NAM PARA WENE 21 - Nanduk Ngget Tul Pidnak Wene

Mbal ngget min nggweyak ngget min kagaid wene 21:1-8

¹ Iri luk, an yik kaginggal-e, mbal ngget min nggweyak ngget min kagi-o. Nde, nanduk woraso mbal min nggweyak min lak yosolar-e, yi koma min-et lak yij-o.

² Nde, an yik kaginggal-e, Mbal Pem Nagawan-nen idnak o siri Yerusalem ngget iri-ge Mbal Pem Nagawan eram aid arem-nen mbuwasola kagi-o. Nde, o siri iri mondok konidnak abage-ge kweyap ndugum-nen unun wanuwokluk inmirik unmuruk pugwi nggal-o.

³ Iri luk, an kuliginggal-e, nagawan-nen koreyak woraso ondoro-nen ene ngguloksa yosolar-e: ”Yawo-ge Mbal Pem Nagawan woraso sa-ge ap ennggendumu worasu-o! Ar-e it inmin worala, ir-e at ilirak kwat ma-o. Nde, Mbal Pem Nagawan ar-et it inmin woralat, it Enmbal Pem Nagawan kwat ma-o.

⁴ At-nen-e it iniyip lengen oboksa ndogwarak puwa-o. Wat yugwi elem na lag-et ma-o. Nde, indi puru yugwi min yip tugwi min andi kagwi min mondok lag-et ma-o. Nanduk-nen woraso oboksa lak yij-o” luk yij-o.

⁵ Iri luk, at nagawan-nen koreyak woraso ondoro bem koreyak worasu na-nen yosolar-e: ”An-nen-e yi mende ndi mende oboksa ngget mende nak ndak worak pusu-o!” luk yij-o. Iri luk, at-nen yak norosolar-e: ”Wene yeba-ge ndemerer-o luk inndi angin tubu yurak wene me, engga bem mbari-o” luk yak nirij-o.

⁶ Iri yuruk, at-nen tuguruk yosolar-e: ”Abu ndak yij-o. Nde, an-e Tel Koroso min Woroksiyem min-nen yusu-o. An-e Nanduk-net Woraso, Abok-nen na irit Woramin Nagawan Indo-nen yusu-o. Yi nere kagwi nab-e an-nen we onggo lag-et mak ondosolar-e, unlug-et woragwi yi ulusu na kenangga mak indimin-o.

⁷ Amawi luk, ombol nggwe yuwa nab-e yeba oboksa winde ma-o. Nde, an-e it Enmbal Pem Nagawan kwat yosolat, ir-e an nilirak kwat ma-o.

⁸ Alat nde, kwiye kagwi nap min inndi angin tubu yugwi buk nap min kwarugwi buk mende kwarugwi nap min ap undugwi nap min terak terak ye unpugwi nap min kwal ombo min kugiwak erembel wanugwi min enesiget yugwi nap oboksa min it ondoro-ge emben worak kule (belerang) laso kan mare arem-nen yusu-o. Nde, iri-ge mberen pem tak posolat wat momtak elem-nen yusu-o” luk yij-o.

Yerusalem ngget 21:9–22:5

⁹ Aid nap tuju worok tak posolat (yang ketuju) andi bandi mende kenanggo yimbe tuju iri tena worali nap ereya na ennggendumu-nen aid nap misik an neram lobok yarik-nen yosolar-e: ”Lobok yi-o. Lomba Wam Marik iri na wanurak ogwe mirik kibimin-o” luk yij-o.

¹⁰ Iri luk, Konak Indi an nebem mbosolar-e, aid nap iri na-nen wok nuburuk ndobo mondok mot misik pem nibil lagaij-o. Nibil laruk, at-nen-e Mbal Pem Nagawan-nen idnak o siri Yerusalem iri-ge Mbal Pem Nagawan eram aid arem-nen mbuwasola, mirik nibij-o.

¹¹ Mbal Pem Nagawan abinal-nen o siri iri-ge abinal worak tak pij-o. Nde, o siri iri abinal-e onggo kwarat pugwi kerep, abinal worak kerep kopkap lak papalo nggal irir-o.

¹² O siri na kerep leger-e mambu-nen mondok mor-o. Nde, kerep pak tumende duabelas na-ge aid nap duabelas-nen yik karok woragwi-o. Nde, Isarael nap enlem duabelas unnu-ge tumende ereya na bem mbarag-o.

¹³ Tumende-ge mo luwaso nggwe-ge kenan pelak, abare ponok (selatan) nggwe-ge kenan pelak, abare ponok (utara) nggwe-ge kenan pelak, mo mboso nggwe-ge kenan pelag-o.

¹⁴ Nde, o siri iri na kerep leger-e mabin-e kerep duabelas pem-nen wiridnag-o. Nde, kerep mabin pidnak ereba na bem-e Lomba Wam Marik-nen iddnak wirik inpidnak nap duabelas ereya na unnu mbarag-o.

¹⁵ Nde, wene yak nirid aid nap na inggem-e emas-nen konidnak o ndak wurugwi mende wangun o siri iri min kerep pak tumende min kerep leget min ndak wereyekluk inggem woragaij-o.

¹⁶ Nde, o siri iri-ge mot nggwe-nen na, abak nggwe-nen na unggur-e empat ndak ndak nag-o. Nde, aid nap na inggem o ndak wurugwi mende wangun na bem-nen o siri na ndak wirij-o. Mot nggwe-ge 2,400 kilometer. Nde, abak nggwe-nen na mot mendak pugwi nggwe-nen na mot nggwe-nen na mondok ndak ndak nag-o.

¹⁷ Nde, aid nap iri-nen kerep leget na ndak wiridnggal-e, mot mendak pugwi nggwe-ge 60 meter agaij-o. Nde, aid nap iri-nen ndak wurugwi mende bem ndak wirid iri-ge ki nap-nen ndak wurugwi ndak ndag-et ndak wirij-o.

¹⁸ Kerep leget iri-ge abinal worak kerep-nen wiridnag-o. Nde, o siri iri-ge emas kopkap lak papalo erare nggal pem-nen wiridnag-o.

¹⁹ Nde, o siri iri kerep leget mabin pidnak kerep ereba ebem-e yi kerep ndi kerep onggo nggulok pugwi abinal worak pem-nen umuruk pidnag-o. Nde, o mabin misig-e (yang pertama) kerep baiduri pandan-nen konidnak, misig-e (yang kedua) kerep nilam-nen konidnak, misig-e (yang ketiga) kerep yakut-nen konidnak, misig-e (yang keempat) kerep samurut-nen konidnak,

²⁰ misig-e (yang kelima) kerep baiduri sepa-nen konidnak, misig-e (yang keenam) kerep delima-nen konidnak, misig-e (yang ketuju) kerep rata sempaka-nen konidnak, misig-e (yang kedelapan) kerep pirus-nen konidnak, misig-e (yang kesembilan) kerep topas-nen konidnak, misig-e (yang kesepulu) kerep kirisoperas-nen konidnak, misig-e (yang kesebelas) kerep lasuarindi-nen konidnak, misig-e (yang keduabelas) kerep kesubung-nen konidnag-o.

²¹ Nde, tumende duabelas iri-ge mutiara duabelas-nen yusu-o. Nde, tumende ereya na-ge iritsa mutiara misiget misiget pem-nen konidnag-o. Nde, o siri iri na tu-ge emas kopkap lak papalo erare nggal abinal worak-nen konidnag-o.

²² Nde, Mbal Pem Nagawan uwi nggal-e Nagawan Indo Amawi Mondok Kwarat Mbal Pem Nagawan at ondomok min Loba Wam Marik min-net yili me, an-nen-e Mbal Pem Nagawan uwi o siri iri me-ge kagit lag-o.

²³ Nde, o siri iri me-ge Mbal Pem Nagawan abinal-nen yaya rak posolat, tal ebe-ge Lomba Wam Marik-net yusu me, o siri iri me-nen-e mo min waneya min eyaya ukwe-ge mondok lag-o.

²⁴ O siri iri me eyaya bem-e nggweyak ma worali nap ap enlem oboksa nogolat, it nagawan nagawan-nen na it enarengge mende-ge o siri iri me nak waruk mburuwa-o.

²⁵ Nde, o siri iri me-ge ndamuk yoso buk me, o siri iri kerep leget tumende-ge lerak pigit lak, kuwarak nak wolma-o.

²⁶ Ap enlem oboksa-nen it-nen kek tak woragwi min it enarengge min o iri me nak waruk mburuwa-o.

²⁷ Alat nde, mbilaro ngin mende-ge iri me mondok ngguwa bug-o. Nde, kwarugwi buk mende kwarugwi min enesiget yugwi min na iri me mondok ngguwa bug-o. Are, Lomba Wam Marik-nen idnak unluk nak wolmomtak engga iri bem unnu mbarak nap nak-nen perak nde o siri iri me nggurak worasu-o.