NAM PARA WENE 22 - Nanduk Ngget Tul Pidnak Wene

¹ Iri luk, aid nap iri na-net mirik nobosolar-e, unlug-et wolmomtak yi erengen miri papalo erare nggal igip kip worak irit mirik nibij-o. Nde, yi iri na urusu-ge Mbal Pem Nagawan min Lomba Wam Marik min-nen koreyak woragwi ondoro na arem-nen kenangga mborosolar-e,

² o siri iri na tula ombolwak enggendumu nggwe-t mbirij-o. Nde, yi iri eyak ponok ponog-e unlug-et wolmomtak e irit ya-o. E ereba na-ge olengen misiget arem-e engen perenak woralar-e, duabelas pem poso-o. Iri posolar-e, waneya irit wosa perenak woraso-o. Nde, e ereba na angga bem-nen-e ap enlem oboksa ki rak unpugwi-o.

³ O siri iri me-ge Mbal Pem Nagawan-nen imbiri lamut tak pidnak mende misiger-o luk tet mondok wolma bug-o. Mbal Pem Nagawan min Lomba Wam Marik min-nen koreyak woragwi ondoro-ge o siri iri me-t woragola, Mbal Pem Nagawan ndegel ubugwi nap-nen-e at erembel wanogolat wolma-o.

⁴ Woragolar-e, at erare kagolat, it inmbiriwak pem-e Mbal Pem Nagawan unu mbarak wolma-o.

⁵ Ndamug-e mondok lak me, Mbal Pem Nagawan eyaya nak-nen it yaya rak onposolat wolma me, tal min mo eyaya min iri-ge ir-e ukwe yuwa bug-o. Nde, ir-e nagawan luk, pem-et woralik nalik irit wolma-o.

Yesus lobok yurak wene 22:6-17

⁶ Iri luk, aid nap iri-nen an yak norosolar-e: ”Wene yeba-ge ndemerer-o luk, inndi angin tubu yurak wene-nen yusu-o. Nde, Nagawan Indo Mbal Pem Nagawan-nen at Indi-ge at ene lomboksa yugwi nap wok unduruk, mondok yanem-et kwat ma ereba na at ndegel ubugwi nap mirik unpuwaklug-e, at-net at-nen idnak aid nab-e endam pil lobok yij-o” luk yak nirij-o.

⁷ Yesus-nen yosolar-e: ”Kwara yebet ker-o. An ndag-et nak lobok yimin-o. Kwat momtak wene urul engga yu arem mbarak worasu yeba karuk, kwara yebet kasu nab-e mondok alen kujwag-o!” luk yij-o.

⁸ Nde, Yoanes an-net yeba oboksa kolosolat, kasolat yigi-o. Nde, yeba oboksa kolosolat, kasolat yurug-e, yeba mirik nibid aid nap na erembel waneyekluk eram nerare nggwe tud yigi-t nde,

⁹ at-nen an yak norosolar-e: ”Kar-e an nerembel wanurak pug-o. Mbal Pem Nagawan nak erembel wani-o. An na at ndegel oboso nap kat min kanggamirak Mbal Pem Nagawan ene lomboksa yugwi nap ereba min engga yu arem mbarak worasu wene ereba kwara wonatluk yidnak yidnak kwatli nap oboksa min ndak ndak at ndegel oboso nap-net yusu-o” luk yak nirij-o.

¹⁰ Yak norosoluk, at-nen tuguruk yak norosolar-e: ”Yeba oboksa kwat momtak tarem-e panggo yusu me, engga yu arem urul paga mbarak worasu yeba-ge kura burak pug-o.

¹¹ Meya nak kwarugwi nab-e meya nak kwat tenak wolmag-o. Kopkap tobok tak mende kwarugwi nab-e ondomok kopkap toboksa wanogolat wolmag-o. Mbal Pem Nagawan indi-n pidnak nak kwarugwi nab-e Mbal Pem Nagawan indi-n pidnak nak kwarogolat wolmag-o. Nde, Mbal Pem Nagawan amanggim nak lenak woragwi nab-e Mbal Pem Nagawan amanggim lenak nak wolmag-o” luk yak nirij-o.

¹² Yesus-nen yosolar-e: ”Kwara yebet ker-o. An-e ap oboksa-nen kwarogolat woraidnak iri na ndak ndag-et wok undurak onggo waruk ndag-et nak lobok yimin-o.

¹³ An-e nandug-et woraso, abok na woramin, tel koroso min woroksiyem min-nen yusu-o” luk yij-o.

¹⁴ It unsum masa ngget tak pili nab-e unluk wolmomtak e iri na engen nonggolat, o siri iri nggogolar-e, kerep pak tumende nggwe nggogolat yurag-e it nak-net yili me, enalen kujwag-o.

¹⁵ Alat nde, kwarugwi buk mende kwarugwi nap min kwal ombo min terak terak ye unpugwi min ap wurugwi nap min kugiwak erembel wanugwi nap min ininggi-nen kwarugwi mende bem-nen na, enne bem-nen na ennesiget yugwi nap it oboksa ondoro-ge mbepme nggwe wolma-o.

¹⁶ ”Yesus an-nen-e kit lambuk tak kinpidnak nap kenmanggim wene yeba yak kunduwakluk an-nen idnak aid nap ibil lobok yigi-o. An-e Ndaud-nen lolo-nen wigarak-nen yusu-o. An-e o nda nda wonaru yaya worak-nen yusu-o.”

¹⁷ Konak Indi min Un Wanurak Kwe na min-nen yogolar-e: ”Lobok yer-o!” luk yili-o. Wene yeba kulili nap oboksa-nen na mondok yogolar-e: ”Lobok yer-o!” luk yuwag-o. Ta-nen yi nere kasu nab-e lobok yuwag-o. Ta-nen yi norak ukwe perasu nab-e unlug-et wolmomtak yi iri-ge onggo pigit lak, we irit wanuwag-o.

Worok tak posolat yidnak wene 22:18-21

¹⁸ Yoanes an-nen-e engga yu arem kwat momtak urul pidnak wene yeba kulili nap pidsa kenaru rak pusu-o: Ap-nen nde kwat momtak urul pidnak wene yu wene ki eralu nambena puwa nab-e andi bandi mende engga yu arem mbarak worasu iri-ge Mbal Pem Nagawan-nen ap iri na ebem posolar-e, erep min-et nambena ebem puwa-o.

¹⁹ Nde, ap-nen nde kwat momtak urul pidnak wene engga yu arem mbarak pidnak yeba erep keya bosola-ge, engga yu arem mbarak worasu unluk nak wolmomtak e min O Siri Marak iri min at wok turak yidnak arengge ereb-e Mbal Pem Nagawan-nen wok tuwa bug-o.

²⁰ Wene yeba oboksa kinggiridnak nap-nen yosolar-e: ”Ndemerer! An-e ndag-et nak lobok yimin-o!” luk yij-o. Ndemerer-o! Nagawan Indo Yesus wa-e. Lobok yi-o!

²¹ Nagawan Indo Yesus-nen we wok ondoso elem-e kit pidsa kinmin wolmag-o. Amin-o.