amawi-ge iyuwak arem-et woragaij-o.

¹¹ Sil ereba na tena unpuruk woraso nagawan iri-ge wat yugwi mbun iri tena woraso aid nap irir-o. Nde, at iri unu-ge Iberani wene bem-e ”Abandon-o”, nde, Yunani wene bem-e ”Apolion” irir-o. (Iri-ge Lak tak Onposo yogolar-o.)

¹² Andi rak onposo nandug-et na lak yosola-ge, andi rak onposo mberen mbi mondok lobok yuwa-o.

¹³ Iri luk, aid nap imbirik (yang keenam) iri-nen oboba ene pu yosola-nen an kuliginggal-e, ene misig-e Mbal Pem Nagawan eralu woraso emas-nen konidnak Mbal Pem Nagawan amanggim wam wosa kan pugwi ondoro iri unggut empat ereya nggwe-nen yosola, kuligi-o.

¹⁴ Ene iri-nen poba tena worasu aid nap (yang keenam) iri na yak tosolar-e: ”Yi nggulok Eparat iri arem kamarak worali aid nap empat iri weserak inpi-o” luk yak tij-o.

¹⁵ Yak tosoloma, aid nap empat iri na weserak inpij-o. Nde, it iri-ge iri tarem-nen, jam iri bem-nen, waneya iri bem-nen, olengen iri bem-nen nggweyak ma nap oboksa menggesa (sepertiga) iri undurak pem lid lud tak inpidnag-o.

¹⁶ Nde, ap kere wim puwokluk kuda wam ombolwak pem koreyag-e dua ratus yuta (2,000,000) luk yak niriga-o.

¹⁷ Nde, an-e nabi ngganggo nggal pem kasolar-e, kuda wam ereba na ombolwak pem kore yil lobok yiga nap yik eneyaginggal-e, it posid tagun yiriga iri-ge erare-ge mimi kan ngen (merah) nggal, kisikmbal (biru) nggal, ndagum ngen erare (kuning) nggal irit yirik kagi-o. Nde, kuda wam ereba na anggulwag-e singa ndakngge anggulwak nggal-o. Nde, emendam nggwe-nen-e kanduk min kule min kule emben meya (belerang) min mbirij-o.

¹⁸ Nde, andi bandi mende kenan iri-nen-e nggweyak ma nap erep menggesa (sepertiga) iri indij-o. Nde, iri-ge kuda wam emendam nggwe-nen mbiridnak kanduk min kule min kule emben meya (belerang) min irir-o.

¹⁹ Nde, kuda wam ereba na amawi-ge emende bem-nen na, iyuwak pem-nen na pidnag-o. Iyuwag-e waro nggal, anggulwak worak me, anggulwak iri-nen-e ap andi bandi rak onposolat woragaij-o.

²⁰ Nde, andi bandi mende iri-nen indigit lak, keya inpidnak nap-nen-e it ininggi-nen konugwi kugiwak na keya buruk, kondok yigit lak, kundugu kundugu erembel wanogolar-e, kugi min emas pem, perak pem, tembaga bem, kerep pem, e bem-nen konidnak kugiwak ereba na-ge erengen-nen na kaso buk, eyanggo-nen na koloso buk urugup lak woraso-t nde, erembel wanogolat woraiga-o.

²¹ Nde, ap ereba na-ge ap undugwi min kwal kwarugwi min mbabi yugwi min yariya wanugwi min iri-ge keya buruk, kondok yigit lak yiga-o.